Shahbaz Nadeem Retirement: టీమ్ఇండియా ఆటగాడు షాదాబ్ నదీమ్ అంతర్జాతీయ క్రికెట్కు గుడ్బై చెప్పాడు. మూడు ఫార్మాట్లతో పాటు ఫస్ట్ క్లాస్ క్రికెట్ నుంచి కూడా తప్పుకుంటున్నట్లు నదీమ్ తెలిపాడు. ఈ మేరకు సోషల్ మీడియాలో పోస్ట్ షేర్ చేశాడు. దీంతో దాదాపు 2 దశాబ్దాలపాటు సాగిన నదీమ్ కెరీర్ జర్నీ ముగిసినట్లైంది. తన కెరీర్లో సహకరించి అవకాశాలు కల్పించిన బీసీసీఐ, ఝూర్ఖండ్ క్రికెట్ అసోసియేషన్, టీమ్మేట్స్, కోచ్కు కృతజ్ఞతలు తెలిపాడు. ముఖ్యంగా తన మొదటి కోచ్ ఇమ్తియాజ్ హుస్సెన్కు ప్రత్యేక ధన్యవాదాలు తెలిపాడు. తన సుదీర్ఘ కెరీర్లో కుటుంబ సభ్యులు ఎంతగానో ప్రాత్సహించారని నదీమ్ ఈ సందర్భంగా గుర్తుచేసుకున్నాడు.
నదీమ్కు డొమెస్టిక్లో ఘనమైన రికార్డ్ ఉంది. 2004లో ఫస్ట్ క్లాస్ క్రికెట్లో అరంగేట్రం చేసిన నదీమ్కు 2019లో టీమ్ఇండియా పిలుపు అందింది. 2019లో సౌతాఫ్రికాతో జరిగిన టెస్టుతో ఇంటర్నేషనల్ కెరీర్ ప్రారంభించిన నదీమ్ 2టెస్టుల్లో 8 వికెట్లు పడగొట్టాడు. 2015- 16 (51 వికెట్లు), 2016- 17 (55 వికెట్లు) రెండు సీజన్లలో రంజీలో అత్యధిత వికెట్లు పడగొట్టిన బౌలర్గా నిలిచాడు. ఇక లిస్ట్ A కెరీర్లో 134 మ్యాచ్లు ఆడిన నదీమ్ 175 వికెట్లు కూల్చాడు. 2018- 19 సీజన్ విజయ్ హరారే ట్రోఫీలో అత్యుత్తమ ప్రదర్శన కనబర్చిన నదీమ్ 24 వికెట్లు దక్కించుకున్నాడు. ఇక ఇదే సీజన్లో లిస్ట్- Aలో అత్యుత్తమ బౌలింగ్ గణాంకాలు నమోదు చేశాడు. రాజస్థాన్తో జరిగిన మ్యాచ్లో 10 పరుగులిచ్చి 8 వికెట్లు పడగొట్టి రికార్డ్ సాధించాడు.
ఇక 2011లో ఐపీఎల్లో దిల్లీ డేర్డెవిల్స్ (ఇప్పటి దిల్లీ క్యాపిటల్స్) తరఫున అరంగేట్రం చేశాడు. 2011- 2018 మధ్యలో దిల్లీ, 2019- 2021 సీజన్లలో సన్రైజర్స్ హైదరాబాద్, 2021- 2023లో లఖ్నవూ సూపర్ జెయింట్స్ ఫ్రాఛైంజీలకు ప్రాతినిధ్యం వహించాడు. ఐపీఎల్లో 72 మ్యాచ్లు ఆడిన నదీమ్ 48 వికెట్లు పడగొట్టాడు. కానీ, గత రెండు సీజన్లలోనూ బరిలోకి దిగని నదీమ్ 2021లో రాయల్ ఛాలెంజర్స్ బెంగళూరుతో ఐపీఎల్లో చివరి మ్యాచ్ ఆడాడు.
