Rohith On Ashwin Retirement : టీమ్ ఇండియా ఆల్రౌండర్ రవిచంద్రన్ అశ్విన్ రిటైర్మెంట్పై రోహిత్ శర్మ కీలక వ్యాఖ్యలు చేశాడు. పెర్త్ టెస్టు సమయంలోనే అశ్విన్ రిటైర్మెంట్ గురించి నిర్ణయం తీసుకున్నాడని తెలిపాడు. అశ్విన్ ఆటకు గుడ్ బై చెప్పడం వెనుక అనేక కారణాలు ఉన్నాయని పేర్కొన్నాడు.
'ఆయన వ్యక్తిగతం- దాన్ని గౌరవిస్తాం'
"నేను పెర్త్కు వచ్చినప్పుడు అశ్విన్ తన రిటైర్మెంట్ గురించి చెప్పాడు. నేను అతడిని కనీసం పింక్‌ బాల్ టెస్టులో ఆడాలని ఒప్పించాను. రిటైర్మెంట్ విషయంలో అశ్విన్ తీసుకున్న నిర్ణయం వ్యక్తిగతం. దానిని గౌరవిస్తాం. అన్నింటికీ అశ్వినే సమాధానం ఇస్తాడు. జట్టుకు ఏది అవసరమో అశ్విన్కు తెలుసు. మేం ఎలాంటి కాంబినేషన్‌ ఆలోచిస్తున్నామనే దానిపైనా అశ్విన్కు అవగాహన ఉంది. తనకు ఛాన్స్ రానప్పుడు ఆటకు గుడ్‌బై చెప్పేస్తే బాగుంటుందని అని అశ్విన్ అనుకొని ఉండొచ్చు." అని రోహిత్ శర్మ వ్యాఖ్యానించాడు.
'అశ్విన్ తో ప్రయాణంలో ఎన్నో అనుభవాలు'
అశ్విన్‌తో కలిసి చాలా క్రికెట్ ఆడానని రోహిత్ తెలిపాడు. అండర్ -17 స్థాయి నుంచి అశ్విన్ తెలుసని, తొలుత ఓపెనర్గా వచ్చేవాడని పేర్కొన్నాడు. "చాలా రోజులు మాయమైపోయాడు. కొన్నేళ్లకు తమిళనాడు తరఫున ఓ బౌలర్‌ ఐదు వికెట్ల ప్రదర్శన చేశాడని విన్నాను. తీరా చూస్తే ఆ 5 వికెట్ హాల్ తీసింది అశ్వినే. బ్యాటర్‌గా వచ్చిన అతడు బౌలర్‌గా ఎలా మారిపోయాడని అని ఆశ్చర్యపోయాను. మేం మళ్లీ అంతర్జాతీయ క్రికెట్‌లో సుదీర్ఘకాలం పాటు కలిసి ఆడాం. అతడితో ఈ ప్రయాణంలో ఎన్నో అనుభవాలు ఉన్నాయి. జట్టు విజయాల్లో ఆశ్విన్ కీలక పాత్ర పోషించాడు. ఇప్పుడు ఆటకు గుడ్ బై చెప్పాడు." అని రోహిత్ వ్యాఖ్యానించాడు.
రాబోయే తరాలు నీ గురించి చెప్పుకుంటాయ్!
"ఒక యువ బౌలర్‌ నుంచి ఆధునిక క్రికెట్ లెజెండ్గా నువ్వు ఎదిగిన తీరును దగ్గరుండి చూశా. దాన్ని నేను ప్రపంచానికి చెప్పలేకపోవచ్చు. కానీ, అశ్విన్ను చూసే నేను బౌలర్‌గా మారానని రాబోయే తరాల బౌలర్లు తప్పకుండా చెబుతారని నాకు తెలుసు"
- టీమ్ ఇండియా హెడ్‌ కోచ్‌ గౌతమ్‌ గంభీర్‌
'మీ తదుపరి అధ్యాయానికి ఆల్ ది బెస్ట్ అశ్విన్'
అశ్విన్ మీ అద్భుతమైన క్రికెట్ ప్రయాణానికి అభినందనలు. మీరు బౌలింగ్లో స్లిప్లో ఫీల్డింగ్ చేస్తున్నప్పుడు నీరసపడిన క్షణం లేదు. మీ తదుపరి అధ్యాయానికి ఆల్ ది బెస్ట్!
-- అజింక్యా రహానే, క్రికెటర్
యాష్ భారత క్రికెట్కు మీరు ఎనలేని సేవలు అందించారు. మీ అంకితభావం, సహకారం, సుదీర్ఘ కాలం పాటు గుర్తుండిపోతుంది. దేశానికి ప్రాతినిధ్యం వహించిన అత్యుత్తమ వ్యక్తులలో ఒకరిగా చరిత్రలో నిలిచిపోతారు.
-- ఛతేశ్వర్ పుజారా, టీమ్ ఇండియా క్రికెటర్
గోట్గా అభివర్ణించిన కార్తీక్
అలాగే అశ్విన్ను టీమ్ ఇండియా మాజీ క్రికెటర్ ప్రశంసలతో ముంచెత్తారు. యాష్ ను గ్రేటెస్ట్ ఆఫ్ ఆల్ టైమ్ (గోట్)గా అభివర్ణించారు.
ఐసీసీ టెస్ట్ ర్యాంకింగ్స్! - రిటైర్మెంట్ తర్వాత అశ్విన్ ఏ పొజిషన్లో ఉన్నాడంటే?
