Vinesh Phogat Olympics 2024: భారత మహిళా స్టార్ రెజ్లర్ వినేశ్ ఫొగాట్ అదరగొట్టింది. శనివారం జరిగిన ఆసియా ఒలింపిక్‌ క్వాలిఫయర్‌లో సత్తాచాటిన వినేశ్ ఫొగాట్ (50 కేజీలు) వరుసగా మూడోసారి ఒలింపిక్స్ పోటీలకు అర్హత సాధించింది. ఈ క్వాలిఫయర్‌ పోటీల్లో వినేశ్ వరుసగా మిరాన్ చియాన్ (కొరియా), స్మానంగ్ (కంబోడియా)పై పైచేయి సాధించి సెమీస్కు చేరింది. సెమీస్లో వినేశ్, 19ఏళ్ల లారా గనికిజీ (కజకిస్థాన్‌)తో తలపడింది. ఇక్కడ ప్రత్యర్థి నుంచి కాస్త పోటీ ఎదురైనా, అనుభవంతో పోరాడి 4- 0 ఆధిక్యంతో వినేశ్ గెలుపును సొంతం చేసుకుంది.
ఈ క్రమంలో వినేశ్ ఒక్క పాయింట్‌ కూడా కోల్పోకుండా ఫైనల్‌ చేరింది. కాగా, 2016 రియో, 2020 టోక్యో ఒలిపింక్స్లో వినేశ్ భారత్ తరఫున ప్రాతినిధ్యం వహించింది. ఇక ఇదే విభాగంలో మరో ఇద్దరు రెజ్లర్లు అన్షు మాలిక్, అండర్‌-23 ప్రపంచ ఛాంపియన్‌ రీతిక సత్తా చాటారు. సెమీస్లో అన్షు 11-0తో లేలోకోన్‌ సోబిరోవా (ఉజ్బెకిస్థాన్‌)ను, రితిక తన ప్రత్యర్థి చాంగ్‌ (చైనీస్‌ తైపీ)పై 7-0తో నెగ్గి ఒలింపిక్స్కు క్వాలిఫై అయ్యారు. ఇక మరో రెజ్లర్ అంతిమ్ పంఘాల్ (57 కేజీలు) కూడా ఇదే విభాగంలో గతేడాదే ఒలింపిక్స్కు క్వాలిఫై అయ్యింది. దీంతో మహిళల రెజ్లర్లు నాలుగు కోటా స్థానాలు సాధించినట్లైంది.
అన్నింటికీ సమాధానం: 2022 కామన్వెల్త్‌ క్రీడల్లో పసిడి గెలిచిన తర్వాత మ్యాట్‌పై, బయట వినేశ్ ఎన్నో సవాళ్లు ఎదుర్కొంది. మహిళా రెజ్లర్లపై లైంగిక ఆరోపణలు ఎదుర్కొన్న భారత రెజ్లింగ్‌ సమాఖ్య అప్పటి అధ్యక్షుడు బ్రిజ్‌భూషణ్‌కు వ్యతిరేకంగా పోరాడింది. రోడ్డుపైనే నిద్రించింది కూడా. ఈ క్రమంలో వినేశ్ చాలా కాలం ప్రాక్టీస్కు సైతం దురమైంది.
ఇక గతేడాది రెజ్లర్ అంతిమ్ ఒలింపిక్స్ కోటా గెలిచింది. దీంతో వినేశ్ బరువు విభాగం మారింది. 57 కేజీలకు మారాలని వైద్యులు సూచించినా, బరువు తగ్గడం ప్రమాదమని హెచ్చరించినా వినేశ్ వినకుండా 50 కేజీలకు తగ్గింది. ఈ క్రమంలోనే జాతీయ సెలక్షన్‌ ట్రయల్స్‌లో గెలిచి ఆసియా ఒలింపిక్‌ క్వాలిఫయర్‌కు అర్హత సాధించింది. ఇక తాజాగా ఇక్కడా సత్తా చాటిన ఫొగాట్ ఒలింపిక్స్లో ఏ బరువు విభాగంలో పోటీ పడుతుందో చూడాలి. 'బరువుపై నియంత్రణ పరంగా మెరుగ్గా ఉండాలి. ప్రతి రోజు ముఖ్యమైందే. సహజంగానే నేను బరువు పెరుగుతుంటా. 20 ఏళ్లుగా రెజ్లింగ్‌ చేస్తున్నా. నాకు ఒలింపిక్‌ మెడల్ కావాలి' అని వినేశ్ తెలిపింది.
రెజ్లర్ల నిరసనలో ట్విస్ట్- సాక్షి, బజ్రంగ్, వినేశ్కు వ్యతిరేకంగా ఆందోళన
వినేశ్ ఫొగాట్ సంచలన నిర్ణయం - కేంద్రానికి ఖేల్రత్న రిటర్న్!
