Saurabh Netravalkar: 2024 టీ20 వరల్డ్కప్లో అమెరికాకు ప్రాతినిధ్యం వహించిన సౌరభ్ నేత్రావల్కర్ తన అద్భుత ప్రదర్శనతో ఆకట్టుకున్నాడు. ఈ టోర్నమెంట్లో పాకిస్థాన్పై విజయంలో కీలక పాత్ర పోషించి వెలుగులోకి వచ్చాడు. వృత్తి రిత్యా సాఫ్ట్వేర్ ఇంజినీరైన సౌరభ్ తనకు క్రికెట్ అంటే ఎంతో ఇష్టమని గతంలోనే పలుమార్లు చెప్పాడు. అలా ప్రొఫెషన్, క్రికెట్ను బ్యాలెన్స్ చేస్తూ ప్రశంసలు పొందుతున్నాడు.
అయితే తాను బీటెక్లో ఉండగా క్రికెట్ కోసం సెమిస్టర్ ఎగ్జామ్స్ వదిలేసిన సందర్భాన్ని సౌరభ్ గుర్తుచేసుకున్నాడు. 2010 అండర్ 19 ప్రపంచకప్లో టీమ్ఇండియాకు ఎంపికైన సౌరభ్, ఆ సంవత్సరం నాలుగు పరీక్షలు రాయకుండా వదిలేసినట్లు చెప్పాడు. దీంతో ఆ తర్వాతి సెమిస్టర్లో వరుసగా 10 పరీక్షలు రాయాల్సి వచ్చిందని సౌరభ్ గుర్తుచేసుకున్నాడు.
'2010 అండర్ 19 వరల్డ్కప్ సమయంలో నేను ఇంజినీరింగ్ మొదటి సంవత్సరం చదువుతున్నాను. ఆ వరల్డ్కప్కు నేను భారత్ జట్టుకు ఎంపికయ్యా. అయితే నా ఫస్ట్ సెమిస్టర్ ఎగ్జామ్స్, అండర్ 19 వరల్డ్కప్ ఒకేసారి వచ్చాయి. దీంతో వరల్డ్కప్ ఆడడం కోసం ఫస్ట్ సెమిస్టర్లో ఆరింట్లో నాలుగు పరీక్షలు రాయలేదు. అయితే ఆ సంవత్సరం రెండు ఎగ్జామ్స్ రాయడం వల్ల డిటెన్షన్ నుంచి తప్పించుకున్నా. దీంతో ఆ తర్వాతి సెమిస్టర్లో వరుసగా 10 పరీక్షలు రాయాల్సి వచ్చింది. అయితే అప్పుడు టోర్నమెంట్లు లేనందున అన్ని ఎగ్జామ్స్ రాసేశాను. అలా అప్పట్నుంచే ఒకదానికోసం మరొకటి త్యాగం చేయడం అలవాటైంది. కానీ, నేను చదువు, క్రికెట్ రెండింటినీ ఇష్టపడతా. ఈ రెండూ నాకు ఇష్టమే' అని సౌరభ్ తాజాగా చెప్పుకొచ్చాడు.
కాగా, నేత్రవల్కర్ ప్రస్తుతం ఆమెరికాలో సాఫ్ట్వేర్ ఉద్యోగం చేస్తున్నాడు. అటు ప్రొఫెషన్, ఇటు ప్యాషన్ రెండింటిన బ్యాలెన్స్ చేస్తూ కెరీర్లో రాణిస్తున్నాడు. 2024 టీ20 ప్రపంచకప్లో పాకిస్థాన్పైనే కాకుండా టీమ్ఇండియాతో మ్యాచ్లోనూ సత్తా చాటాడు. ఏకంగా కెప్టెన్ రోహిత్ శర్మ, విరాట్ కోహ్లీ వికెట్లు పడగొట్టి అదరగొట్టాడు. ఇక నేత్రవల్కర్ 2019లో అరంగేట్రం చేశాడు. ఇప్పటివరకు 48 వన్డేల్లో 73 వికెట్లు పడగొట్టాడు. టీ20ల్లో 33మ్యాచ్ల్లో 33 వికెట్లు దక్కించుకున్నాడు.
USA స్టార్ సౌరభ్ లవ్ స్టోరీ- అతడి భార్య తెలుగమ్మాయా? - Saurabh Netravalkar Love Story
