Cricketers In ODI After 30 : ఏ దేశమైనా యంగ్‌ క్రికెట్ ప్లేయర్స్‌ని భవిష్యత్తుగా భావిస్తుంది. వారికి ఎక్కువ అవకాశాలు ఇచ్చి ప్రోత్సహిస్తుంది. చాలా కాలంగా డొమెస్టిక్ క్రికెట్ ఆడుతున్న సీనియర్లను పక్కనపెడుతుంది. వారి వయసు వారిని అంతర్జాతీయ క్రికెట్‌కి దూరం చేస్తుంది. అయితే ప్రతిభ, సంకల్పం విషయంలో వయసుతో సంబంధం లేదని చరిత్ర చెబుతోంది. దాదాపు 30 ఏళ్ల తర్వాత అంతర్జాతీయ క్రికెట్‌లో అరంగేట్రం చేసి, అద్భుతంగా రాణించిన ప్లేయర్లు ఉన్నారు. అలాంటి టాప్‌ ఫైవ్‌ క్రికెటర్‌ల గురించి ఇప్పుడు తెలుసుకుందాం.
సూర్యకుమార్ యాదవ్
సూర్యకుమార్ యాదవ్ (33) జర్నీ చాలా ప్రత్యేకం. డొమెస్టిక్ క్రికెట్, ఐపీఎల్‌లో నిలకడగా రాణిస్తున్నప్పటికీ, అతనికి జాతీయ జట్టు నుంచి పిలుపు రాలేదు. 2018 నుంచి 2020 వరకు ఐపీఎల్‌లో అద్భుత ఇన్నింగ్స్‌లు ఆడాడు. దీంతో 2021లో చివరికి భారత టీ20 జట్టులో చోటు దక్కింది. ఇప్పుడు అతను T20Iలలో 165 స్ట్రైక్ రేట్‌తో 39 యావరేజ్‌తో ప్రపంచ నంబర్‌ వన్‌ బ్యాటర్‌గా కొనసాగుతున్నాడు.
మైఖేల్ హస్సీ
'మిస్టర్ క్రికెట్'గా గుర్తింపు పొందిన మైఖేల్ హస్సీ చాలా ఆలస్యంగా అంతర్జాతీయ క్రికెట్‌లోకి అడుగుపెట్టాడు. 30 సంవత్సరాల వయస్సులో ఆస్ట్రేలియా తరఫున అవకాశం అందుకున్నాడు. కెరీర్‌లో కెరీర్ 79 టెస్ట్ మ్యాచ్‌లు, 185 వన్డేలు ఆడాడు. మొత్తం 12,000 కంటే ఎక్కువ పరుగులు సాధించాడు. ఐపీఎల్‌లోనూ అదరగొట్టాడు. 2013లో చెన్నై సూపర్‌ కింగ్స్‌ తరఫున ఆరెంజ్ క్యాప్‌ గెలిచాడు. అత్యుత్తమ క్రికెటర్లలో ఒకడిగా గుర్తింపు తెచ్చుకున్నాడు.
సయీద్ అజ్మల్
సయీద్ అజ్మల్ 31 సంవత్సరాల వయస్సులో పాకిస్థాన్‌ తరఫున అరంగేట్రం చేశాడు. అప్పటికి చాలా మంది బౌలర్ల కెరీర్ ముగింపు దశకు చేరుకుంది. అతడి ఆఫ్ స్పిన్ బౌలింగ్, వేరియేషన్లను ఎదుర్కోవడం బ్యాటర్లకు సవాలుగా మారింది.
పాకిస్థాన్‌ 2009 T20 ప్రపంచ కప్ విజయంలో సయూద్ కీలక పాత్ర పోషించాడు. టెస్ట్ మ్యాచుల్లో 28 సగటుతో 178 వికెట్లు తీశాడు. అప్పుడప్పుడు బౌలింగ్ యాక్షన్‌లో సమస్యలు ఎదుర్కొన్నప్పటికీ, అజ్మల్, పాక్‌ గొప్ప క్రికెటర్లలో ఒకడిగా గుర్తింపు పొందాడు.
ర్యాన్ హారిస్
ర్యాన్ హారిస్ 29 ఏళ్ల వయసులో అరంగేట్రం చేశాడు. అతని ఖచ్చితత్వం, బంతిని స్వింగ్‌ చేసే సామర్థ్యం అతడ్ని తిరుగులేని టెస్ట్ బౌలర్‌గా నిలిపాయి. గాయాలతో అతని కెరీర్ కాస్త దెబ్బతిన్నప్పటికీ, ఇంగ్లాండ్తో జరిగిన 2013 యాషెస్ సిరీస్‌లో 19.58 సగటుతో 24 వికెట్లు పడగొట్టాడు. మొత్తంగా 27 టెస్టుల్లో 113 వికెట్లు, 21 వన్డేల్లో 44 వికెట్లు పడగొట్టాడు.
క్రిస్ రోజర్స్
క్రిస్ రోజర్స్ 31 సంవత్సరాల వయస్సులో అరంగేట్రం చేశాడు. అతని టెస్ట్ కెరీర్‌లో చాలాసార్లు జట్టులోకి వస్తూ, పోతూ ఉన్నాడు. అయితే 2013లో మాత్రం తనకొచ్చిన అవకాశాన్ని సద్వినియోగం చేసుకున్నాడు. మొత్తం 25 టెస్టుల ఆడిన క్రిస్ రోజర్స్ 42 యావరేజ్‌తో కెరీర్ ముగించాడు.
