మళ్లీ అవే అబద్ధాలు చెప్పిన జగన్ - మొత్తం ప్రసంగంలో అదొక్కటే నిజం

CM YS Jagan Election Campaign: ఉత్తరాంధ్ర నుంచి ప్రచారానికి సమరశంఖం పూరించిన జగన్, వైసీపీ శ్రేణులును ఎన్నికలకు సిద్ధం చేసేందుకు ఆపసోపాలు పడ్డారు. విశాఖ కార్యనిర్వాహక రాజధాని ఊసే ఎత్తలేదు. వయసు మళ్లిందంటూ చంద్రబాబుపై విమర్శలు చేశారు. మొత్తంగా నవరత్నాలు తప్ప అభివృద్ధిపై చెప్పుకోవడానికి ఏమీ లేదన్నట్లు జగన్ ప్రసంగం సాగింది.

CM YS Jagan Election Campaign: విశాఖను కార్యనిర్వాహక రాజధాని చేస్తా ! దసరాకు వచ్చేస్తా ! డిసెంబర్‌కు మకాం మార్చేస్తా ! ఇలా నాలుగేళ్లుగా పాడిందే పాట పాడుతున్న జగన్‌, ఎన్నికల శంఖారావంలో కనీసం మాట కూడా మాట్లాడలేదు ! ఉత్తరాంధ్ర గడ్డపై ర్యాంప్‌ షో చేసి కనీసం ఆ ఊసే ఎత్తలేదు, ఆ ప్రాంతానికి ఏం చేస్తారో కూడా చెప్పలేదు ! నవరత్నాలు తప్ప చెప్పుకోడానికేమీలేదన్నట్లుగా, ఎన్నికలకు వైసీపీ శ్రేణుల్ని సమాయాత్తం చేయడానికి జగన్‌ ఆపసోపాలు పడ్డారు.

విశాఖ జిల్లా భీమిలి నియోజకవర్గం పరిధిలోని సంగివలస వద్ద ‘సిద్ధం’పేరిట బహిరంగ సభ నిర్వహించిన జగన్‌ అక్కడి నుంచే ఎన్నికల ప్రచారానికి శంఖారావం పూరించారు. ఎప్పుడూ అరగంటలోపే ప్రసంగం ముగించే జగన్‌, ఈసారి గంట 15 నిమిషాలపాటు మాట్లాడారు. పేదలు, పెత్తందార్ల మధ్య యుద్ధం అంటూ పాతపాట పాడారు. ఎప్పుడూ చెప్పే నవరత్నాల గురించి తప్ప అభివృద్ధి గురించి ఏమీ చెప్పుకోలేకపోయారు.

ఉత్తరాంధ్ర వేదికగా సభ పెట్టిన జగన్‌ అసలు ఆ ప్రాంతానికి ఏం చేశారు ? ఏం ప్రాజెక్టులు తెచ్చారో ఒక్క ముక్కకూడా చెప్పలేదు. చివరకు, విశాఖకు మకాం మారుస్తా అంటూ గతంలో అనేకమార్లు మాటలతో మభ్యపెట్టిన జగన్‌, ఈ సారి పాలనా రాజధాని ఊసెత్తనేలేదు. 3 రాజధానులే అజెండాగా వచ్చే ఎన్నికలంటూ వైసీపీ నాయకులు గతంలో సవాళ్లు కూడా విసిరారు. కానీ జగన్‌ మాత్రం విశాఖ రాజధాని సంగతేంటో సభలో తేల్చనేలేదు.