Vijayawada Lok Sabha Constituency Political Review: రాష్ట్రంలో విజయవాడ అత్యంత ప్రముఖమైన లోక్‌సభ నియోజకవర్గం. రాజకీయ చైతన్యానికి మారు పేరు. ఎందరో ఉద్ధండులు ఈస్థానం నుంచి ప్రాతినిథ్యం వహించారు. 2014 నుంచి ఇక్కడ తెలుగుదేశానిదే హవా. రాష్ట్రమంతా వైసీపీ గాలి వీచినా 2019లోనూ ఇక్కడి ప్రజలు సైకిల్‌కే జైకొట్టారు. ఈసారి ఇక్కడ అన్నదమ్ముల సవాల్‌ నడుస్తోంది. గత ఎన్నికల్లో తెలుగుదేశం నుంచి గెలిచిన కేశినేని నాని ఈసారి వైసీపీ అభ్యర్థిగా ఉన్నారు. ఇన్నాళ్లూ అన్న వెనకాల ఉన్న కేశినేని శివనాథ్ తెలుగుదేశం నుంచి బరిలో నిలిచారు. పార్టీ విజయాన్ని తన సొంత విజయంగా భావించడం కేశినేని నాని అతిపెద్ద మైనస్‌. అదే అహంకారంతో ఇష్టారీతన నోరు పారేసుకుంటున్నారు. మరోవైపు శివనాథ్ మాత్రం సేవా కార్యక్రమాలతో ప్రజల్లో మంచి పేరు సంపాదించారు. సామాజిక సమీకరణాలు కీలకమైన ఇక్కడ కూటమిలో జనసేన ఉండటం శివనాథ్‌కి కలిసొస్తోంది. మొత్తంగా అన్నను ఓడించి లోక్‌సభలో అడుగుపెట్టడమే తరువాయి అన్నట్లు శివనాథ్ దూసుకెళ్తున్నారు.
ఆసక్తికరంగా సమీకరణాలు: రాజకీయంగా హేమాహేమీలు విజయవాడ నుంచి ప్రాతినిధ్యం వహించారు. 2019 ఎన్నికల్లో ఎదురుగాలిలోనూ విజయవాడ లోక్‌సభ నియోజకవర్గంలో సైకిల్‌ పరుగులు పెట్టింది. అయితే ఈసారి రాజకీయ సమీకరణాలు ఆసక్తికరంగా మారాయి. విజయవాడ లోక్‌సభకు ఈసారి ప్రధాన ప్రత్యర్థులుగా కేశినేని బ్రదర్స్‌ పోటీ పడుతున్నారు. 2014, 2019ఎన్నికల్లో తెలుగుదేశం తరపున పోటీచేసి విజయం సాధించిన కేశినేని నాని ఈసారి వైసీపీ తరపున పోటీ చేస్తున్నారు. నిన్నటివరకు రాజధాని నిర్మాణంలో జగన్‌ను తప్పుపట్టిన ఆయన నేడు మూడు రాజధానులకు జై కొడుతున్నారు. స్థానిక అభివృద్ది ముఖ్యమనే ఆయన రాజధానిని స్థిరాస్తి వెంచర్‌గా అభివర్ణించి ప్రజల్లో పలుచనయ్యారు.
రాజధాని అంశాన్ని ప్రస్తావించేందుకే వైసీపీ అభ్యర్థులు భయపడుతుంటే కేశినేని నాని మాత్రం ఏకంగా చంద్రబాబు నిర్ణయాన్ని తప్పుపట్టడం ఎన్టీఆర్‌ జిల్లా ప్రజలకే కాదు వైసీపీ నేతలకూ నచ్చడం లేదు. 2019 ఎన్నికల్లో గెలిచేందుకు తన వ్యక్తిగత ప్రతిష్టే కారణమనే భ్రమలో ఉన్న నాని ఇప్పటికీ అదే పంథా కొనసాగించడంతో నియోజకవర్గాల్లో అభ్యర్థులు తమతో ప్రచారానికి పెద్దగా ఆహ్వానించడం లేదు. ఈసారి తెలుగుదేశం నుంచి ఆయన సోదరుడు కేశినేని శివనాథ్ చిన్ని పోటీలో నిలిచారు. 2014, 2019లో సోదరుని వెంట ప్రచార కార్యక్రమాలను పర్యవేక్షించిన కేశినేని చిన్నికే తెలుగుదేశం టిక్కెట్‌ దక్కింది.
