'మేడిగడ్డ బ్యారేజ్‌లో కొన్ని పిల్లర్లు కుంగిపోతే - కాళేశ్వరం ప్రాజెక్టు మొత్తం పోయినట్లు మాట్లాడుతున్నారు'

BRS Chalo Medigadda Tour : చలో మేడిగడ్డలో భాగంగా బీఆర్​ఎస్ నేతల బృందం అన్నారం బ్యారేజీని సందర్శించింది. ఈ సందర్భంగా అక్కడ ఏర్పాటు చేసిన సభలో కాళేశ్వరం ప్రాజెక్టుపై స్టేషన్​ ఘన్​పూర్​ ఎమ్మెల్యే కడియం శ్రీహరి పవర్​ పాయింట్​ ప్రజెంటేషన్​ ఇచ్చారు. మేడిగడ్డ బ్యారేజ్‌లో కొన్ని పిల్లర్లు కుంగిపోతే, ప్రాజెక్టు మొత్తం పోయినట్లు మాట్లాడుతున్నారని మండిపడ్డారు.

BRS Chalo Medigadda Tour : కాళేశ్వరంలో భాగమైన మేడిగడ్డ బ్యారేజ్‌లో కొన్ని పిల్లర్లు డ్యామేజ్‌ అయ్యాయని స్టేషన్​ ఘన్​పూర్​ ఎమ్మెల్యే కడియం శ్రీహరి పేర్కొన్నారు. కొన్ని పిల్లర్లు కుంగిపోతే, ప్రాజెక్టు మొత్తం పోయినట్లు మాట్లాడుతున్నారని మండిపడ్డారు. మేడిగడ్డకు సీఎం బృందం వచ్చి ప్రజలకు తప్పుడు సమాచారం ఇచ్చిందని ఆయన ఆరోపించారు. ఈ క్రమంలోనే బీఆర్​ఎస్​ మేడిగడ్డ పర్యటన వార్తల్లో రాకూడదనే కాంగ్రెస్‌ పోటీ యాత్రలు పెట్టిందని ధ్వజమెత్తారు. తాము వాస్తవాలు చెప్పేందుకు బయలుదేరినప్పుడే పోటీ కార్యక్రమాలు పెడుతున్నారని దుయ్యబట్టారు. కృష్ణా జలాలపై నల్గొండ సభకు వెళ్లిన రోజే మేడిగడ్డ పర్యటన చేపట్టారని, తాము మేడిగడ్డకు వస్తుంటే పాలమూరు పర్యటన చేపట్టారని ధ్వజమెత్తారు.

చలో మేడిగడ్డలో భాగంగా ముందుగా మేడిగడ్డ బ్యారేజీని పరిశీలించిన బీఆర్​ఎస్ నేతల బృందం, ఆ తర్వాత అన్నారం బ్యారేజీని సందర్శించింది. ఈ సందర్భంగా అక్కడ ఏర్పాటు చేసిన సభలో కాళేశ్వరం ప్రాజెక్టుపై స్టేషన్​ ఘన్​పూర్​ ఎమ్మెల్యే కడియం శ్రీహరి పవర్​ పాయింట్​ ప్రజెంటేషన్​ ఇచ్చారు. కాళేశ్వరం అంటే 3 బ్యారేజీలు, 15 రిజర్వాయర్లు, 19 సబ్‌స్టేషన్లు, 21 పంప్‌హౌస్‌లు అని ఆయన వివరించారు. కాళేశ్వరంలో 203 కిలోమీటర్ల సొరంగాలు, 1,531 గ్రావిటీ కాలువలు, 98 కిలోమీటర్ల ప్రెజర్‌ మెయిన్స్‌ ఉన్నాయని తెలిపారు. ఈ క్రమంలోనే సీడబ్ల్యూసీ అనుమతులు లేకుండానే పనులు ప్రారంభించారని అంటున్నారన్న ఆయన, కేంద్ర జల వనరుల సంఘం నుంచి ప్రాజెక్టులకు అన్ని అనుమతులు పొందామని స్పష్టం చేశారు.

కాళేశ్వరం అంటే 3 బ్యారేజ్‌లు, 15 రిజర్వాయర్లు, 19 సబ్‌స్టేషన్లు, 21 పంప్‌హౌస్‌లు, 203 కిలోమీటర్ల సొరంగాలు, 1,531 గ్రావిటీ కాలువలు, 98 కిలోమీటర్ల ప్రెజర్‌ మెయిన్స్‌. మేం వాస్తవాలు చెప్పేందుకు బయలుదేరినప్పుడే పోటీ కార్యక్రమాలు పెడుతున్నారు. కృష్ణా జలాలపై నల్గొండ సభకు వెళ్లిన రోజే మేడిగడ్డ పర్యటన చేపట్టారు. మేడిగడ్డకు మేం వస్తుంటే, కాంగ్రెస్​ నేతలు పాలమూరు పర్యటన చేపట్టారు. - కడియం శ్రీహరి, స్టేషన్​ ఘన్​పూర్​ ఎమ్మెల్యే

ప్రభుత్వం రైతులను మోసం చేస్తుంది : అంతకుముందు జయశంకర్ భూపాలపల్లి జిల్లాలోని బీఆర్​ఎస్​ కార్యాలయంలో మాట్లాడిన మాజీ మంత్రి హరీశ్​రావు ప్రాజెక్టులతో రాష్ట్ర ప్రభుత్వం రాజకీయం చేస్తోందని ఆరోపించారు. మేడిగడ్డలో 3 పిల్లర్లు కుంగితే, ఏదో జరిగినట్టు చేస్తున్నారని వ్యాఖ్యానించారు. రైతులను ప్రభుత్వం మోసం చేస్తోందని, అన్నదాతలకు కాంగ్రెస్‌ సర్కార్‌ క్షమాపణ చెప్పాలని డిమాండ్‌ చేశారు.