'కోహ్లీతో జాగ్రత్త ఫ్రెండ్స్​!' - ఆస్ట్రేలియాకు వార్నర్​ హెచ్చరిక

విరాట్ కోహ్లీపై డేవిడ్ వార్నర్ కీలక వ్యాఖ్యలు - కోహ్లీతో ఆసీస్​కు ఇబ్బందులు తప్పవన్న క్రికెటర్

David Warner Virat Kohli : మరో 4 రోజుల్లో ఆసీస్, టీమ్ ఇండియా మధ్య బోర్డర్ - గావస్కర్ ట్రోఫీ ప్రారంభం కానుంది. ఈ క్రమంలో ఫామ్​లో లేక ఇబ్బందిపడుతున్న భారత బ్యాటర్ విరాట్ కోహ్లీపై అందరి దృష్టి నెలకొంది. ఆస్ట్రేలియాపై గత సిరీసుల్లో అద్భుత ప్రదర్శన కనబరిచిన విరాట్​, ఇప్పుడు ఎలా ఆడతాడనేది ఆసక్తికరంగా మారింది. రీసెంట్​గా జరిగిన బంగ్లాదేశ్‌, న్యూజిలాండ్​తో టెస్టు సిరీసుల్లో విరాట్ విఫలమయ్యాడు. ఈ క్రమంలో ఫామ్ లేమితో సతమతమవుతున్న విరాట్ కోహ్లీ గురించి ఆస్ట్రేలియా క్రికెటర్ డేవిడ్ వార్నర్ కీలక వ్యాఖ్యలు చేశారు.

ఆందోళన తప్పదు - కోహ్లీ ఫామ్​లో లేకపోయినా ఆస్ట్రేలియాకు ఆందోళన తప్పదని వార్నర్ హెచ్చరించాడు. ప్రపంచ టెస్టు ఛాంపియన్‌ షిప్‌ ఫైనల్​కు చేరుకోవడానికి ఇరు జట్లకూ బోర్డర్- గావస్కర్ ట్రోఫీ అత్యంత కీలకమైన సిరీస్‌ అని పేర్కొన్నాడు. ఆస్ట్రేలియాతో సిరీస్ అంటే విరాట్ కోహ్లీ ఉత్సాహంగా ఉంటాడని, అతడు విసిరే సవాల్​తో ఆతిథ్య జట్టుకు టెన్షన్ తప్పదని తెలిపాడు. బోర్డర్- గావస్కర్ ట్రోఫీలో రాణించి విమర్శకులు నోళ్లు మూయించేందుకు విరాట్​ ప్రయత్నిస్తాడని అభిప్రాయపడ్డాడు.

"గతంలోనూ ఆసీస్ పై విరాట్ కోహ్లీ పూర్తి ఆధిపత్యం చెలాయించాడు. అందుకే, ఈసారి కోహ్లీ ఉన్న భారత్​ను చూస్తే ఆస్ట్రేలియా క్రికెట్‌ తరఫున నాకు ఆందోళనగా ఉంది. కోహ్లీని పరుగులు చేయనీయకుండా కట్టడి చేస్తే జట్టు విజయావకాశాలు పుష్కలంగా ఉంటాయి. గత కొన్ని సిరీసుల్లో విరాట్ ఇబ్బందులు పడిన మాట వాస్తవమే. కానీ, దిగ్గజ క్రికెటర్​ను తక్కువగా అంచనా వేయొద్దు. ఒక్కసారి అవకాశం దొరికితే అస్సలు వదిలిపెట్టడు"

-డేవిడ్ వార్నర్, ఆసీస్ బ్యాటర్

గతేడాదిగా ఫైయిల్ - విరాట్ ఇటీవల కాలంలో టెస్టుల్లో వరుసగా విఫలమవుతున్నాడు. ఆఖరి 19 టెస్టుల్లో 20.33 సగటుతో 488 పరుగులు మాత్రమే చేశాడు. అందులో కేవలం రెండు అర్ధ సెంచరీలు మాత్రమే ఉన్నాయి. అత్యధిక స్కోరు 76. బంగ్లాదేశ్, కివీస్​తో జరిగిన సిరీస్​ల్లో విఫలమయ్యాడు. దీంతో కోహ్లీపై తీవ్ర ఒత్తిడి ఉంది. అందుకే అతడు బోర్డర్- గావస్కర్ ట్రోఫీలో రాణించాలని పట్టుదలతో ఉన్నాడు.

ఆసీస్​పై ఫుల్ ఫామ్ - అయితే, ఆస్ట్రేలియా గడ్డపై మాత్రం కోహ్లీ మంచి రికార్డులు ఉన్నాయి. ఆసీస్ గడ్డపై ఆడిన 13 టెస్టుల్లో 54.08 సగటుతో 1,352 పరుగులు చేశాడు. ఇందులో ఏకంగా ఆరు సెంచరీలు ఉన్నాయి. సవాళ్లతో కూడిన పరిస్థితుల్లోనూ రాణిస్తూ జట్టు విజయాల్లో కీలక పాత్ర పోషించాడు. ఈ సారి ఆసీస్​తో జరిగే ఐదు టెస్టుల సిరీస్​లో విరాట్​ ఏ మేరకు రాణిస్తాడోనని ఫ్యాన్స్ వేచిచూస్తున్నారు.