రెండు సంవత్సరాలుగా వివిధ సేవా కార్యక్రమాలతో ఎన్టీఆర్‌ జిల్లాలోని ప్రజలకు చిన్ని దగ్గరయ్యారు. ప్రధానంగా అన్న క్యాంటీన్లు నిర్వహించి పేదలకు పట్టెడన్నం పెట్టారు. వైద్యశిబిరాలు, జాబ్‌మేళాలు విరివిగా నిర్వహించారు. పార్లమెంటు పరిధిలోని అన్ని నియోజకవర్గాల నేతలను కలుపుకుని ముందుకెళ్తున్నారు. విజయవాడ లోక్‌సభ నుంచి మూడోసారి సైకిల్‌ పార్లమెంటుకు వెళ్లడం ఖాయంగా కనిపిస్తోందని చెబుతున్నారు. అధికార పార్టీ నేతల అక్రమాలు, అవినీతి దందాతో విసిగిపోయిన ఎన్టీఆర్‌ జిల్లా ప్రజలు ఎన్టీయేను ఆశీర్వదించేందుకు ఎదురు చూస్తున్నారని చెబుతున్నారు.
Vijayawada East Constituency: విజయవాడ పార్లమెంట్ పరిధిలోని తూర్పు నియోజకవర్గం కీలక స్థానం. ఈసారి హ్యాట్రిక్‌ విజయానికి ఇక్కడ తెలుగుదేశం ఉవ్విళ్లూరుతోంది. గత రెండు ఎన్నికల్లో గెలుపొంది మూడోసారి పోటీ చేస్తున్న ఆపార్టీ అభ్యర్థి గద్దె రామ్మోహన్‌ ప్రచారంలో దూసుకుపోతున్నారు. ఈసారి జనసేన తోడవడంతో విజయం ఖాయమనే ధీమా వ్యక్తమవుతోంది. వైసీపీ నుంచి దేవినేని నెహ్రూ తనయుడు దేవినేని అవినాష్ బరిలో ఉన్నారు. 2019లో అవినాష్ తెలుగుదేశంలో ఉండి గుడివాడ నుంచి పోటీ చేసి ఓటమి చెందిన తర్వాత వైసీపీలోకి జంప్‌ అయ్యారు. తర్వాత తూర్పు వైసీపీ ఇన్‌ఛార్జ్‌గా అతడిని నియమించారు. తూర్పులో ఎమ్మెల్యే గద్దె రామ్మోహన్‌ ఉన్నా అనధికారికంగా దేవినేని అవినాష్ వ్యవహరించారు.
నగరపాలక సంస్థ నిధులను కొల్లగొట్టడమే కాకుండా అనేక ఘటనల్లో అవినాష్ అనుచరుల హస్తముందన్న ఆరోపణలు వినిపించాయి. వైసీపీ అధికారం అండ చూసుకుని తెలుగుదేశం అధికార ప్రతినిధి పట్టాభిరామ్‌పై దాడి చేశారు. తెలుగుదేశం కేంద్ర కార్యాలయంపై దాడికి దిగారు. మాజీ కార్పొరేటర్‌ చెన్నుపాటి గాంధీపై తన అనుచరులతో దాడి చేయించారు. మరోవైపు మారిన రాజకీయ సమీకరణాలు అవినాష్‌ను ఇబ్బంది పెట్టాయి. గత ఎన్నికల్లో ఇక్కడ వైసీపీ నుంచి పోటీచేసి ఓడిన బొప్పన భవకుమార్‌ తెలుగుదేశంలో చేరారు. పలువురు సీనియర్‌ నాయకులు వైసీపీకి దూరమయ్యారు. 2019 ఎన్నికల్లో జనసేనకు తూర్పులో దాదాపు 32వేల ఓట్లు వచ్చాయి. ఇవి గద్దెకు అదనపు బలం కానున్నాయి. కేవలం సంక్షేమ పథకాలతోపాటు ఒక్కఛాన్సు ఇవ్వండి అంటూ వైసీపీ అభ్యర్థి దేవినేని అవినాష్ ప్రచారం చేస్తున్నారు. అమరావతి నిర్మాణం ఆగిపోవడం కీలకమైన ప్రభావం చూపనుంది.
