వరుసగా 6 విజయాలు- అయినా సెమీస్ బెర్త్ డౌటే!- పాపం సఫారీలు - T20 world cup 2024

South Africa T20 World Cup Semi Final: 2024 టీ20 ప్రపంచకప్​లో సౌతాఫ్రికా అజేయంగా దూసుకుపోతోంది. ఈ టోర్నీలో అందరికంటే అత్యధికంగా వరుసగా 6 విజయాలు నమోదు చేసింది. అయినప్పటికీ సఫారీలకు సెమీస్ బెర్తు డౌట్​గానే ఉంది. అదెలాగంటే?

South Africa T20 World Cup Semi Final: 2024 టీ20 ప్రపంచకప్​లో సౌతాఫ్రితా జట్టు వరుస విజయాలతో అజేయంగా దూసుకుపోతోంది. గ్రూప్​ స్టేజ్​లో అదరగొట్టిన సఫారీ జట్టు సూపర్- 8లోనూ అదే జోరు కొనసాగిస్తోంది. తాజాగా ఇంగ్లాండ్​తో జరిగిన మ్యాచ్​లోనూ సఫారీలు సూపర్ విక్టరీ కొట్టారు. ఓ దశలో చేజారిపోయిన మ్యాచ్​ను, పట్టువదలకుండా పోరాడి విజయం అందుకున్నారు. దీంతో సూపర్- 8లో ఆడిన రెండు మ్యాచ్​ల్లో రెండు విజయాలతో గ్రూప్ 2లో టాప్​ పొజిషన్​కు చేరింది. ఇక సఫారీ జట్టుకు సెమీస్ బెర్తు దాదాపు ఖాయమైనట్లే అని అంతా భావించారు. కానీ, ఇక్కడే ఓ ట్విస్ట్ జరిగింది. ఇప్పటికీ సఫారీలకు సెమీస్ బెర్తు కాస్త సందేహంగానే ఉంది. అదెలాగంటే?

ప్రస్తుత టోర్నీలో ఆడిన 6 మ్యాచ్​లకు ఆరింట్లోనూ విజయాలు నమోదు చేసిన సఫారీలకు సెమీస్ బెర్త్​ అంత ఈజీగా కనిపించడం లేదు. తాజాగా ఇంగ్లాండ్​పై నెగ్గిన సౌతాఫ్రికా దాదాపు సెమీస్ బెర్తు కన్ఫార్మ్ చేసుకుంది. కానీ, కొన్ని గంటల్లోనే సమీకణాలు మారాయి. శనివారం ఉదయం అమెరికాతో జరిగిన మ్యాచ్​లో వెస్టిండీస్ భారీ విజయం నమోదు చేసింది. ఫలితంగా విండీస్ రన్​రేట్​ మెరుగైంది. దీంతో సూపర్- 8 గ్రూప్-2లో 4 పాయింట్లతో సౌతాఫ్రికా (+0.62) టాప్​లో ఉండగా విండీస్ (+1.81), ఇంగ్లాండ్ (+0.41) రెండూ కూడా 2 పాయింట్లతో రెండు, మూడు స్థానాల్లో ఉన్నాయి. దీంతో గ్రూప్​-2లో ఈ మూడు జట్ల మధ్య సెమీస్ రేస్ ఆసక్తికరంగా మారింది.

అయితే సూపర్- 8లో ఈ మూడు జట్లు తలో మ్యాచ్ ఆడాల్సి ఉంది. సౌతాఫ్రికా తన తదుపరి మ్యాచ్​లో వెస్టిండీస్​ను ఢీకొట్టనుంది. ఆతిథ్య విండీస్ జట్టు ఈ మ్యాచ్​ను అంత తేలిగ్గా తీసుకునే ఛాన్స్ లేదు. ఇరుజట్ల మధ్య గట్టిపోటీ ఉండనుంది. సెమీస్ చేరాలంటే విండీస్​కు ఈ మ్యాచ్​లో నెగ్గడం చాలా ముఖ్యం. ఒకవేళ వెస్టిండీస్​ నెగ్గితే 4 పాయింట్లతోపాటు ఎక్కువ రన్​రైట్ ఉన్నందున పట్టికలో సౌతాఫ్రికా కంటే మెరుగైన ప్లేస్​కు చేరుకుంటుంది.

ఇక ఇంగ్లాండ్ తన తదుపరి మ్యాచ్ అమెరికాతో ఆడాల్సి ఉంది. ఇంగ్లాండ్​కు ఇది చావోరేవో మ్యాచ్​. ఈ మ్యాచ్​లో ఇంగ్లాండ్ భారీ తేడాతో విజయం సాధిస్తే సౌతాఫ్రికా కంటే మెరుగైన రన్​రేట్ వస్తుంది. ఈ లెక్కన సౌతాఫ్రికాపై విండీస్, అమెరికాపై ఇంగ్లాండ్ నెగ్గితే సఫారీ జట్టు మూడో స్థానానికి పడిపోతుంది. దీంతో టోర్నీ నుంచి నిష్క్రమించాల్సి వస్తుంది. ఇలా జరగడం అసాధ్యమేమీ కాదు. అందుకే ఈ సమీకరణాలతో సౌతాఫ్రికా సెమీస్ బెర్తు ఇంకా వెయిటింగ్​లోనే ఉన్నట్లు కనిపిస్తోంది.

అదొక్కటే దారి!
అయితే ఎలాంటి సమీకరణాలపై ఆధారపడకుండా సౌతాఫ్రికా సెమీస్ చేరాలంటే వెస్టిండీస్​తో మ్యాచ్​లో కచ్చితంగా నెగ్గాల్సిందే. ఈ మ్యాచ్​లో నెగ్గితే సమీకరణాలతో ఎలాంటి పనిలేకుండా సఫారీ జట్టు నేరుగా సెమీఫైనల్​కు చేరుతుంది. మరో మ్యాచ్​లో ఇంగ్లాండ్ ఎంత భారీ తేడాతో గెలిచిన సఫారీ సెమీస్ బెర్తుకు ఎలాంటి ప్రమాదం ఉండదు. వాస్తవానికి సెమీస్ చేరేందుకు గ్రూప్- 2లో సఫారీ జట్టుకే కాస్త అవకాశాలు ఎక్కువగా ఉన్నా, ఏం జరుగుతుందో అనేది చూడాలి.

• The Proteas have clinched a thriller 🤩🇿🇦
  
  A remarkable bowling effort helps South Africa stay unbeaten in the #T20WorldCup 2024 🔥#ENGvSA | 📝: https://t.co/hLsLlWlzNo pic.twitter.com/RSRqqnwMXf

  — T20 World Cup (@T20WorldCup) June 21, 2024