Minister Ponnam Slams Modi Govt Over Budget 2024 : ప్రభుత్వం ప్రవేశపెట్టిన బడ్జెట్లో హైదరాబాద్ నగర మౌలిక సదుపాయాలకు రూ.10 వేల కోట్లు కేటాయించినందుకు సీఎం, డిప్యూటీ సీఎంలకు రవాణాశాఖ మంత్రి పొన్నం ప్రభాకర్ ధన్యవాదాలు తెలిపారు. నగర అభివృద్ధికి ఎలాంటి ఇబ్బందులు లేకుండా నిధులు కేటాయించడం జరిగిందని వివరించారు. అసెంబ్లీలోని మీడియా పాయింట్ వద్ద ఆయన మాట్లాడారు. ఈ సందర్భంగా మంత్రి పొన్నం ప్రభాకర్ కేంద్రమంత్రి కిషన్ రెడ్డి, బీఆర్ఎస్లపై విమర్శలు చేశారు.
కేంద్రమంత్రి కిషన్ రెడ్డి హైదరాబాద్ నగరం నుంచి ప్రాతినిధ్యం వహిస్తున్నారని మంత్రి పొన్నం ప్రభాకర్ చెప్పారు. గతంలో టూరిజం మంత్రిగా హైదరాబాద్కు ఒక్క రూపాయి తీసుకురాలేదని విమర్శించారు. అలాగే గతంలో స్మార్ట్ సిటీ వస్తే కరీంనగర్కు ఇచ్చారని ఇప్పుడు హైదరాబాద్ నగరానికి స్మార్ట్ సిటీ నిధులు తేవాలని డిమాండ్ చేశారు. హైదరాబాద్ నగర అభివృద్ధికి కిషన్ రెడ్డి ఎన్ని నిధులు తెస్తారో చెప్పాలని ప్రశ్నించారు.
కిషన్ రెడ్డి అఖిలపక్షాన్ని మోదీ వద్దకు తీసుకువెళ్తే మేం వస్తాం : ఎంపీలుగా ఉన్న నగరానికి రూపాయి తీసుకురాలేని వాళ్లకు కేంద్రమంత్రులుగా ఉండే అర్హత లేదని మంత్రి పొన్నం ప్రభాకర్ అన్నారు. కేంద్రం తెలంగాణకు గాడిద గుడ్డు ఇచ్చిందని విమర్శించారు. కేంద్రం నిధులు ఇవ్వలేదంటే బీజేపీ వాళ్లు తమపై బురద జల్లారని తీవ్రస్థాయిలో ధ్వజమెత్తారు. కిషన్ రెడ్డి అఖిలపక్షాన్ని మోదీ వద్దకు తీసుకువెళ్తే రావడానికి రాష్ట్ర ప్రభుత్వం సిద్ధంగా ఉందని పేర్కొన్నారు. విభజన హామీలకు సంబంధించిన సమస్యలను పరిష్కారం చేయాల్సిన బాధ్యత కేంద్ర ప్రభుత్వంపై ఉందని తేల్చి చెప్పారు.
హైదరాబాద్ నగరానికి కేంద్రం ఏం ఇస్తుందో కేంద్రమంత్రి కిషన్ రెడ్డి చెప్పాలని మంత్రి పొన్నం ప్రభాకర్ డిమాండ్ చేశారు. బలహీన వర్గాల రిజర్వేషన్లకు ఇబ్బందులు లేకుండానే గ్రామ పంచాయతీ ఎన్నికలకు వెళ్తున్నామని చెప్పారు. గతంలో బిల్లుల విషయంలో మోదీ ప్రభుత్వానికి కేసీఆర్ మద్దతు ఇచ్చి, నీతి ఆయోగ్ సమావేశానికి వెళ్లకుండా ఉన్నారని విమర్శించారు. కేంద్ర బడ్జెట్పై తెలంగాణకు జరిగిన అన్యాయంపై నీతి ఆయోగ్ సమావేశానికి వెళ్లకుండా నిరసన తెలుపుతున్నామని వెల్లడించారు.
కాంగ్రెస్ హయాంలో ఎల్లంపల్లి పూర్తి : కాంగ్రెస్ హయాంలోనే ఎల్లంపల్లి ప్రాజెక్టు పూర్తి అయిందని అన్నారు. తుమ్మిడిహెట్టి వద్ద ప్రాజెక్టు కట్టకపోవడం వలన తెలంగాణ భారీగా నష్టం వాటిల్లిందని తెలిపారు. విహారయాత్రలకు వెళ్లినట్లు బీఆర్ఎస్ నేతలు కాళేశ్వరం ప్రాజెక్టుకు వెళ్లారని ఎద్దేవా చేశారు. రైతులను కాపాడే బాధ్యత కాంగ్రెస్ ప్రభుత్వం తీసుకుందని తేల్చి చెప్పారు.
"ఆనాడు కేంద్రానికి అన్ని బిల్లులకు సపోర్టు చేసి కేవలం నీతి ఆయోగ్ కార్యక్రమాన్ని బహిష్కరించడం ద్వారా మంచిగా పని చేశామంటే సరిపోదు. కానీ మేము బడ్జెట్పై నీతి ఆయోగ్ సమావేశానికి హాజరు కాలేదు. ఇప్పుడు తమ నిరసనను తెలియజేయడానికి అదొక వేదిక మాకు. హైదరాబాద్కు కేంద్రమంత్రి కిషన్ రెడ్డి ఎన్ని నిధులు తీసుకువచ్చారు. ఎంపీలుగా ఉన్న నగరానికి ఒక్క రూపాయి కూడా తీసుకురాలేదు." - పొన్నం ప్రభాకర్, మంత్రి
