తాడేపల్లికి చేరిన చిలకలూరిపేట 6.5 కోట్ల పంచాయితీ - జగన్​కు ఆధారాలు అందజేత

Mallela Rajesh met CM YS Jagan: పల్నాడు జిల్లా చిలకలూరిపేట వైఎస్సార్సీపీలో అంతర్గత విభేదాలు భగ్గుమంటున్నాయి. మంత్రి విడుదల రజని, మల్లెల రాజేశ్ మధ్య రాజుకున్న వివాదం చివరికి సీఎంవోకు చేరింది. మంత్రి విడదల రజని డబ్బు వసూలు చేసిన వ్యవహారంపై సీఎం జగన్​కు ఫిర్యాదు చేసిన రాజేశ్​ అందుకు సంబంధించి ఆధారాలు కూడా అందించినట్లు తెలిసింది.

Mallela Rajesh met CM YS Jagan : పల్నాడు జిల్లా చిలకలూరిపేట వైసీపీ పంచాయతీ తాడేపల్లికి చేరింది. సీఎంవో నుంచి పిలుపు రావడంతో చిలకలూరిపేట వైసీపీ నేత మల్లెల రాజేష్ నాయడు సీఎం వైఎస్ జగన్​ను కలిశారు. చిలకలూరిపేట స్థానిక ఎమ్మెల్యే విడుదల రజినికి గుంటూరు వెస్ట్ టికెట్​ను పార్టీ అధిష్ఠానం ఖరారు చేసింది. నూతన ఇన్​చార్జిగా మల్లెల రాజేష్ నాయుడును నియమించి ఆ తర్వాత కొద్ది రోజులకే బాధ్యతల నుంచి తప్పించింది. ఇటీవలే చిలకలూరిపేట అసెంబ్లీ అభ్యర్థిగా కావటి మనోహర్ నాయుడును నియమించింది. ఈ క్రమంలో మల్లెల రాజేష్ పార్టీలో తనకు జరిగిన అన్యాయంపై అధిష్ఠానంపై విమర్శలు గుప్పించారు. పైగా తాను ఆరున్నర కోట్ల రూపాయలు రజినీకి ఇచ్చానని బహిరంగంగా ప్రకటించారు. ఈ విషయంలో సజ్జల జోక్యం చేసుకుని రూ. 3 కోట్లు తిరిగి ఇప్పించారని తెలిపారు.

ఎమ్మెల్యే సీటు కోసం మంత్రి విడదల రజినికి రూ. 6 కోట్లు ఇచ్చినట్లు మల్లెల రాజేష్ బహిరంగంగా ఆరోపణలు చేశారు. పార్టీ ప్రధాన కార్యదర్శి సజ్జలకు ఫిర్యాదు చేస్తే రూ. 3 కోట్లు తిరిగి ఇచ్చారని తెలిపారు. మిగిలిన డబ్బు ఇవ్వాలని మంత్రి రజినిని కోరితే దిక్కున్నచోట చెప్పుకోమన్నారని రాజేష్ ఆరోపించారు. మల్లెల రాజేష్ ఆరోపణలు సంచలనం రేకెత్తించడంతో ఈ వ్యవహారంపై సీఎం జగన్ దృష్టి పెట్టారు. మల్లెల రాజేష్ను సీఎంవోకి పిలిపించి సజ్జల రామకృష్ణారెడ్డి (Sajjala Ramakrishna Reddy) మాట్లాడారు. అనంతరం సీఎంతో సమావేశమైన మల్లెల రాజేష్ మంత్రి విడదల రజిని డబ్బు వసూలు చేసిన వ్యవహారంపై జగన్​కు ఫిర్యాదు చేశారు. దీనికి సంబంధించిన సీఎంకు ఆధారాలు కూడా అందించినట్లు తెలిసింది. పంచాయితీ దృష్ట్యా నరసారావుపేట ఎంపీ అభ్యర్థి అనిల్ కుమార్ యాదవ్ సైతం సీఎంవోకు చేరుకున్నారు.