Aus vs Afg T20 World Cup: 2024 టీ20 వరల్డ్కప్ అఫ్గానిస్థాన్ సంచలన విజయం నమోదు చేసింది. సూపర్- 8లో ఆదివారం ఆస్ట్రేలియాతో జరిగిన మ్యాచ్లో 21 పరుగుల తేడాతో నెగ్గి సెమీస్ ఆశలు సజీవంగా ఉంచుకుంది. అఫ్గాన్ నిర్దేశించిన 149 పరుగుల స్వల్ప లక్ష్య ఛేదనలో 19.2 ఆసీస్ 127 పరుగులకే ఆలౌటైంది. గ్లెన్ మ్యాక్స్వెల్ (59 పరుగులు) ఒక్కడే రాణించాడు. అఫ్గాన్ బౌలర్లలో గుల్బాదిన్ నబీ 4 వికెట్లతో ఆసీస్ పతనాన్ని శాసించాడు. నవీన్ ఉల్ హక్ 3, మహ్మద్ నబీ, రషీద్ ఖాన్, అజ్మతుల్లా తలో వికెట్ దక్కించుకున్నారు.
స్వల్ప లక్ష్య ఛేదనలో ఆసీస్ తొలి ఓవర్లోనే ట్రావిస్ హెడ్ (0) వికెట్ కోల్పోయింది. వన్డౌన్లో వచ్చిన కెప్టెన్ మిచెల్ మార్ష్ (12) నవీన్ ఉల్ హక్ బౌలింగ్లో పెవిలియన్ చేరాడు. ఇక కాసేపటికే మరో ఓపెనర్ డేవిడ్ వార్నర్ (3) కూడా స్పల్ప స్కోర్కే వెనుదిరిగాడు. ఈ సమయంలో గ్లెన్ మ్యాక్స్వెల్ నిలబడ్డాడు. కానీ, మరో ఎండ్లో అతడికి సహకారం అందిచే బ్యాటర్ల కరవయ్యారు. మార్కస్ స్టోయినిస్ (11), టిమ్ డేవిడ్ (2) కూడా త్వరగానే ఔటయ్యారు. ఇక 14.4 వద్ద మ్యాక్స్వెల్ ఔటవడం వల్ల అఫ్గాన్కు ఆశలు చిగురించాయి. పట్టువదలకుండా బౌలింగ్ చేస్తూ మ్యాథ్యూ వేడ్ (5), కమిన్స్ (3), ఆస్టన్ ఏగర్ (2), ఆజమ్ జంపా (9) వరుసగా పెలివియన్కు పంపారు.
అంతకుముందు బ్యాటింగ్ చేసిన అఫ్గాన్ నిర్ణీత 20 ఓవర్లలో 148-6 స్కోర్ చేసింది. ఓపెనర్లు గుర్భాజ్ (60 పరుగులు), ఇబ్రహిమ్ జర్దాన్ (51 పరుగులు) హాఫ్ సెంచరీలతో రాణించారు. వీరిద్దరూ తొలి వికెట్కు 15.5 ఓవర్లలో 118 పరుగులు జోడించారు. ఈ లెక్కన అఫ్గాన్ స్కోర్ 170 దాటాల్సింది. కానీ, ఆఖర్లో ఆసీస్ బౌలర్లు పుంజుకున్నారు. కమిన్స్ హ్యాట్రిక్తో అఫ్గాన్ను దెబ్బకొట్టాడు. దీంతో 148 పరుగులకే పరిమితమైంది.
ఇంకా సెమీస్ రేసులోనే: సూపర్- 8 తొలి మ్యాచ్లో భారత్తో ఓడిన అఫ్గాన్ ఈ మ్యాచ్తో సెమీ ఫైనల్ రేసులో నిలిచింది. రెండు మ్యాచ్ల్లో 1 ఓటమి, 1 గెలుపుతో అఫ్గాన్ 2 పాయింట్లతో ఉంది. ఇక బంగ్లాదేశ్తో మ్యాచ్లో భారీ తేడాతో విజయం సాధించినా, భారత్పై ఆసీస్ ఓడినా అఫ్గాన్ సెమీస్కు దూసుకొస్తుంది. తాజా ఓటమితో ఆసీస్ సెమీస్ అవకాశాలు సంక్లిష్టం చేసుకుంది.
ఈసారి గురి తప్పలేదు!
కాగా, గతేడాది జరిగిన వన్డే వరల్డ్కప్లో లీగ్ మ్యాచ్లోనూ ఆసీస్కు అఫ్గాన్ గట్టిపోటీనిచ్చింది. ఆ మ్యాచ్లో అఫ్గాన్ దాదాపు గెలుపు అంచులదాకా వెళ్లింది. అయితే ఆల్రౌండర్ మ్యాక్స్వెల్ అద్భుత పోరాటంతో ఆ మ్యాచ్లో ఆసీస్ను గట్టెక్కించాడు. కానీ, ఈసారి అఫ్గాన్ పట్టువదలకుండా పోరాడింది. బలమైన ఆస్ట్రేలియాకు షాకిచ్చి అద్భుత విజయాన్ని నమోదు చేసింది.
