Flowers Should not Offer to Shiva : మహా శివరాత్రి రోజున శైవ క్షేత్రాలన్నీ శివ నామస్మరణతో మార్మోగిపోతాయి. హరహర మహాదేవ అంటూ భక్తులు ప్రణమిల్లుతారు. తెల్లవారుజాము నుంచే శివాలయాలన్నీ భక్తులతో కిటకిటలాడతాయి. చాలా మంది ఇంట్లోనే శివయ్యకు పూజలు చేస్తారు. అయితే, శివపూజలో ఏ పూలు వినియోగించాలి? ఏ పూలు అస్సలు ముట్టుకోకూడదు? అనే విషయం చాలా మంది భక్తులకు తెలియదు. అందుకే, ఈ స్టోరీ మీకోసం. ఏ పూలతో పూజిస్తే ఎలాంటి ఫలితాలు ఉంటాయో, ఏ పూలను శివయ్య మెచ్చడో ప్రముఖ జ్యోతిష్యులు మాచిరాజు కిరణ్ చెబుతున్నారు. ఆ వివరాలు ఇప్పుడు తెలుసుకుందాం.
తుమ్మి పుష్పాలు : తొడిమ లేకుండా ఉండే తుమ్మి పూలతో పూజ చేస్తే శివయ్యకు చాలా ఇష్టం. వీటితో పరమేశ్వరుడిని పూజిస్తే కోరుకున్న కోరికలన్నీ నెరవేరుతాయని జ్యోతిష్యులు చెబుతున్నారు.
పద్మాలు : మనం ఒక్కోసారి పొరపాటుగా ఇతరులను దూషిస్తాం. ఆ దోషాలు పోవాలంటే శివరాత్రి రోజున పద్మ పుష్పాలతో శంకరుడిని పూజించాలట. తప్పులు తొలగిపోయి ఐశ్వర్యం కలుగుతుందట.
మందార పూలతో : శివరాత్రి రోజున మందారాలతో పరమేశ్వరుడిని పూజిస్తే శత్రు బాధలు తొలగిపోతాయని పండితులు చెబుతున్నారు.
గన్నేరు పూలు : దీర్ఘకాలిక ఆరోగ్య సమస్యలతో ఇబ్బంది పడుతున్నవారు శివరాత్రి రోజున గన్నేరు పూలతో ఈశ్వరుడిని పూజించాలని సూచిస్తున్నారు. దీంతో ఆరోగ్యం కుదురుకుంటుందని చెబుతున్నారు.
సన్నజాజులు : శివరాత్రి వేళ సన్నజాజులతో శివయ్యను పూజిస్తే, పెళ్లికాని వారికి వివాహ ఘడియలు దగ్గరవుతాయట. వయసు పెరిగినా వివాహం కాని వారికి ఉపయోగకరంగా ఉంటుందట.
గులాబీ పూలు : చాలా కాలంగా తీరని కోరిక ఏదైనా ఉంటే, శివరాత్రి రోజున గులాబీ పూలతో పూజించాలని సూచిస్తున్నారు. ఇలా చేస్తే మీ కోరిక కచ్చితంగా తీరుతుందట.
కదంబ పుష్పాలు : శివరాత్రి నాడు కదంబ పూలతో పరమేశ్వరుడిని పూజిస్తే తీవ్రమైన శత్రుబాధలు, దృష్టి దోషాలు తొలగిపోతాయని సూచిస్తున్నారు.
దీర్ఘాయు కోసం : దీర్ఘాయు కోసం అపమృత్యు దోషాలు తొలగిపోవడం కోసం, శివరాత్రి రోజున మల్లెపూలతో ముక్కంటిని పూజించాలని చెబుతున్నారు. వాసన లేని పూలతో పూజిస్తే దృష్టి దోషాలు తొలగుతాయట.
పూజించకూడని పూలు : పరమేశ్వరుడిని పూజించకూడని పుష్పాలు కూడా ఉన్నాయని జ్యోతిష్యులు చెబుతున్నారు. ఈ విషయం 'శివ మహాపురాణం విద్యేశ్వర సంహిత'లో స్పష్టంగా ఉందని మాచిరాజు చెబుతున్నారు. కేతకం అంటే మొగలి పువ్వు, చంపకం అంటే సంపంగి పువ్వు. ఈ రెండింటితో శివరాత్రి రోజున ఈశ్వరుడిని పూజించకూడదని సూచిస్తున్నారు. ఇవి కాకుండా మిగిలిన ఏ పూలతో పరమేశ్వరుడిని పూజించినా మంచిదేనని చెబుతున్నారు.
ఇవి కూడా చదవండి :
మహాశివరాత్రి నాడు శివయ్యకు ఎంతో ఇష్టమైన ప్రసాదాలు - నైవేద్యంగా పెడితే ఎంతో సంతోషిస్తాడు!
శివుడికి బిల్వపత్రం సమర్పణ - ఎలాంటి నియమాలు పాటించాలో తెలుసా?
