కార్తికంలో "దీపదానం" చేస్తున్నారా? - ఈరోజున దానం చేస్తే ప్రభుత్వ ఉద్యోగమట!

-కార్తిక మాసంలో దీపదానానికి ఎంతో ప్రాముఖ్యత -ఈ దీపం దానం చేస్తే రాజయోగం

How to Do Deepa Danam in Karthika Masam: పరమ పవిత్రమైన కార్తీక మాసం.. శివకేశవులకు ఎంతో ప్రీతికరమైనది. ఈ మాసం ఆధ్యాత్మిక సాధనకు, మోక్షసాధనకు విశిష్టమైనది. ప్రత్యేకించి సూర్యోదయానికి ముందు చేసే స్నానాలు, ఆ తర్వాత చేసే దానాలు, ఉపవాసాలకు గొప్ప శక్తి ఉందని స్కాంద పురాణ అంతర్గతంగా ఉన్న కార్తీక పురాణం వివరిస్తోంది. అయితే కార్తిక మాసంలో అన్ని దానాలు ఒక ఎత్తైతే దీపదానం మరో ఎత్తని చెబుతారు. ఎందుకంటే ఈ మాసంలో దీపదానానికి అంత విశిష్టత ఉంది. మరి ఈ మాసంలో దీపదానం ఎలా చేయాలి? ఏఏ తిథుల్లో చేస్తే మంచిది? ఎన్ని వత్తులు వేసి దానం చేయాలి? అనే వివరాలను ఈ స్టోరీలో తెలుసుకుందాం..

దీపదానం ఎలా చేయాలి: కార్తిక మాసంలో దీపదానం చేయడం వల్ల శివకేశవుల సంపూర్ణ అనుగ్రహంతో పాటు సంవత్సరం మొత్తం సకల శుభాలు సిద్ధిస్తాయని ప్రముఖ జ్యోతిష్య నిపుణులు మాచిరాజు కిరణ్​ కుమార్​ చెబుతున్నారు. దీపం ఎలా తయారు చేయాలి? ఎక్కడ దానం ఇవ్వాలో కూడా చెబుతున్నారు. ఆ వివరాలు చూస్తే..

• దీపదానం చేయాలనుకునే వారు తలస్నానం చేయాలి.
• గోధుమపిండి తీసుకుని అందులో కొద్దిగా బెల్లం తురుము, ఆవుపాలు పోసుకుని కలుపుతూ పిండి దీపం తయారు చేయాలి.
• ఆ తర్వాత పైడిపత్తి తీసుకుని స్వయంగా చేతిలో నలుపుతూ వత్తులు చేయాలి.
• ఇలా తయారు చేసిన వత్తులను పిండి దీపంలో పెట్టి ఆవు నెయ్యి పోసి వెలిగించాలి.
• ఇలా వెలిగించిన దీపాలను శివాలయం లేదా విష్ణు ఆలయం ప్రాంగణం, నదీ తీరం, రావి చెట్టు, తులసి కోట, ఉసిరి చెట్టు, మర్రిచెట్టు లేదా గృహంలో ఎక్కడైనా దీపదానం చేయవచ్చని మాచిరాజు చెబుతున్నారు.

ఎన్ని దీపాలు దానం చేస్తే ఎలాంటి ఫలితం:

• కార్తిక మాసంలో ఒక దీపాన్ని వెలిగించి దానం ఇస్తే చిన్న చిన్న పాపాలు తొలగిపోతాయని చెబుతున్నారు.
• పది దీపాలు వెలిగించి దానం ఇస్తే మహా పాపాలు తొలగిపోతాయని వివరిస్తున్నారు.
• వంద దీపాలు వెలిగించి దానం ఇస్తే శివలోకం సిద్ధిస్తుందని చెబుతున్నారు.
• వంద కంటే ఎక్కువ దీపాలు వెలిగించి ఇస్తే మోక్షం కలుగుతుందని స్కాంద పురాణంలో చెప్పినట్లు మాచిరాజు కిరణ్​ కుమార్​ చెబుతున్నారు.

