రఫ్పాడించిన బుమ్రా- ఇంగ్లాండ్ 253 ఆలౌట్- 171 రన్స్​ లీడ్​లో భారత్

Ind vs Eng 2nd Test 2024: విశాఖపట్టణం టెస్టులో ఇంగ్లాండ్ ఫస్ట్ ఇన్నింగ్ ముగిసింది. తొలి ఇన్నింగ్స్​లో ఇంగ్లాండ్ 253 పరుగులకు ఆలౌటైంది. అనంతరం భారత్ సెకండ్ ఇన్నింగ్స్ ప్రారంభించింది. రెండో రోజు ఆట ముగిసేసమయానికి భారత్ 171 పరుగుల ఆధిక్యంలో కొనసాగుతోంది.

Ind vs Eng 2nd Test 2024: భారత్- ఇంగ్లాండ్​ టెస్టు మ్యాచ్​లో టీమ్ఇండియా రెండో ఇన్నింగ్స్ ప్రారంభించింది. రెండో రోజు ఆఖరి సెషన్​లో ఆట ​ ప్రారంభించిన భారత్ స్కోర్ వేగం పెంచింది. జైశ్వాల్ (15), రోహిత్ శర్మ (13) క్రీజులో ఉన్నారు. రెండో రోజు ఆట ముగిసేసమయానికి భారత్ 5 ఓవర్లకు 28-0 తో నిలిచింది. దీంతో భారత్ ప్రస్తుతం 171 పరుగుల లీడ్​లో కొనసాగుతోంది.

అంతకుముందు ఇంగ్లాండ్ తొలి ఇన్నింగ్స్ ముగిసింది. రెండో రోజు బ్యాటింగ్​ ప్రారంభించిన ఇంగ్లాండ్ 55.5 ఓవర్లలో 253 పరుగులకు ఆలౌటైంది. ఓపెనర్ క్రాలీ (76 పరుగులు), కెప్టెన్ బెన్​స్టోక్స్ (47 పరుగులు) ఇద్దరే రాణించారు. ఇక టీమ్ఇండియా బౌలర్లలో జస్ప్రీత్ బుమ్రా 6 వికెట్ల ప్రదర్శనతో అదరహో అనిపించాడు. స్పిన్నర్లు కుల్​దీప్ యాదవ్ 3, అక్షర్ పటేల్ 1 వికెట్ దక్కించుకున్నారు.

రెండో రోజు లంఛ్​కు ముందు ఇన్నింగ్స్​ ప్రారంభించిన ఇంగ్లాండ్ తొలి నుంచే ధాటిగా పరుగులు చేసింది. బజ్​బాల్ వ్యూహాన్ని అమలు చేస్తూ ఇంగ్లాండ్ బ్యాటర్లు చకచకా పరుగులు సాధించారు. ఈ క్రమంలో 59 పరుగుల వద్ద బెన్ డకెట్​ (21)ను కుల్​దీప్ ఔట్ చేసి టీమ్ఇండియాకు బ్రేక్ ఇచ్చాడు. ఆ తర్వాత కూడా ఇంగ్లాండ్ జోరు కొనసాగించింది. మరో ఓపెనర్ జాక్ క్రాలీ (76) హాఫ్ సెంచరీతో స్కోర్ బోర్డును ముందుకు నడిపించాడు. ఇక అక్షర్ క్రాలీని బోల్తా కొట్టించి పెవిలియన్ చేర్చాడు.

ఆ తర్వాత వికెట్ల పతనం మొదలైంది. బుమ్రా వరుసగా వికెట్లు సాధిస్తూ గేమ్​ను భారత్​వైపు మలిచాడు. 27.5 వద్ద ఒలీ పోప్​ (23)ను క్లీన్​ బౌల్డ్ చేసిన విధానమైతే రెండో రోజుకు హైలైట్​గా నిలిచింది. బుమ్రా సంధించిన యార్కర్​ను ఎదుర్కోలేక పోప్ క్లీన్ బౌల్డయ్యాడు. బంతి వేగానికి లెగ్​ సైడ్ స్టంప్ ఒక మీటర్ ఆవల పడింది. ఇక కెప్టెన్ బెన్ స్టోక్స్ మళ్లీ గేరు మార్చాడు. వేగంగా పరుగులు చేశాడు. కానీ, స్టోక్స్​ను కూడా బుమ్రా అద్భుత బంతితో బౌల్డ్​ చేశాడు. ఆఖర్లో హర్ట్లీ (21), అండర్సన్​ (5)ను ఔట్ చేసి ఇంగ్లాండ్ తొలి ఇన్నింగ్స్​కు ఫుల్​ స్టాప్ పెట్టాడు.

బుమ్రా @150: ఈ మ్యాచ్​లో బుమ్రా ఏకంగా 6 వికెట్ల ప్రదర్శనతో అదరగొట్టాడు. దీంతో టెస్టు కెరీర్​లో ఓ ఘనత సాధించాడు. బుమ్రా టెస్టుల్లో 150 వికెట్ల మైలురాయి అందుకున్నాడు. 34 మ్యాచ్​ల్లో బుమ్రా ఈ ఘనత సాధించాడు. 49.2 వద్ద స్టోక్స్​ను క్లీన్​బౌల్డ్ చేయడంతో బుమ్రా ఈ ఫీట్ అందుకున్నాడు.