India T20 World Cup Journey: 2024 టీ20 వరల్డ్కప్కు సమయం దగ్గర పడుతోంది. ఇప్పటిదాకా 8 ఎడినషన్లు ముగించుకున్న, మినీ టోర్నీ ఇప్పుడు 9వ సీజన్కు రెడీ అవుతోంది. ఈ టోర్నమెంట్కు అమెరికా, వెస్టిండీస్ దేశాలు ఆతిథ్యమివ్వనున్నాయి. తొలిసారి టోర్నీలో అత్యధికంగా 20 జట్లు పాల్గొననున్నాయి. ఈ 20 జట్లను నాలుగు గ్రూపులుగా విభజించి లీగ్ మ్యాచ్లు నిర్వహించనున్నారు.
అయితే 2007 తొలి ఎడిషన్లో ఛాంపియన్గా నిలిచిన భారత్ ఆ తర్వాత ఆడిన 7సీజన్లలో టైటిల్ నెగ్గలేకపోయింది. ఈ క్రమంలో భారత్ మరోసారి హాట్ ఫేవరెట్గా బరిలోకి దిగనుంది. ఇక 11ఏళ్లుగా భారత్కు అందని ద్రాక్షలా ఊరిస్తున్న ఐసీసీ ట్రోఫీని ఈసారి ఎలాగైన దక్కించుకోవాలన్న కసితో టీమ్ఇండియా రోహిత్ శర్మ సారథ్యంలో బరిలోకి దిగనుంది. మరి పొట్టి ప్రపంచకప్లో టీమ్ఇండియా జర్నీ గత ఎడిషన్లలో ఎలా సాగిందో మీకు తెలుసా?
- 2007లో ఛాంపియన్గా: ఐసీసీ తొలిసారి 2007లో టీ20 వరల్డ్కప్ నిర్వహించింది. ఎమ్ఎస్ ధోనీ కెప్టెన్సీలో బరిలోకి దిగిన టీమ్ఇండియా ఆ సీజన్లో అదరగొట్టింది. తొలి ఎడిషన్లోనే ఫైనల్కు చేరిన టీమ్ఇండియా తుదిపోరులో చిరకాల ప్రత్యర్థి పాకిస్థాన్లో తలపడింది. ఈ మ్యాచ్లో భారత్ 5 పరుగుల తేడాతో నెగ్గి పొట్టికప్ను సొంతం చేసుకున్న తొలి జట్టుగా రికార్డు కొట్టింది.
- 2009: డిఫెండింగ్ ఛాంపియన్ హోదాలో ఎన్నో అంచనాలతో రెండో ఎడిషన్ (2009)లో టీమ్ఇండియా బరిలోకి దిగింది. లీగ్ స్టేజ్లో తొలి రెండు మ్యాచ్ (బంగ్లాదేశ్, ఐర్లాండ్)ల్లో నెగ్గినా తర్వాత వరుసగా మూడు మ్యాచ్ల్లో (వెస్టిండీస్, ఇంగ్లాండ్, సౌతాఫ్రికా) ఓడి నాకౌట్కు చేరకుండానే ఇంటిబాట పట్టింది. ఈ సీజన్ ఫైనల్లో శ్రీలంకపై పాకిస్థాన్ నెగ్గింది.
- 2010: అయితే 2011లో వన్డే వరల్డ్కప్ నేపథ్యంలో మూడో ఎడిషన్ టీ20 చోర్నీని ఓ ఏడాది ముందే నిర్వహించారు. ఈ టోర్నీలో భారత్ తొలి రెండు మ్యాచ్ల్లో నెగ్గి, తర్వాత వరుసగా రెండు గేమ్లలో ఓడి సెమీస్కు చేరకుండానే నిష్క్రమించింది.
