T20 World Cup 2024 Women: 2024 మహిళల టీ20 వరల్డ్కప్ షెడ్యూల్ ఆదివారం రీలీజైంది. ఈ టోర్నీ లాంఛ్ ఈవెంట్కు బంగ్లాదేశ్ ప్రధాని షేక్ హసీన చీఫ్ గెస్ట్గా హాజరై మ్యాచ్ల షెడ్యూల్ రిలీజ్ చేశారు. ఆమెతోపాటు బంగ్లాదేశ్ మహిళా క్రికెట్ టీమ్ కెప్టెన్ నిగర్ సుల్తానా, టీమ్ఇండియా కెప్టెన్ హర్మన్ప్రీత్ కౌర్ ఈ ఈవెంట్లో పాల్గొన్నారు. ఈ ప్రతిష్ఠాత్మక టోర్నమెంట్కు బంగ్లాదేశ్ ఆతిథ్యమివ్వనుంది. ఢాకా, సిల్హెట్ స్టేడియాల్లో ఈ మ్యాచ్లు జరగనున్నాయి.
అక్టోబర్ 03 నుంచి 20 వరకు ఈ టోర్నీ జరగనుంది. 17, 18 తారీఖుల్లో సెమీస్, 20న ఫైనల్ మ్యాచ్ జరగనుంది. ఇక సెమీఫైనల్, ఫైనల్ మ్యాచ్లకు రిజర్వ్ డే ఉన్నట్లు ఐసీసీ తెలిపింది. ఈ టోర్నీలో 10 జట్లు పాల్గొనున్నాయి. అస్ట్రేలియా, భారత్, న్యూజిలాండ్, పాకిస్థాన్, సౌతాఫ్రికా, ఇంగ్లాండ్, వెస్టిండీస్, బంగ్లాదేశ్ జట్లు నేరుగా టోర్నీకి అర్హత సాధించగా, మరో రెండు స్థానాల కోసం క్వాలిఫయర్ మ్యాచ్లు జరగనున్నాయి.
ఈ 10 జట్లను రెండు గ్రూపులుగా విభజించారు. ఒక్కో జట్టు తమ గ్రూపులోని మిగిలిన నాలుగు టీమ్స్తో ఒక్కోమ్యాచ్ ఆడతాయి. ఆక్టోబర్ 3న ఇంగ్లాండ్- సౌతాఫ్రికా మ్యాచ్తో టోర్నీ ప్రారంభం కానుంది. ఈ నేపథ్యంలో అక్టోబర్ 6న భారత్- పాకిస్థాన్ మ్యాచ్ జరగనుంది. ఈ మ్యాచ్కు సిల్హెట్ మైదానం ఆతిథ్యమివ్వనుంది. ఇక 19 రోజులపాటు సాగే టోర్నీలో మొత్తం 23 మ్యాచ్లు జరగనున్నాయి. లీగ్ స్టేజ్ మ్యాచ్ల అనంతరం రెండు గ్రూప్ల్లో టాప్-2లో ఉన్న జట్లు సెమీస్కు అర్హత సాధిస్తాయి.
- గ్రూప్ A (ఆస్ట్రేలియా, భారత్, న్యూజిలాండ్, పాకిస్థాన్, క్వాలిఫయర్ 1)
- గ్రూప్ B (సౌతాఫ్రికా, ఇంగ్లాండ్, వెస్టిండీస్, బంగ్లాదేశ్, క్వాలిఫయర్ 2)
మధ్యాహ్నం మ్యాచ్ 3.00 PM, సాయంత్రం మ్యాచ్లు 7.00PM గంటలకు ప్రారంభమౌతాయి.
హాట్ ఫేవరెట్గా భారత్: టీమ్ఇండియా మరోసారి టైటిల్ ఫేవరెట్గా బరిలోకి దిగనుంది. 2020లో ఫైనల్దాకా వెళ్లిన టీమ్ఇండియా ఆస్ట్రేలియా చేతిలో భంగపడింది. ఇక గతేడాది జరిగిన టోర్నీలో సెమీస్లోనే టీమ్ఇండియా ఇంటిబాట పట్టింది. దీంతో ఇప్పటివరకు పొట్టికప్ ఛాంపియన్గా నిలవని భారత్ ఈసారి టైటిల్ సాధించాలన్న పట్టుదలతో ఉంది.
ఆసీస్దే పైచేయి: ఇక ఇప్పటివరకు 8సార్లు వరల్డ్కప్ జరగ్గా ఆస్ట్రేలియా అత్యధికంగా 6సార్లు ఛాంపియన్ (2010, 2012, 2014, 2018, 2020, 2023)గా నిలిచింది. 2016లోనూ ఫైనల్ చేరిన ఆసీస్ తుదిపోరులో వెస్టిండీస్ చేతిలో ఓడింది. ఇక 2009లో ఇంగ్లాండ్, 2016లో విండీస్ టైటిల్ సాధించాయి.
ఫైనల్లో టీమ్ఇండియా ఓటమి.. సిల్వర్ సాధించిన మహిళల జట్టు
ఆసీస్ కెప్టెన్ చేసిన పనికి భారత జట్టు ఫైర్ - హర్మన్కు అంత కోపం వచ్చిందా!
