క్రికెట్​లో AI టూల్- మహిళా ప్లేయర్ల సేఫ్టీ కోసమే! - Womens World Cup AI Tool

Womens World Cup AI Tool : అంతర్జాతీయ క్రికెట్ కౌన్సిల్(ఐసీసీ) సరికొత్త ఒరవడికి శ్రీకారం చుట్టింది. సోషల్ మీడియా వేధింపుల నుంచి మహిళా క్రికెటర్లను రక్షించేందుకు సరికొత్త ఏఐ టూల్ ను తీసుకొచ్చింది.

Womens World Cup AI Tool : మహిళా క్రికెటర్ల భద్రత కోసం ఐసీసీ కీలక నిర్ణయం తీసుకుంది. సోషల్ మీడియాలో అభ్యంతరమైన, ద్వేషపూరితమైన కంటెంట్ నుంచి మహిళా క్రికెటర్లను రక్షించేందుకు సరికొత్త ఏఐ (AI Tool) టూల్​ను ప్రారంభించింది. సోషల్ మీడియాలో క్రికెటర్లకు అభ్యంతరకరమైన కంటెంట్ నుంచి రక్షణ కల్పించే లక్ష్యంతో సోషల్ మీడియా మోడరేషన్ ప్రోగ్రామ్​ను గురువారం ప్రకటించింది. మహిళల టీ20 వరల్డ్ ప్రారంభానికి ముందు ఐసీసీ ఈ కీలక నిర్ణయం తీసుకుంది.

60 మంది క్రికెటర్లు సైన్ అప్
60 మంది మహిళా క్రికెటర్లు ఇప్పటికే ఈ ప్రోగ్రామ్​లో సైన్ అప్ చేసుకున్నారు. దీంతో వారి సోషల్ మీడియా ఖాతాల్లోకి ఎటువంటి ద్వేషపూరితమైన కంటెంట్ రాకుండా ఏఐ టూల్ అడ్డుకుంటుంది. ఐసీసీ టీ20 మహిళ టీ20 వరల్డ్ కప్​నకు ముందు ఉమెన్స్ ప్లేయర్లకు సురక్షితమైన డిజిటల్ వాతావరణాన్ని కల్పించేందుకు ఐసీసీ ఈ చొరవ తీసుకుంది. ఈ సోషల్ మీడియా మోడరేషన్ ప్రోగ్రామ్‌ ఏఐ సాంకేతిక అధారంగా నడుస్తుంది. గోబబ్బుల్​తో కలిసి ఈ టూల్​ను ఐసీసీ తీసుకొచ్చింది.

'కామెంట్లు ఇన్ యాక్టివ్'
ఐసీసీ అధికారిక ఫేస్​బుక్, ఇన్​స్ట్రాగ్రామ్, యూట్యూబ్ ఛానెల్ సహా ఆటగాళ్ల వ్యక్తిగత సోషల్ మీడియా అకౌంట్లలో వచ్చే కామెంట్లను పర్యవేక్షిస్తుంది. ప్లేయర్ల సోషల్ మీడియా ఖాతాల్లో అభ్యంతరకర, ద్వేషపూరిత కంటెంట్, వేధింపులకు సంబంధించిన కామెంట్లు ఉంటే వాటిని ఇన్ యాక్టివ్ చేస్తుంది. కాగా, ఈ టూల్ పై ఐసీసీ డిజిటల్ హెడ్ ఫిన్ బ్రాడ్ షా కీలక వ్యాఖ్యలు చేశారు. ఈ టూల్ ఐసీసీ మహిళల టీ20 ప్రపంచ కప్‌లో పాల్గొనే ప్లేయర్లకు సానుకూల వాతావరణాన్ని అందించేందుకు ప్రయత్నిస్తుందని తెలిపారు.

ప్లేయర్ల హర్షం
కాగా, ఐసీసీ కొత్తగా తీసుకొచ్చిన ఏఐ టూల్ ను దక్షిణాఫ్రికా క్రికెటర్ సినాలో జఫ్తా సమర్థించారు. మహిళా క్రికెటర్ల కోసం తీసుకొచ్చిన ఏఐ టూల్ ఆటగాళ్లకు రక్షణగా ఉంటుందని చెప్పుకొచ్చింది. ప్రపంచ కప్ సమయంలో ఆటగాళ్లపై ఒత్తిడి ఎక్కువగా ఉంటుందని పేర్కొన్నారు. ఒకవేళ ఈ టోర్నీలో ఓడిపోయిన తర్వాత ఫోన్ చూడడానికి భయపడాల్సి రావొచ్చని, ఎందుకంటే చాలా మంది నెటిజన్లు ప్లేయర్ల సోషల్ మీడియా ఖాతాలకు కామెంట్ల రూపంలో కించపరిచే వ్యాఖ్యలు చేస్తారని అన్నారు. అంతకంటే దారుణం మరొకటి లేదని అభిప్రాయపడ్డారు.

సచిన్, విరాట్​కు తప్పని డీప్ ఫేక్
గతంలోనూ టీమ్ఇండియా దిగ్గజాలు సచిన్ తెందూల్కర్, విరాట్ కోహ్లీ వంటివారు డీప్ ఫేక్ బారినపడ్డారు. దీంతో చాలా ఇబ్బందులు పడాల్సి వచ్చింది. అలాంటి సందర్భాలను దృష్టిలో పెట్టుకుని మహిళా క్రికెటర్ల కోసం ఐసీసీ కొత్త టూల్ ను తీసుకొచ్చింది.