- 2012: గతేడాది వన్డే వరల్డ్కప్ నెగ్గిన జోష్లో 2012లో టీ20 ప్రపంచకప్ బరిలో దిగిన భారత్ తృటిలో సెమీస్ అవకాశాన్ని చేజార్చుకుంది. సూపర్ 8లో నాలుగింట మూడు మ్యాచ్ల్లో నెగ్గినా రన్రట్ కారణంగా సెమీస్ చేరలేదు. ఈ టోర్నీలో విండీస్ తొలిసారి కప్పు ముద్దాడింది.
- 2014: ఈ ఎడిషన్లో టీమ్ఇండియా అంచనాలకు తగ్గట్లు ప్రదర్శన చేసింది. లీగ్ స్టేజ్, సూపర్ 4లో రాణించి ఫైనల్కు దూసుకెళ్లింది. కానీ, తుదిపోరులో శ్రీలంకతో తడబడింది. తొలుత బ్యాటింగ్ చేసి కేవలం 130-4 స్కోర్ చేయగలిగింది. ఛేదనలో శ్రీలంక 17.5 ఓవర్లలో లక్ష్యాన్ని అందుకొని తొలిసారి పొట్టికప్ సాధించింది.
- 2016: 2016లోనూ భారత్ లీగ్ స్టేజ్లో అదరగొట్టింది. దూకుడుగా ఆడుతూ వరుస విజయాలతో సెమీస్ చేరింది. సెమీస్లో వెస్టిండీస్తో పోడిపడ్డ టీమ్ఇండియా తొలుత బ్యాటింగ్ చేసి 192-2 పరుగుల భారీ స్కోర్ నమోదు చేసింది. ఛేదనలో విండీస్ 19-2కే రెండు వికెట్లు కోల్పోయింది. దీంతో భారత్ గెలుపు ఖాయమని అనుకున్నారంతా. కానీ, లెండిల్ సిమన్స్ అద్భుత పోరాటం (82*)తో విండీస్ను ఫైనల్ చేర్చాడు.
- 2021: దాదాపు 5 ఏళ్ల తర్వాత జరిగిన టోర్నీలో భారత్ మరోసారి టైటిల్ ఫేవరెట్గా బరిలో దిగినా సెమీస్ చేరలేదు. 5మ్యాచ్ల్లో మూడు విజయాలు నమోదు చేసి పాయింట్ల పట్టికలో 3వ స్థానానికి పరిమితమైంది. దీంతో మరోసారి భారత్కు పరాభవం తప్పలేదు. సెమీస్కు చేరకుండానే నిష్క్రమించింది.
- 2022: ఆస్ట్రేలియా వేదికగా జరిగిన ఈ టోర్నీలో భారత్ సెమీస్కు అర్హత సాధించింది. అయితే సెమీ ఫైనల్లో ఇంగ్లాండ్తో జరిగిన మ్యాచ్లో టీమ్ఇండియా ఘోర పరాభవం మూటగట్టుకుంది. తొలుత బ్యాటింగ్ చేసిన టీమ్ఇండియా 168-6 స్కోర్ చేసింది. ఛేదనలో ఇంగ్లాండ్ ఒక్క వికెట్ కోల్పోకుండా టార్గెట్ అందుకుంది. దీంతో టీమ్ఇండియా ఫైనల్కు చేరకుండానే ఇంటిబాట పట్టింది.
అలా గత 8 ఎడిషన్లలో ఒకసారి టైటిల్ నెగ్గిన టీమ్ఇండియా ఓసారి ఫైనల్ (2014), రెండుసార్లు సెమీస్ (2016, 2022) చేరింది. ఇక రెండో టైటిల్ సాధించాలన్న ఆశయంతో భారత్ మరోసారి బరిలో దిగుతోంది. ఈ సీజన్లో జూన్ 5న ఐర్లాండ్తో భారత్ తమ తొలి మ్యాచ్ ఆడనుంది.
పొట్టికప్లో కోహ్లీయే టాప్ స్కోరర్- రోహిత్ ప్లేస్ ఎంతంటే? - T20 World Cup 2024
