సింధు ఈజ్ బ్యాక్- 2022 తర్వాత తొలి టైటిల్

సయ్యద్‌ మోదీ బ్యాడ్మింటన్ టోర్నీలో సింధు విజయం- కిరీటం దక్కించుకున్న స్టార్ షట్లర్

PV Sindhu Syed Modi Badminton : సయ్యద్‌ మోదీ అంతర్జాతీయ సూపర్‌ 300 టోర్నీ సింగిల్స్​లో భారత అగ్రశ్రేణి షట్లర్ పి.వి.సింధు ఛాంపియన్​గా నిలిచింది. టోర్నీలో భాగంగా ఆదివారం జరిగిన ఫైనల్​లో వు లియో (చైనా)తో తలపడ్డ సింధు 21-14, 21-16 తేడాతో నెగ్గింది. తుదిపోరులో జోరు ప్రదర్శించిన సింధు వరుస సెట్లలో నెగ్గి టైటిల్ దక్కించుకుంది. అంతకుముందు సింధు సెమీస్​లో భారత్‌కే చెందిన 17 ఏళ్ల ఉన్నతి హుడాపై విజయం సాధించింది. హుడాపై సింధు 21-12, 21-9తో తేడాతో నెగ్గింది.

కాగా, కెరీర్​లో సయ్యద్‌ మోదీ టైటిల్ నెగ్గడం సింధుకు ఇది మూడోసారి. ఇదివరకు ఆమె 2017, 2022 టైటిల్ గెలుపొందింది. ఇక గత రెండేళ్లలో సింధుకు ఇది తొలి టైటిల్. ఆమె చివరిసారిగా 2022 సింగపుర్ ఓపెన్ టైటిల్ నెగ్గింది. ఆ తర్వాత 2023లో స్పెయిన్ మాస్టర్స్ 300, 2024లో మలేసియా మాస్టర్స్ 500 టోర్నీల్లో ఫైనల్​కు చేరినప్పటికీ టైటిల్ పోరులో సింధు ఓడింది. ఈ టోర్నీ విజయంతో ఆమె ఉత్సాహం రెట్టింపు అయినట్లే!

PV Sindhu 🇮🇳 is Champion of Syed Modi 🏸 Championship 2024
Sindhu 🇮🇳 Defeated WU Luo Yu 🇨🇳 (21-14,21-16) to win her 3rd Syed Modi Title !!
1st Title after Singapore Open 2022 !!
Congratulations @Pvsindhu1 for coming back to Top of podium once again !!#SyedModi2024 pic.twitter.com/x3j5i2doOk

— Navin Mittal (@Navinsports) December 1, 2024

వీళ్లూ గెలుపొందారు

• మరోవైపు పురుషుల సింగిల్స్‌లో లక్ష్యసేన్‌ కూడా ఫైనల్‌లో గెలుపొందాడు. సింగపూర్‌కు చెందిన జియా హెంగ్‌ జేసన్‌ తేపై 21-6, 21-7తో విజయం సాధించాడు.
• మహిళల డబుల్స్‌లో గాయత్రి గోపీచంద్‌- ట్రీసా జాలీ జోడీ అదరగొట్టింది. ఫైనల్‌లో 21-18, 21-11 తేడాతో బావో లి జింగ్, లీ కియాన్‌ (చైనా) జోడీపై వరుస గేమ్‌ల విజయం సాధించి టైటిల్‌ను కైవసం చేసుకుంది. గాయత్రి- ట్రీసా జోడీకిది తొలి సూపర్ 300 టైటిల్‌ కావడం విశేషం. ఈ టోర్నీలో టైటిల్‌ను గెలిచిన తొలి భారత మహిళల డబుల్స్ జోడీగా రికార్డు సృష్టించింది. ఈ జోడీ 2022 ఎడిషన్‌లో రన్నరప్‌గా నిలిచింది.

వీళ్లకు నిరాశే!

• మిక్స్‌డ్‌ డబుల్స్‌, పురుషుల డబుల్స్‌లో భారత్‌కు నిరాశ ఎదురైంది. మిక్స్‌డ్‌ డబుల్స్‌ ఫైనల్‌లో అయిదో సీడ్‌ తనీషా- ధ్రువ్‌ 21-18, 14-21, 8-21తో డెచాపోల్, డెచాపోల్ (థాయ్‌లాండ్‌) చేతిలో ఓడారు.
• పురుషుల డబుల్స్‌ ఫైనల్‌లో పృథ్వీ- ప్రతీక్‌ జోడీ పోరాడింది. 71 నిమిషాలపాటు సాగిన టైటిల్‌ పోరులో 14-21, 21-19, 17-21తో హువాంగ్ డి, లియు యాంగ్ (చైనా) ద్వయం భారత జోడీపై విజయం సాధించింది.