Vijayawada Central Constituency: గత ఎన్నికల్లో విజయవాడ సెంట్రల్‌ నియోజకవర్గంలో తెలుగుదేశం త్రుటిలో ఓటమి పాలైంది. కేవలం 25 ఓట్ల తేడాతో వైసీపీ గెలుపొందింది. 2019లో ఇక్కడ గెలిచిన వైసీపీ ఎమ్మెల్యే మల్లాది పనితీరు బాగాలేదనే సాకుతో పక్క నియోజకవర్గం నుంచి మాజీ మంత్రి వెల్లంపల్లి శ్రీనివాస్‌ను వైసీపీ బరిలోకి దించింది. స్థానిక నేతలు, టిక్కెట్‌ రాని తాజా ఎమ్మెల్యే మల్లాది విష్ణు సహాయ నిరాకరణతో వైసీపీ అభ్యర్థి వెల్లంపల్లి శ్రీనివాస్‌ ఎదురీదుతున్నారు. ఎన్నికల కోడ్‌ రాకముందే తాయిలాలు ప్రారంభించారు. వాలంటీర్లను, సచివాలయ ఉద్యోగులను మచ్చిక చేసుకునేందుకు కుక్కర్లు ఇచ్చారు.
ఇవన్నీ పారకపోవడంతోనే సీఎం బస్సుయాత్ర పెట్టి గులకరాయి నాటకానికి తెర తీశారని స్థానిక ప్రజలు అంటున్నారు. పైగా కేసులో వడ్డెరకాలనీ కుటుంబాలను భయభ్రాంతులకు గురి చేశారు. వ్యాపార వర్గాలు, రోజువారీ కూలీలు, అసంఘటిత రంగ కార్మికులు ఎక్కువగా ఉన్న మధ్య నియోజకవర్గంలో ప్రభుత్వం పన్నుల బాదుడుకు ప్రజలు లబోదిబోమంటున్నారు. అమరావతి నిలిచిపోవడంతో తమ వ్యాపారాలు పూర్తిగా దెబ్బతిన్నాయనే అవేదనలో ఉన్నారు. బొండా ఉమ సైతం ప్రచారంలో ముందున్నారు. ఇక్కడి నుంచి ఆయన అసెంబ్లీకి రావడం పక్కాగా కనిపిస్తోంది.
రాజమహేంద్రవరంలో వైఎస్సార్సీపీకి వ్యతిరేకత - కూటమిదే హవా - Rajamahendravaram Constituency
Vijayawada West Constituency: విజయవాడ పశ్చిమ నియోజకవర్గం నుంచి కూటమి తరపున బీజేపీ అభ్యర్థిగా సుజనా చౌదరి బరిలోకి దిగడం ప్రత్యేకతను సంతరించుకుంది. కేంద్ర మాజీమంత్రిగా పనిచేసిన సుజనా తనదైన ప్రచార సరళితో దూసుకెళ్తున్నారు. విజయవాడ పశ్చిమలో వ్యాపార వర్గాలు, మైనార్టీల ఓట్లు కీలకంగా మారాయి. 2019లో గెలుపొందిన వెల్లంపల్లి శ్రీనివాస్‌ విజయవాడ మధ్య నియోజకవర్గానికి మారారు. ఆయన హయాంలో పశ్చిమలో జరిగిన తప్పిదాలు పార్టీకి ప్రతికూలంగా మారాయని సీఎం జగన్‌ భావించారు. ఇంద్రకీలాద్రిపై వేంచేసిన అమ్మవారు సాక్షిగా అవినీతి అక్రమాలు అంతులేకుండా పోయాయి.
అమ్మవారి వెండిసింహాల మాయం నుంచి చీరెల తస్కరణ వరకు వెలంపల్లి దేవదాయ శాఖ మంత్రిగా ఉన్న సమయంలోనే జరిగాయి. వ్యూహాత్మకంగా ఇక్కడ వైసీపీ ఈసారి మైనార్టీ అభ్యర్థి ఆసిఫ్‌ను పోటీలోకి దించింది. పశ్చిమలో ఇతర రాష్ట్రాలకు చెందిన ప్రజలు వివిధ వ్యాపారాల నిమిత్తం వచ్చిన వారున్నారు. పన్నుల బాదుడుతో ఈ వర్గం వారు ప్రభుత్వంపై తీవ్ర వ్యతిరేకతతో ఉన్నారు. ప్రజల రాజధాని నిర్మాణం నిలిచిపోవడంతో వ్యాపారాలు సగానికి సగం పడిపోయాయి. వీరంతా వైసీపీని దెబ్బ తీసేందుకు సిద్ధమవుతున్నారు. మైనార్టీలు సైతం బీజేపీ అభ్యర్థి సుజనాకు మద్దతు ప్రకటించారు. అయితే స్థానికేతరుడని వైసీపీ ప్రచారం చేస్తుండగా దాన్నీ సుజనా సమర్థంగా తిప్పికొడుతున్నారు.