ఎన్ని వత్తులు వేసి దీపం దానం చేస్తే ఎలాంటి ఫలితాలు:

• కార్తిక మాసంలో ఒక వత్తి వేసి దీపాన్ని వెలిగించి దానం ఇస్తే అన్ని పాపాలు తొలగిపోతాయని చెబుతున్నారు.
• నాలుగు వత్తులు వేసి దీపాన్ని వెలిగించి దానం ఇస్తే రాజ యోగం కలుగుతుందని సూచిస్తున్నారు.
• 10 వత్తులు వేసి దీపాన్ని వెలిగించి దానం ఇస్తే చక్రవర్తిత్వం కలుగుతుందని అంటున్నారు. చక్రవర్తిత్వం అంటే మీరు ఏ వృత్తిలో ఉన్నా ఉన్నత స్థాయికి చేరుతారని చెబుతున్నారు.
• 100 వత్తులు వేసి దీపాన్ని వెలిగించి దానం ఇస్తే విష్ణు లోక ప్రాప్తి కలుగుతుందని అంటున్నారు.
• 100 కంటే ఎక్కువ వత్తులు వేసి దీపాన్ని వెలిగించి దానం ఇస్తే పునర్జన్మ ఉండదని.. మోక్షం లభిస్తుందని అంటున్నారు.

ఏ తిథిలో దానం చేస్తే ఎలాంటి ఫలితం: కార్తిక మాసంలో శుక్ల పక్షం లేదా బహుళ పక్షంలో అంటే పౌర్ణమికి ముందు లేదా పౌర్ణమి తర్వాత కొన్ని తిథులలో దీపాలను వెలిగించి దానం ఇస్తే మంచిదని స్కాంద పురాణంలో చెప్పినట్లు మాచిరాజు చెబుతున్నారు. ఆ వివరాలు ఆయన మాటల్లోనే

• పాడ్యమి లేదా చవితి తిథి రోజు దీపదానం చేస్తే ముత్తైదువులకు సౌభాగ్యం కలుగుతుందని చెబుతున్నారు.
• విదియ రోజు దానం చేస్తే స్ససంతాన ప్రాప్తి కలుగుతుందని వివరిస్తున్నారు.
• తదియ రోజు దీపదానం చేస్తే సకల సంపదలు లభిస్తాయని తెలుపుతున్నారు.
• పంచమి రోజు దీప దానం చేస్తే ప్రభుత్వ ఉద్యోగాలు లభిస్తాయి.
• షష్ఠి తిథి రోజు దీపాన్ని దానం చేస్తే రాజకీయాల్లో బ్రహ్మండమైన పదవి లభిస్తుంది.
• సప్తమి రోజు దీప దానం చేస్తే ప్రభుత్వ ఉద్యోగులకు పదోన్నతి లభిస్తుందని సూచిస్తున్నారు.
• చతుర్దశి రోజు దానం చేస్తే మానసిక అశాంతి తొలగిపోతుందని అంటున్నారు.
• క్షీరాబ్ది ద్వాదశి లేదా చిలుకు ద్వాదశి రోజు దీప దానం చేస్తే మిగిలిన రోజుల్లో చేసిదాని కంటే నాలుగు రెట్లు ఎక్కువ ఫలితం కలుగుతుందని అంటున్నారు.

కార్తికమాసంలో దీపం దానం చేసేటప్పుడు చదవాల్సిన శ్లోకం: "సర్వజ్ఞానప్రదం దీపం సర్వ సంపత్ సుఖావహం దీపదానం ప్రదాస్వామి శాంతిరస్తు సదామమ" అనే మంత్రాన్ని పఠిస్తూ దీపాన్ని దానం ఇవ్వాలి. శ్లోకం మొత్తం చదవలేని వారం "కార్తిక దామోదర ప్రీత్యర్థం" అనుకుంటూ దీపదానం ఇస్తే మంచి జరుగుతుందని అంటున్నారు.

NOTE: పైన తెలిపిన వివరాలు కొందరు నిపుణులు, వివిధ శాస్త్రాల్లో పేర్కొన్న అంశాల ఆధారంగా అందించినవి మాత్రమే. అంతే కానీ, వీటిలో ఎలాంటి శాస్త్రీయ ఆధారాలు లేవనే విషయాన్ని పాఠకులు గమనించాలి. దీన్ని ఎంతవరకు విశ్వసించాలనేది పూర్తిగా మీ వ్యక్తిగత విషయం.