Jagan Fake Publicity : పల్నాడు జిల్లా వినుకొండలో హత్యకు గురైన షేక్ రషీద్(25) కుటుంబాన్ని మాజీ ముఖ్యమంత్రి, వైఎస్సార్సీపీ అధ్యక్షుడు ఈ రోజు పరామర్శించారు. ఈ సందర్భంగా వైఎస్ జగన్కు కేటాయించిన వాహనం సౌకర్యంగా లేదని మార్గంమధ్యలో వేరే కారులోకి మారి వెళ్లారు. అంతేకాకుండా ఫిట్గా లేని వాహనం జగన్కు ఇచ్చారని వైఎస్సార్సీపీ శ్రేణులు ఆరోపించాయి. దీనిపై ప్రభుత్వం క్లారిటీ ఇచ్చింది. వాహనం పూర్తి ఫిట్ నెస్తో ఉందని కండిషన్ చూసిన తరువాతనే వీఐపికి కేటాయించినట్లు అధికారులు స్పష్టం చేశారు. మరోవైపు జగన్ వ్యవహారశైలిని టీడీపీ శ్రేణులు, ఆ పార్టీ సానుభూతిపరులు సోషల్ మీడియాలో తప్పుపడుతున్నారు.
శవ రాజకీయానికి వినుకొండ బయలుదేరిన జగన్ 5 నిమిషాలు కూడా ఆ బుల్లెట్ ప్రూఫ్ కారులో కూర్చో లేకపోయాడా అని ప్రశ్నిస్తున్నారు. ఇదే కారులో చంద్రబాబు దాదాపు 10 ఏళ్లు ప్రయాణం చేశారని, ప్రతిపక్ష నేతగా, NSG భద్రతలో జడ్ ప్లస్ సెక్యూరిటీ ఉన్న చంద్రబాబు కొన్ని వేల కిలోమీటర్లు అదే కారులో ప్రయాణించారని గుర్తు చేస్తున్నారు. జగన్ చేసిన ప్రాజెక్టుల విధ్వంసాన్ని చాటేందుకు ఏకధాటిగా వేల కిలోమీటర్లు అదే కారులో ప్రయాణించారని, కానీ ఎక్కడా తనకు కంఫర్ట్గా లేదని, నా వాహనాలు మార్చండి అని చంద్రబాబు ఏనాడూ యాగీ చెయ్యలేదని అంటున్నారు. ప్రభుత్వం కక్ష కట్టిందని రాజకీయం చేయలేదని తెలిపారు.
హత్యా రాజకీయాలకు పేటెంట్ వైఎస్సార్సీపీదే: మంత్రి గొట్టిపాటి రవికుమార్
ఒంగోలు మహానాడుకు వెళుతుంటే ప్రభుత్వ కారులో ఏసీ రాకపోతే చంద్రబాబు ఎమ్మెల్యే కారులో ప్రయాణం చేశారని స్పష్టం చేశారు. ఆనాడు బుల్లెట్ ఫ్రూప్ లేని వాహనంలో వెళ్లాల్సి వచ్చినా లెక్క చేయలేదని, గొడవ చేయలేదంటున్నారు. అప్పటికే మూడు సార్లు సీఎంగా చేసిన చంద్రబాబు ఆ వయసులో అదే వాహనంలో ప్రయాణం చేశారంటున్నారు. ప్రజల పక్షాన పోరాడారని, ఇంతెందుకు నంద్యాలలో అరెస్టు చేసి రోడ్డు మార్గంలో తీసుకువచ్చింది కూడా అదే తరహా సఫారీ కారులోనే అని టీడీపీ నేతలు గుర్తు చేస్తున్నారు. కానీ జగన్ మాజీ అయిన నెల రోజులకే ప్రభుత్వ కారు నచ్చలేదు, సౌకర్యవంతంగా లేదు అని దిగిపోయాడని ఆరోపిస్తున్నారు. ఇదిలావుంటే జగన్ దిగిన కారులో ఏ సమస్యా లేదని, ఆయన దిగిన తరువాత కూడా ఆ కారు కాన్వాయ్ను ఫాలో అయ్యిందని అంటున్నారు.
అయ్యా జగన్ రెడ్డీ నీకు కంఫర్ట్ లేదు అంటే నీకు నచ్చిన కారు కొనుక్కో, కానీ ప్రభుత్వం సెక్యూరిటీ తగ్గించిందనే తప్పుడు ప్రచారం ఎందుకు అని ప్రశ్నిస్తున్నారు. ఈ రోజు వినుకొండ వెళుతున్న మీకు జడ్ ప్లస్ సెక్యూరిటీ ఇచ్చారు తెలుసా అని ధ్వజమెత్తుతున్నారు. కావాలంటే పక్కనే ఉన్న మీ సెక్యూరిటీని అడిగి వాస్తవాలు చెప్తారని సూచిస్తున్నారు. పదవి ఊడిన తరువాత కూడా నీకు సీఎంకు ఇచ్చే వాహనాల కాన్వాయ్ను కొనసాగించారు అంటే అదీ చంద్రబాబు ప్రభుత్వం గొప్పతనమని, దానిపైనా ఫేకు చేసి నీకు మాత్రమే సాధ్యమైన నికృష్ట రాజకీయంతో మరింత దిగజారొద్దని స్పష్టం చేస్తున్నారు.
ప్రతిపక్ష హోదా కూడా లేని నీకు, నువ్వు కోరుకున్నట్లు 946 మంది భద్రతతో, పరదాలతో, చెట్ల నరికివేతతో, బారికేడ్లతో కాన్వాయ్ సాగాలంటే మాత్రం కుదరదని అంటున్నారు. ఇప్పటికైనా ఫేక్ ప్రచారాలు, అవాస్తవాలు మాని నువ్వెళ్లిన శవ రాజకీయం పండిందో లేదో లెక్కలు వేసుకోవాలని సూచిస్తున్నారు. మరోవైపు జగన్ వాహనం మారి లేళ్ల అప్పిరెడ్డి కారు ఎక్కి వెళ్లాడని తెలుగుదేశం వర్గాలు అంటున్నాయి. గతంలో ఇదే వాహనాన్ని తెలుగుదేశం కార్యాలయంపై దాడికి వినియోగించారని తెలుగుదేశం వర్గాలు ఆరోపిస్తున్నాయి.