Mylavaram Constituency: ఓటర్లపరంగా రాష్ట్రంలో పెద్ద నియోజకవర్గం మైలవరం. ఇక్కడ రాజకీయ సమీకరణాలు తొలినుంచీ ఆసక్తి రేకెత్తిస్తున్నాయి. వైసీపీ ఎమ్మెల్యే వసంత కృష్ణప్రసాద్‌ ఆ పార్టీకి రాజీనామా చేసి తెలుగుదేశంలో చేరారు. ఆయనతో పాటు వైసీపీ శ్రేణులూ సైకిల్‌ ఎక్కాయి. తెలుగుదేశం వర్గాలు సైతం సాదరంగా స్వాగతం పలికాయి. ఆ పార్టీ టికెట్ ఆశించిన మాజీ మంత్రి దేవినేని ఉమ సైతం విబేధాలు పక్కనపెట్టి వసంత గెలుపునకు కృషిచేస్తున్నారు.
ఇక్కడ వైసీపీ మైలవరం జడ్పీటీసీ సభ్యుడు సర్నాల తిరుపతిరావుని బరిలో దించింది. నియోజకవర్గం ప్రజలకు ఆయన పెద్దగా పరిచయం లేదు. కేవలం సంక్షేమ పథకాలతో పాటు జగన్‌ పేరుతోనే ఆయన ప్రచారం చేస్తున్నారు. దానికి పెద్దగా ఆదరణ లభించట్లేదు. ధాన్యం కొనుగోలులో రైతులు ఎదుర్కొన్న ఇబ్బందులు, ల్యాండ్‌ టైటిలింగ్‌ యాక్టు, పంటల బీమా అందకపోవడం, పెట్టుబడి రాయితీ ఇవ్వకపోవడంతో రైతుల్లో ప్రభుత్వంపై ఆగ్రహం వ్యక్తమవుతోంది. మొత్తంగా ఇక్కడ నుంచి మరోసారి వసంత గెలుపు ఖాయంగా కనిపిస్తోంది.
Nandigama Constituency: తెలుగుదేశం పార్టీకి గట్టి పట్టున్న నియోజకవర్గం నందిగామ. ఇక్కడ ఒక్కసారి మాత్రమే ఓడింది. రాజకీయ చైతన్యం మెండుగా ఉన్న ఈ నియోజకవర్గంలో వైసీపీ ఎమ్మెల్యే, ఎమ్మెల్సీల అరాచకాల పట్ల ప్రజలు విసుగు చెందారు. వైసీపీ నుంచి మొండితోక జగన్మోహన్‌రావు మరోసారి పోటీలో ఉన్నారు. ఆయనకు తోడుగా సోదరుడు ఎమ్మెల్సీ మొండితోక అరుణ్కుమార్ ప్రచార బాధ్యతలు నిర్వహిస్తున్నారు. కమ్యూనిటీ పేరుతో తాయిలాలు వెదజల్లుతున్నారన్న ఆరోపణలు వినిపిస్తున్నాయి.
వైఎస్సార్సీపీ అభ్యర్థులకు ఇంటిపోరు - తలలు పట్టుకున్న అధిష్టానం - Family Politics in YSRCP
తెలుగుదేశం నుంచి మాజీ ఎమ్మెల్యే తంగిరాల సౌమ్య రంగంలో ఉన్నారు. 2014లో తండ్రి తంగిరాల ప్రభాకర్ విజయం సాధించారు. ఆయన మృతితో తంగిరాల సౌమ్య ఉప ఎన్నికల్లో భారీ మెజార్టీతో విజయం సాధించారు. 2019లో వైసీపీ తరపున జగన్మోహన్‌రావు విజయం సాధించారు. ఆయన సోదరుడు అరుణ్‌కుమార్కి ఎమ్మెల్సీ పదవి లభించింది. ఇసుక దందా, మట్టి తవ్వకాలు, సివిల్‌ పంచాయతీలు, భూకబ్జాలు పెద్దఎత్తున జరిగాయి. ప్రతిపక్ష నేతలపై దాడులు నిత్యకృత్యమయ్యాయి. ఈ అరాచకాలను సౌమ్య ధైర్యంగా ఎదుర్కొంటున్నారు. అయితే ఇక్కడ హోరాహోరీ పోరు ఉంది.
