KTR Spoke on AMRUT Tenders : 'ఫిబ్రవరిలో అమృత్ 2.0 పథకం కింద టెండర్లు పిలిచారు. రాష్ట్రంలో 8 ప్యాకేజీల కింద అమృత్ పథకం టెండర్లను పిలిచారు. మొత్తం రూ.8,888 కోట్లకు పైగా వ్యయంతో టెండర్లు పిలువగా.. ఈ వివరాలు వెబ్సైట్లో లేవు. సీఎం బావమరిది కంపెనీ శోధ కన్స్ట్రక్షన్కు భారీ పనులు అప్పగించారు. రూ.1,137 కోట్లకు సంబంధించిన పనులు శోధ కంపెనీకి ఇచ్చారు. 2021-22లో శోధ కన్స్ట్రక్షన్స్ నికర ఆదాయం రూ.2.2 కోట్లు మాత్రమే. ఎలాంటి అర్హత లేని చిన్న కంపెనీకి భారీ పనులు అప్పగించారు. టెండర్ల విషయమై కేంద్రమంత్రి మనోహర్లాల్ ఖట్టర్కు ఫిర్యాదు చేశాను. రాష్ట్ర ప్రభుత్వం చేపట్టిన టెండర్లు రద్దు చేయాలని కేంద్రమంత్రిని కోరాను. అమృత పథకం టెండర్ల విషయమై విచారణ చేపట్టాలని కోరినట్లు' బీఆర్ఎస్ కార్యనిర్వాహక అధ్యక్షుడు కేటీఆర్ తెలిపారు. దిల్లీలో జరిగిన మీడియా సమావేశంలో ఆయన మాట్లాడారు.
ఎంపీ ఎన్నికల సమయంలో కాంగ్రెస్పై ప్రధాని ఆరోపణలు చేశారని కేటీఆర్ గుర్తు చేశారు. రాష్ట్రంలో ఆర్ఆర్ ట్యాక్స్ వసూలు చేస్తున్నారని ఆరోపించారు. రాహుల్ గాంధీ, కాంగ్రెస్కు తెలంగాణ ఏటీఎంలా మారిందని ధ్వజమెత్తారు. రాహుల్, రేవంత్ ట్యాక్సు వసూలు చేస్తున్నారన్నారు. రాష్ట్రంలో తప్పులు జరుగుతున్నాయని ఆధారాలతో వివరాలు ఇస్తున్నామని పేర్కొన్నారు. అమృత్ పథకంలో స్కామ్ జరుగుతుంటే కేంద్రం ఏం చేస్తోందని నిలదీశారు.
కేంద్రం సీరియస్గా తీసుకోవాలి : కేంద్రం ఎందుకు చర్యలు తీసుకోవట్లేదని ప్రధానిని ప్రశ్నిస్తున్నానని కేటీఆర్ పేర్కొన్నారు. కాంగ్రెస్ తెలంగాణను ఏటీఎంలా మార్చిందనేది నిజమైతే విచారణ చేపట్టాలని డిమాండ్ చేశారు. అమృత్ పథకం పనులు మంత్రి శ్రీనివాస్రెడ్డి సంస్థలకు కూడా కట్టపెట్టారని తెలిపారు. సొంత వర్గానికి పనులు అప్పగించడం ఎంత వరకు సమంజసమని ప్రశ్నించారు. కేంద్రం తమ ఆరోపణలను సీరియస్గా తీసుకుంటుందని భావిస్తున్నానని చెప్పారు.
అమృత్ పథకం కుంభకోణంపై విచారణ జరిపించాలని కేటీఆర్ కోరారు. దిల్లీకి రేవంత్ రెడ్డి పలుమార్లు వెళ్లి వస్తున్నారని అన్నారు. దిల్లీ నుంచి 26 పైసలు కూడా తెలంగాణకు రాలేదని ఎద్దేవా చేశారు. అల్లుడి కోసం కొడంగల్ను బలిపెట్టే పరిస్థితి తలెత్తిందని అన్నారు. అందుకే కొడంగల్లో తిరుగుబాటు మొదలైందని కేటీఆర్ అన్నారు. అస్మదీయులకు లబ్ధి చేకూర్చారని ఝార్ఖండ్ సీఎంపై కేసు పెట్టారని తెలిపారు.
ప్రధాన ప్రతిపక్షంగా మేం దిల్లీ వస్తాం : రాష్ట్రంలోనూ అదే జరిగితే రేవంత్ రెడ్డి, పొంగులేటిపై ఎందుకు కేసు పెట్టట్లేదని కేటీఆర్ ప్రశ్నించారు. ఆఫీస్ ఆఫ్ ప్రాఫిట్ కింద సోనియా, అశోక్ చవాన్ పదవి వదులుకున్నారని గుర్తు చేశారు. రేవంత్ రెడ్డి, పొంగులేటి కూడా పదవులు వదులుకోవాల్సి వస్తుందన్నారు. రాష్ట్రంలో బడా కాంట్రాక్టర్లు ప్రభుత్వాన్ని నడుపుతున్నారని ఆరోపించారు. సీఎం రేవంత్ రెడ్డి దిల్లీకి 26 సార్లు తిరిగినా 26 పైసలు తీసుకురాలేదని అన్నారు. మరి బీఆర్ఎస్ నేతలు దిల్లీకి ఎందుకు వెళ్తున్నారని ప్రశ్నిస్తున్నారని అంటున్నారని తెలిపారు. ప్రధాన ప్రతిపక్షంగా మేం కచ్చితంగా దిల్లీకి వెళ్తామని చెప్పుకొచ్చారు.
జైల్లో పెడితే యోగా చేసి పాదయాత్రకు సిద్ధమౌతా : కేటీఆర్
'కేసీఆర్ చేసిన అప్పుల్లో ఎక్కువ భాగం వాటికే ఖర్చు చేశారు - అవన్నీ తప్పుడు ఆరోపణలు'
