Sorakaya Tapilentu Recipe : మనలో చాలా మందికి ఈవెనింగ్ టైమ్లో ఏదైనా స్నాక్స్ తినాలనిపిస్తుంటుంది. దీంతో ఎక్కువ మంది ఇంట్లోనే ఆనియన్ పకోడి, మిర్చీ బజ్జీ, సమోస చేసుకోవడమో.. లేదా బయట తినడమో చేస్తుంటారు. అయితే, స్నాక్స్ ఎప్పుడూ ఒకే విధంగా చేస్తే బోర్ అనిపిస్తుంది. అలాంటప్పుడు ఒక్కసారి ఈ స్టోరీలో చెప్పిన విధంగా సొరకాయ తపిలెంటు ప్రిపేర్ చేయండి. క్రిస్పీగా కారంగా ఉండే తపిలెంటు పిల్లలు ఎంతో ఇష్టంగా తింటారు. ఈ రెసిపీని మన అమ్మమ్మలు, నానమ్మలు ఎక్కువగా చేసుకుని తినేవారు. కమ్మగా ఉండే ఈ తపిలెంటు ఆరోగ్యానికి ఎంతో మంచిది. మరి ఇక ఆలస్యం చేయకుండా సింపుల్గా సొరకాయ తపిలెంటు ఎలా చేయాలి ? దానికి కావాల్సిన పదార్థాలు ఏంటో ఇప్పుడు చూద్దాం.
కావాల్సిన పదార్థాలు :
- బియ్యం పిండి-పావు కేజీ
- సొరకాయ- చిన్నది
- ఉల్లిపాయలు-2
- పచ్చిమిర్చి-4
- కరివేపాకు-2 రెమ్మలు
- ఉప్పు-రుచికి సరిపడా
- పచ్చిశనగపప్పు-పావుకప్పు
- జీలకర్ర-టీస్పూన్
- నూనె సరిపడా
- కొత్తిమీర
తయారీ విధానం:
- ముందుగా సొరకాయను శుభ్రం చేసి పైన పొట్టు తీసేసుకోవాలి. ఆపై సన్నగా తురుముకోవాలి. అలాగే ఉల్లిపాయ, పచ్చిమిర్చి, కరివేపాకు, కొత్తిమీర సన్నగా కట్ చేసుకోవాలి.
- అలాగే పచ్చిశనగపప్పు అరగంటపాటు నీటిలో నానబెట్టుకోవాలి.
- ఇప్పుడు ఒక మిక్సింగ్ బౌల్లోకి సొరకాయ తురుము, ఉల్లిపాయ, పచ్చిమిర్చి, కరివేపాకు, కొత్తిమీర తురుము, నానబెట్టిన పచ్చిశనగపప్పు, జీలకర్ర వేసి బాగా కలపండి.
- తర్వాత బియ్యం పిండి, రుచికి సరిపడా ఉప్పు వేసుకుని చేతితో మిక్స్ చేయండి. (అవసరమైతే కొన్ని నీళ్లు కలుపుకోవచ్చు. పిండి కాస్త గట్టిగానే ఉండాలి)
- ఇప్పుడు ఒక పెనం తీసుకుని ఆయిల్ రాయండి. తర్వాత కొద్దిగా పిండి తీసుకుని పెనంపై రొట్టె మాదిరిగా చేతితో రెడీ చేసుకోండి.
- ఆపై పెనం స్టౌపై పెట్టి దోరగా కాల్చుకోండి.
- తపిలెంటు లోపల కూడా చక్కగా ఉడకడానికి పాన్పై మూతపెట్టండి. తపిలెంటు ఒకవైపు కాలిన తర్వాత మరోవైపు తిప్పి రంగు మారే వరకు కాల్చుకోండి.
- అంతే ఇలా సింపుల్గా మిగిలిన పిండితో చేసుకుంటే ఎంతో రుచికరమైన సొరకాయ తపిలెంటు మీ ముందుంటుంది.
- నచ్చితే ఈ విధంగా ఈవెనింగ్ స్నాక్ ఓ సారి ట్రై చేయండి.
ఇవి కూడా చదవండి :
ఫాస్ట్ఫుడ్ సెంటర్లో తింటే డేంజర్ - ఇంట్లోనే "ఎగ్ నూడుల్స్" ఇలా చేసుకోండి!
క్రిస్పీ అండ్ టేస్టీ "తోటకూర గారెలు" - ఇలా చేశారంటే టేస్ట్ అదుర్స్!
