ఆ జట్టు చేతిలోనే పాకిస్థాన్​, యూఎస్‌ఏ 'సూపర్ - 8' భవితవ్యం - T20 Worldcup 2024

T20 WORLDCUP 2024 Super 8 Chances : యూఎస్​ఏపై గెలిచి టీమ్​ఇండియా సూపర్ 8కు వెళ్లిపోయింది. మరో స్థానం కోసం నాలుగు జట్లు పోటీపడుతున్నాయి. అయితే ఇప్పుడు అమెరికా, పాక్‌ జట్ల భవితవ్యం ఐర్లాండ్‌ చేతిలో ఉంది. ఎలా అంటే?

T20 WORLDCUP 2024 Super 8 Chances : యూఎస్‌ఏ జట్టుపై టీమ్‌ఇండియా విజయం సాధించడంతో పాకిస్థాన్ టీమ్​ ఊపిరి పీల్చుకుంది. అయితే ఇప్పుడు అమెరికా, పాక్‌ జట్ల భవితవ్యం ఐర్లాండ్‌ చేతిలో ఉంది. ఎలా అంటే? గ్రూప్ - Aలో ఐదు టీమ్​లు పోటీపడుతున్నాయి. మొదటి రెండు స్థానాల్లో నిలిచిన జట్లు సూపర్ - 8కు అర్హత సాధిస్తాయన్న సంగతి తెలిసిందే. ఇప్పటికే హ్యాట్రిక్‌ విజయాలతో భారత జట్టు మరొ మ్యాచ్‌ మిగిలి ఉండగానే సూపర్ 8కు దూసుకెళ్లింది. అంటే ఈ గ్రూప్‌ నుంచి ఇంకా మరో జట్టుకు మాత్రమే అవకాశం ఉంది. మరి ఆ ఛాన్స్​ ఎవరు దక్కించుకుంటారనేది ప్రస్తుతం ఆసక్తికరంగా మారింది. అయితే మిగిలిన నాలుగు జట్లకు తదుపరి దశకు వెళ్లేందుకు అవకాశాలు ఉన్నాయి.

యూఎస్‌ఏ టీమ్​ : వరుసగా రెండు మ్యాచుల్లో గెలిచింది. కానీ టీమ్​ఇండియాపై ఓటమి అందుకోవడం వల్ల ప్రస్తుతం 4 పాయింట్లతో రెండో స్థానంలో కొనసాగుతోంది. తన చివరి మ్యాచ్‌లో ఐర్లాండ్‌తో (జూన్ 14న) పోటీపడాలి. ఇందులో గెలిస్తే ఇతర జట్ల రిజల్ట్స్​తో సంబంధం లేకుండా సూపర్ - 8కు వెళ్లిపోతుంది. ఒకవేళ ఓడిపోయిన కూడా కాస్త ఛాన్స్ ఉంటుంది. పాకిస్థాన్ తన చివరి మ్యాచ్‌లో ఓటమిని అందుకోవాలి.

పాకిస్థాన్ జట్టు : యూఎస్‌ఏ, టీమ్​ఇండియా చేతిలో ఓటమిని అందుకున్న పాకిస్థాన్​ ఎట్టకేలకు తొలి విజయాన్ని అందుకుంది. అయితే తన చివరి మ్యాచ్‌లో భారీ గెలుపును అందుకుని నెట్‌రన్‌రేట్‌ను మెరుగుపర్చుకుంటేనే సూపర్ - 8కు వెళ్లే అవకాశం ఉంటుంది. లేదంటే యూఎస్‌ఏ తన చివరి మ్యాచ్‌లో ఓడిపోవాలి. అలానే ఐర్లాండ్‌తోనే పాక్‌ (జూన్ 16న) కూడా తన చివరి మ్యాచ్‌లో తలపడనుంది. కాబట్టి పాక్‌ భవితవ్యంపై స్పష్టత రావాలంటే ఇర్లాండ్ మ్యాచ్​ వరకు ఆగాల్సిందే. ఒకవేళ జూన్ 14న జరిగే మ్యాచ్‌ వర్షం కారణంగా రద్దైనా లేదా యూఎస్‌ఏ గెలిచినా పాక్‌ ఇంటిముఖం పట్టినట్లే! అనంతరం తన చివరి మ్యాచ్‌లో విజయం సాధించినా ఓడిపోయినా పెద్ద తేడా ఏమీ ఉండదు.

కెనడా టీమ్​ : ఈ టీమ్​కు టెక్నికల్​గా ఛాన్స్ ఉంది. తన చివరి మ్యాచ్‌లో టీమ్​ఇండియాతో తలపడనుంది. ఇందులో భారీ విజయం అందుకుని -0.493 నెట్‌రన్‌రేట్‌ను +0.127కైనా తీసుకెళ్లాలి. కానీ ఇది జరగడం కష్టమే. పైగా మ్యాచ్​కు వర్షం ముప్పు కూడా ఉంది.

ఐర్లాండ్‌ జట్టు : ఐర్లాండ్‌ చేతిలో రెండు జట్ల సూపర్ - 8 అవకాశాలు ఉన్నాయి. యూఎస్‌ఏతో జూన్ 14, పాకిస్థాన్​తో జూన్ 16న ఐర్లాండ్‌ పోటీపడనుంది. ఇప్పటికే రెండు మ్యాచుల్లో పరాజయాన్ని అందుకున్న ఐర్లాండ్‌ ఇప్పుడు జరగబోయే రెండు మ్యాచుల్లో గెలిచినా సూపర్ 8కు వెళ్తుందే భరోసా లేదు. ఆ జట్టు నెట్‌రన్‌రేట్ (-1.712) చాలా తక్కువగా ఉంది. ఒకవేళ ముందుకు వెళ్లాలంటే భారీ విజయాలను నమోదు చేస్తేనే కాస్త ఛాన్స్‌ ఉంటుందేమో.