Jaggaiyapet Constituency: తెలంగాణ సరిహద్దు నియోజకవర్గం జగ్గయ్యపేటలో అధికారపక్ష ఎమ్మెల్యే, విప్ సామినేని ఉదయభానుకు అవినీతి, అక్రమాల ఆరోపణలు ఆయనకు ప్రతికూలంగా మారాయి. 2014లో ఇక్కడ తెలుగుదేశం తరపున శ్రీరాం తాతయ్య విజయం సాధించారు. 2019లో ఓటమి చెందారు. మళ్లీ ఆయనే పోటీలో ఉన్నారు. పార్టీ బలంగా ఉండటంతో పాటు తెలుగుదేశం అభ్యర్థి శ్రీరాం తాతయ్యకు సౌమ్యుడనే పేరు ఉంది. ఓటమి భయంతో వైసీపీ అభ్యర్థిలో అసహనం పెరిగి కార్యకర్తలపై, నాయకులపై దూషణలకు దిగుతున్నారు.
ఇవి సామాజిక మాధ్యమాల్లో వైరల్‌ అవుతున్నాయి. సీఎం జగన్‌తో సాన్నిహిత్యం ఉందని చెప్పుకొనే సామినేని ఉదయభాను నియోజకవర్గ రైతుల కలల పథకం వేదాద్రి ఎత్తిపోతల పథకానికి శంకస్థాపన చేయించారు. ఏడాదిలో పూర్తి చేస్తామన్న సీఎం మూడేళ్లు గడిచినా పట్టించుకోలేదు. తాగునీరు లేదు. సాగునీరు లేదు. రైతులు తీవ్ర వ్యతిరేకతతో ఉన్నారు. తెలంగాణాకు ఇసుక అక్రమ రవాణా, మద్యం దిగుమతి, సివిల్‌ పంచాయతీల దందా, మట్టి దందాతో వైసీపీ నేతలు ప్రజలను ఇబ్బందులకు గురిచేశారు. ఇవన్నీ ప్రతికూలంగా మారి వైసీపీని భయపెడుతున్నాయి.
ఎన్నికల వేళ - పల్నాడు జిల్లాలో బాంబుల కలకలం - police Found Bomb in Palnadu
Tiruvur Constituency: తెలంగాణ సరిహద్దున ఉన్న మరో నియోజకవర్గం తిరువూరు. తెలుగుదేశం నుంచి రాజధాని ఉద్యమంలో కీలకంగా వ్యవహరించిన కొలికపూడి శ్రీనివాస్‌కు టిక్కెట్‌ ఇచ్చారు. విద్యావంతుడు, విషయ పరిజ్ఞానం ఉన్న వ్యక్తిగా ఆయనకు గుర్తింపు ఉంది. ఆయన ముక్కుసూటిగా వ్యవహరిస్తూ వైసీపీ ఆగడాలను ఎండగడుతున్నారు. తెలుగుదేశం నుంచి వైసీపీలో చేరిన మాజీ ఎమ్మెల్యే నల్లగట్ల స్వామిదాసు అధికార పార్టీ నుంచి రంగంలో ఉన్నారు. 1994,1999లో తిరువూరు నుంచి తెలుగుదేశం తరపున స్వామిదాసు గెలుపొందారు. ఆ తర్వాత 2004, 2009, 2014లో వరుసగా మూడుసార్లు అవకాశం ఇచ్చినా విజయం సాధించలేదు.
2019లో ఆయన స్థానంలో కేఎస్ జవహర్‌ను పోటీలో దించగా ఆయనా ఓటమి చెందారు. 2014, 2019లో వరుసగా వైసీపీ నుంచి రక్షణనిధి విజయం సాధించారు. కానీ మూడోసారి ఆయనకు టిక్కెట్‌ను వైసీపీ ఇవ్వలేదు. దీంతో ఆయన ఆపార్టీకి దూరమయ్యారు. ఐదేళ్ల వైసీపీ పాలనలో చింతలపూడి ఎత్తిపోతల పథకాన్ని పూర్తి చేయలేదు. ఎన్‌ఎస్‌పీ సాగునీరు అందలేదు. దీనిపై రైతులు అసంతృప్తితో ఉన్నారు. సామాజిక వర్గ సమీకరణాలు ఇక్కడ కీలకంగా మారాయి. ఈ ఎన్నికల్లో తటస్థంగా ఉండిపోయిన ఎమ్మెల్యే రక్షణనిధి అనుచరుల మద్దతు కీలకంగా మారింది. ఇక్కడ కూడా నువ్వానేనా అన్నట్లు ఉంది.
