ఆర్సీబీపై లఖ్​నవూ విజయం- ఓడినా విరాట్, డీకే ఖాతాలో పలు రికార్డులు! - RCB vs LSG IPL 2024 Records

RCB vs LSG IPL 2024: 2024 ఐపీఎల్​లో మంగళవారం చిన్నస్వామి వేదికగా జరిగిన మ్యాచ్​లో ఆర్సీబీపై లఖ్​నవూ 28 పరుగుల తేడాతో నెగ్గింది. ఈ మ్యాచ్​లో నమోదైన పలు రికార్డులు మీకోసం.

RCB vs LSG IPL 2024: 2024 ఐపీఎల్​లో లఖ్​నవూ సూపర్ జెయింట్స్ వరుసగా రెండో విజయం నమోదు చేసింది. మంగళవారం చిన్నస్వామి వేదికగా రాయల్ ఛాలెంజర్స్ బెంగళూరుతో జరిగిన మ్యాచ్​లో లఖ్​నవూ 28 పరుగుల తేడాతో విజయం సాధించింది. తొలుత బ్యాటింగ్ చేసిన లఖ్​నవూ నిర్ణీత 20ఓవర్లలో 5 వికెట్ల నష్టానికి 181 పరుగులు చేసింది. స్టార్ బ్యాటర్ క్వింటన్ డికాక్ (81 పరుగులు) హఫ్ సెంచరీతో అదరగొట్టగా, నికోలస్ పూరన్ (40* పరుగులు) మెరుపులతో లఖ్​నవూ భారీ స్కోర్ సాధించింది.

అనంతరం లక్ష్య ఛేదనలో ఆర్సీబీ 153 పరుగులకే ఆలౌటైంది. మహిపాల్ లొమ్రోర్ (33 పరుగులు) రాణించగా, విరాట్ కోహ్లీ (22), రజత్ పాటిదార్ (29) ఫర్వాలేదనిపించారు. లఖ్​నవూ బౌలర్లలో మయంక్ యాదవ్ 3, నవీనుల్ హక్ 2, మణిమరన్ సిద్ధార్థ్ , యశ్ ఠాకూర్, మార్కస్ స్టాయినిస్ తలో వికెట్ దక్కించుకున్నారు. ఈ క్రమంలో మ్యాచ్​లో పలు రికార్డులు నమోదయ్యాయి. ఆ రికార్డులేంటంటే?

ఈ మ్యాచ్​లో నమోదైన రికార్డులు

• లఖ్​నవూ బ్యాటర్ క్వింటన్ డికాక్ ఈ మ్యాచ్​తో 3వేల ఐపీఎల్​ పరుగులు పూర్తి చేసుకున్నాడు. ప్రస్తుతం డికాక్ 99 ఇన్నింగ్స్​ల్లో 3046 పరుగులతో కొనసాగుతున్నాడు. ఇందులో 2 సెంచరీలు ఉన్నాయి.
• ఆర్సీబీ ప్లేయర్ దినేశ్ కార్తిక్ ఈ మ్యాచ్​తో ఓ అరుదైన ఘనత సాధించాడు. అతడు టీ20ల్లో 300వ మ్యాచ్​లు పూర్తి చేసుకున్నాడు. దీంతో ఈ ఘనత సాధించిన ఏకైక క్రికెటర్​గా నిలిచాడు.
• స్టార్ బ్యాటర్ విరాట్ కోహ్లీ కూడా ఓ ఘనత సాధించాడు. టీ20ల్లో ఒకే వేదికలో 100 మ్యాచ్​లు ఆడిన క్రికెటర్​గా నిలిచాడు. విరాట్ టీ20ల్లో ఇప్పటివరకూ బెంగళూరు చిన్నస్వామి స్టేడియంలో 100 మ్యాచ్​లు ఆడాడు.
• ఇక ఇదే మ్యాచ్​లో కోహ్లీ ఓ చెత్త రికార్డ్ అందుకున్నాడు. ఈ మ్యాచ్​లో డెబ్యూ ప్లేయర్ సిద్ధార్థ్​ విరాట్​ను పెవిలియన్ చేర్చాడు. దీంతో ఐపీఎల్​లో పదిసార్లు (10) అరంగేట్ర బౌలర్​కు వికెట్ సమర్పించుకున్నాడు. ఈ లిస్ట్​లో పార్దీవ్ పటేల్ (13సార్లు), ఏబీ డివిలియర్స్ (11సార్లు) ముందున్నారు.
• గ్లెన్ మ్యాక్స్​వెల్ ఈ మ్యాచ్​లో డకౌట్ అయ్యాడు. దీంతో ఐపీఎల్​లో అత్యధిక సార్లు (16) డకౌటైన లిస్ట్​లో రెండో ప్లేస్​లో కొనసాగుతున్నాడు. ఈ జాబితాలో రోహిత్ శర్మ, దినేశ్ కార్తిక్ (17)టాప్​లో ఉన్నారు.
• లఖ్​నవూ పేసర్ మయంక్ యాదవ్ ఈ ఐపీఎల్​లో వరుసగా రెండు మ్యాచ్​ల్లో 3+ వికెట్లు పడగొట్టాడు. అరంగేట్ర ఐపీఎల్​లో తొలి రెండు మ్యాచ్​ల్లో ఈ ఘనత సాధించిన ఆరో బౌలర్​గా మయంక్ రికార్డు కొట్టాడు. అతడి కంటే ముందుగా లసిత్ మలింగ, అమిత్ మిశ్రా, మయంక్ మార్కండే, కూపర్, జోఫ్రా ఆర్చర్ ఈ ఘనత సాధించారు.