IPL First Match: క్రికెట్ ప్రపంచంలో ఇండియన్ ప్రీమియర్ లీగ్ (ఐపీఎల్) క్యాష్ రిచ్ లీగ్గా పేరొందింది. 2008లో సరిగ్గా ఇదే రోజున (ఏప్రిల్ 18) ప్రారంభమైన ఐపీఎల్ ప్రస్తుతం వరల్డ్లోనే ఫేమస్ డొమెస్టిక్ లీగ్గా మారింది. గత 16ఏళ్లుగా క్రికెట్ ప్రేమికులను ఎంటర్టైన్ చేస్తూ, ప్రతీ సీజన్లో అభిమానులను పెంచుకుంటూ పోతోంది.
ఇక 2008 ఏప్రిల్ 18న కోల్కతా నైట్రైడర్స్- రాయల్ ఛాలెంజర్స్ బెంగళూరు మధ్య పోరుతో ఈ ప్రతిష్ఠాత్మక టోర్నమెంట్కు తెర లేచింది. ఈ మ్యాచ్లో తొలుత బ్యాటింగ్ చేసిన కోల్కతా 20ఓవర్లలో 222 పరగుల భారీ స్కోర్ నమోదు చేసింది. కివీస్ బ్యాటర్ బ్రెండన్ మెక్కల్లమ్ ఈ మ్యాచ్లో విధ్వంసం సృష్టించాడు. 73 బంతుల్లో ఏకంగా 158 పరుగులతో భారీ సెంచరీ నమోదు చేశాడు. అనంతరం ఆర్సీబీ ఛేదనలో 82 పరుగులకే కుప్పకూలింది. దీంతో ఐపీఎల్ హిస్టరీలోనే కేకేఆర్ తొలి విజయం అందుకున్న జట్టుగా నిలిచింది.
ఇక తొలి ఏడాది నుంచి ప్రతీ సీజన్కు ఐపీఎల్పై ఆదరణ పెరిగింది. ఎందరో యువ క్రికెటర్ల ప్రతిభను ఐపీఎల్ ప్రపంచానికి పరిచయం చేసింది. ప్రపంచంలోని వివిధ దేశాలకు చెందిన అనేక మంది క్రికెటర్లు ఐపీఎల్లో ఆడారు. ఈ నేపథ్యంలోనే చాలామంది ప్లేయర్లు టీమ్ఇండియాలో సైతం ఎంట్రీ ఇచ్చారు. ఇక 2013 సీజన్లో స్పాట్ ఫిక్సింగ్ అంశం కాస్త ఆందోళన కలిగించినా ఈ ప్రభావం టోర్నీపై పడలేదు. ఇక 2015 తర్వాత రెండు సీజన్ (2016, 2017)లు పలు కారణాల వల్ల చెన్నై, రాజస్థాన్ ఫ్రాంచైజీలు నిషేధం ఎదుర్కొన్నాయి.
ఐపీఎల్లో జట్లు: తొలుత ఐపీఎల్ 8 జట్లతోనే ప్రారంభమైంది. ఆ తర్వాత అయా సీజన్లలో ఒకట్రెండు కొత్త జట్లు వచ్చి వెళ్లాయి. అలా కొచ్చి టస్కస్ కేరళ (2011), పుణె వారియర్స్ ఇండియా (2011, 2012), రైజింగ్ పుణె సూపర్ జెయింట్స్ (2016, 2017), గుజరాత్ లయన్స్ (2016, 2017) వచ్చి వెళ్లాయి. ఇక 2022 నుంచి లఖ్నవూ, గుజరాత్ కొత్తగా చేరాయి.
ఏడాది విజేత
- 2008- రాజస్థాన్
- 2009- డెక్కన్ ఛార్జర్స్
- 2010- చెన్నై సూపర్ కింగ్స్
- 2011- చెన్నై సూపర్ కింగ్స్
- 2012- కోల్కతా నైట్రైడర్స్
- 2013- ముంబయి ఇండియన్స్
- 2014- కోల్కతా నైట్రైడర్స్
- 2015- ముంబయి ఇండియన్స్
- 2016- సన్రైజర్స్ హైదరాబాద్
- 2017- ముంబయి ఇండియన్స్
- 2018- చెన్నై సూపర్ కింగ్స్
- 2019- ముంబయి ఇండియన్స్
- 2020- ముంబయి ఇండియన్స్
- 2021- చెన్నై సూపర్ కింగ్స్
- 2022- గుజరాత్ జెయింట్స్
- 2023- చెన్నై సూపర్ కింగ్స్
