ఎక్కడైనా, ఎప్పుడైనా టీమ్ఇండియా భయపడట్లే!: రికీ పాంటింగ్ - 2024 Border Gavaskar Trophy

2024-25 Border Gavaskar Trophy: కొంతకాలంగా టీమ్ఇండియా విదేశీ మైదానాల్లో ఆడేందుకు బెదరడం లేదని ఆశీస్ మాజీ ప్లేయర్ రికీ పాంటింగ్ అన్నాడు.

2024-25 Border Gavaskar Trophy: 2024- 25 బోర్డర్ గావస్కర్ ట్రోఫీకి భారత్- ఆస్ట్రేలియా జట్లు సంసిద్ధమవుతున్నాయి. ఆస్ట్రేలియా వేదికగా నవంబర్​లో ఈ ప్రతిష్ఠాత్మకమైన ట్రోఫీ ప్రారంభం కానుంది. ఈ టోర్నీలో ఆతిథ్య ఆసీస్​తో టీమ్ఇండియా 5 మ్యాచ్​లు ఆడనుంది. అయితే ఐసీసీ టెస్టు ర్యాంకింగ్స్​లో నెం 1, నెం 2 స్థానాల్లో ఉన్న ఈ రెండు అత్యుత్తమ జట్ల మధ్య హై వోల్టేజ్ పోటీని చూసేందుకు క్రికెట్ ఫ్యాన్స్​ ఆత్రుతగా ఎదురు చూస్తున్నారు.

ఆసీస్ గడ్డపై జరిగిన గత రెండు ఎడిషన్లలో (2018- 19), (2020- 21) టీమ్ఇండియా విజయం సాధించింది. ఈసారి కూడా ఇదే జోరులో విజయ సాధించాలని భారత్ వ్యూహాలు రచిస్తోంది. ఈ నేపథ్యంలో ఆసీస్ మాజీ ప్లేయర్ రికీ పాంటింగ్ ఇంట్రెస్టింగ్ కామెంట్స్ చేశాడు. టీమ్ఇండియా కొంత కాలంగా విదేశీ గడ్డలపై ఆడేందుకు బెదరడం లేదని అన్నాడు.

'2020- 21లో భారత్ గబ్బా మైదానంలో జయ కేతనం ఎగురవేసింది. ఆ మైదానంలో భారత్ నెగ్గడం అదే తొలిసారి. ఈ మధ్య కాలంలో టీమ్ఇండియా విదేశాల్లోనూ అద్భుతంగా రాణిస్తోంది. ఆ జట్టు బ్యాటర్లు విదేశీ పిచ్​ల పరిస్థితులను బాగా అర్థం చేసుకుంటున్నారు. ఒకప్పటిలా కాకుండా గబ్బా, ఓవర్ పిచ్​లపై కూడా అదరగొడుతున్నారు. బహుశా అది జట్టు ఎంపికపై ఆధారపడి ఉంటుందేమో' అని పాంటింగ్ ఓ స్పోర్ట్స్​ ఛానెల్​ ప్రజెంటేషన్​లో అన్నాడు.

IPLనే వరల్డ్​కప్​లా భావిస్తారు
'చాలా మంది యంగ్ ప్లేయర్లు ఐపీఎల్​నే వరల్డ్​కప్​లా భావిస్తూ,​ తీవ్ర ఒత్తిడి ఎదుర్కొంటున్నారు. వాళ్ల బ్యాటర్లు ఎక్కడ కూడా భయం లేకుండా, ఎంతో అగ్రెసివ్​గా ఆడుతున్నారు. ఇది నేను గత 10ఏళ్లుగా ఐపీఎల్​లో గమనిస్తున్నా' అని రికీ పాంటింగ్ పేర్కొన్నాడు.

6-7ఏళ్లుగా స్ట్రాంగ్ లీడర్​షిప్
గత 6-7ఏళ్లుగా టీమ్ఇండియా నాయకత్వం కూడా బలంగా ఉందని పాంటింగ్ అన్నాడు. 'వాళ్లకు లోతైన ఫాస్ట్ బౌలింగ్ ఉంది. 6 - 7 ఏళ్ల నుంచి లీడర్​షిప్ కూడా పటిష్ఠంగా ఉంది. విరాట్ కోహ్లీ కెప్టెన్సీతో జట్టులో కీలక పాత్ర పోషించాడు. గత నాలుగేళ్లుగా ద్రవిడ్ కూడా అదే కొనసాగిస్తున్నారు. వాళ్ల జట్టులో నాణ్యమైన ఆటగాళ్లు ఉండడం కూడా అదనపు బలం' అని పాంటిగ్ తెలిపాడు.