Sankranti 2025 Special Spicy Recipes : సంక్రాంతి వస్తోందనగానే అరిసెలు ముందుగా గుర్తొస్తాయి. ఆ తర్వాత సకినాలు, అప్వాలు, లడ్డూలు వంటి మిగతా వంటకాలను చేసేందుకు వారం పది రోజుల ముందు నుంచే రెడీ అయిపోతుంటారు చాలా మంది మహిళలు. అయితే, అవి మాత్రమే కాకుండా ఈ పొంగల్కి మీకోసం కొన్ని వెరైటీ రెసిపీలు తీసుకొచ్చాం. వాటిపై కూడా ఓ లుక్కేయండి.
రిబ్బన్ పకోడా :
కావాల్సిన పదార్థాలు :
- శనగపిండి - అర కప్పు
- బియ్యప్పిండి - ఒకటిన్నర కప్పులు
- పుట్నాల పొడి - అర కప్పు
- ఉప్పు - రుచికి సరిపడా
- కారం - 1 టేబుల్స్పూన్
- నువ్వులు - 3 టేబుల్స్పూన్లు
- జీలకర్ర - 1 టేబుల్స్పూన్
- వేడి నూనె - 3 టేబుల్స్పూన్లు
- వాటర్ - తగినంత
- నూనె - వేయించడానికి సరిపడా
తయారీ విధానం :
- ఇందుకోసం ముందుగా ఒక మిక్సింగ్ బౌల్ తీసుకొని అందులో జల్లించుకున్న శనగపిండి, బియ్యప్పిండి, పుట్నాల పొడి, ఉప్పు, కారం వేసుకొని ఒకసారి కలుపుకోవాలి.
- ఆ తర్వాత అందులో కచ్చాపచ్చాగా దంచుకున్న జీలకర్ర, నువ్వులు, వేడి నూనె వేసుకొని మరోసారి మిక్స్ చేసుకోవాలి. ఆపై తగినన్ని వాటర్ యాడ్ చేసుకుంటూ పిండిని మరీ గట్టిగా కాకుండా మృదువుగా తడిపి పక్కన ఉంచుకోవాలి.
- ఇప్పుడు స్టౌపై కడాయి పెట్టుకొని ఆయిల్ వేసి వేడి చేసుకోవాలి. నూనె వేడయ్యే లోపు మురుకుల గొట్టం తీసుకొని అందులో రిబ్బన్ పకోడా వచ్చేలా ఉన్న అచ్చును సెట్ చేసుకోవాలి. ఆపై దానికి నూనె రాసి ముందుగా ప్రిపేర్ చేసుకున్న పిండిలో నుంచి కొద్దిగా పిండి ముద్దను తీసుకొని పెట్టుకోవాలి.
- అనంతరం ఆయిల్ బాగా వేడయ్యాక మురుకుల గొట్టంతో రిబ్బన్ పకోడాను వత్తుకోవాలి. ఆపై మీడియం ఫ్లేమ్ మీదు రెండు వైపులా గోల్డెన్ కలర్లోకి వచ్చేంత వరకు వేయించుకోవాలి.
- ఆవిధంగా వేయించుకున్నాక ఒక ప్లేట్లోకి తీసుకొని కాస్త చల్లార్చుకొని డబ్బాలో స్టోర్ చేసుకుంటే చాలు. అంతే.. ఎంతో రుచికరంగా ఉండే "రిబ్బన్ పకోడా" రెడీ!
సగ్గుబియ్యంతో పసందైన వంటలు - టేస్ట్ సూపర్! తింటే వదిలిపెట్టరు!
బియ్యం చెక్కలు :
కావాల్సిన పదార్థాలు :
- పచ్చిమిర్చి - 10 నుంచి 12
- అల్లం - 3 అంగుళాల ముక్క
- ఉప్పు - రుచికి సరిపడా
- జీలకర్ర - ఒకటిన్నర టేబుల్స్పూన్లు
- పొడి బియ్యప్పిండి - అరకిలో
- పెసరపప్పు - పావు కప్పు
- సగ్గుబియ్యం - పావు కప్పు
- బటర్ - 50 గ్రాములు
- కరివేపాకు - 3 రెమ్మలు
- నువ్వులు - 4 టేబుల్స్పూన్లు
- నూనె - వేయించడానికి సరిపడా
తయారీ విధానం :
- ఇందుకోసం ముందుగా పెసరపప్పు, సగ్గు బియ్యాన్ని శుభ్రంగా కడిగి కనీసం గంటపాటు నానబెట్టుకోవాలి.
- ఈలోపు మిక్సీ జార్ తీసుకొని అందులో పచ్చిమిర్చి, అల్లం, ఉప్పు, జీలకర్ర వేసుకొని కాస్త బరకగా గ్రైండ్ చేసుకొని పక్కన ఉంచుకోవాలి.
- ఇప్పుడు ఒక వెడల్పాటి మిక్సింగ్ బౌల్లో పొడి బియ్యప్పిండిని తీసుకోవాలి. ఆపై అందులో మిక్సీ పట్టుకున్న పచ్చిమిర్చి పేస్ట్, నానబెట్టుకున్న పెసరపప్పు, సగ్గుబియ్యం, బటర్ లేదా వేడి నూనె వేసుకొని మొత్తం కలిసేలా ఒకసారి బాగా కలుపుకోవాలి.
- ఆ తర్వాత అందులో కరివేపాకు తరుగు, నువ్వులు వేసుకోవాలి. ఆపై వేడి నీటిని కొద్దికొద్దిగా యాడ్ చేసుకుంటూ చపాతీ పిండి కంటే కొద్దిగా గట్టిగా అంటే సెమీ సాఫ్ట్గా కలుపుకోవాలి. ఈ దశలోనే ఉప్పు చూసుకుని సరిపోకపోతే యాడ్ చేసుకోవాలి.
- ఆ విధంగా పిండిని ప్రిపేర్ చేసుకున్నాక కొద్దికొద్దిగా పిండిని తీసుకుంటూ చిన్న చిన్న ఉండలుగా చేసుకోవాలి.
- ఇప్పుడు పాలిథిన్ కవర్పై నూనె లేదా నెయ్యి రాసి ఓ ఉండను పెట్టి చేతి వేళ్ల సాయంతో గుండ్రంగా వత్తుకోవాలి. అలాని మరీ పల్చగా, మందంగా కాకుండా ఓ మాదిరిగా వత్తుకోవాలి.
- అనంతరం స్టౌపై కడాయి పెట్టుకొని నూనె వేసుకొని వేడి చేసుకోవాలి. ఆయిల్ వేడయ్యాక మీరు ప్రిపేర్ చేసుకున్న చెక్కలను ఒక్కొక్కటిగా వేసుకోవాలి.
- ఆపై మంటను మీడియం ఫ్లేమ్లో ఉంచి ముందు కాస్త ఉడకనిచ్చి ఆ తర్వాత మరోవైపునకు తిప్పుకొని వేయించుకోవాలి. రెండు వైపులా చెక్కలు లైట్ బ్రౌన్ కలర్లోకి వచ్చేంత వరకు కాల్చుకున్నాక తీసి పక్కకు పెట్టుకోవాలి.
- ఇలా అన్నింటిని చేసుకుని చల్లారిన తర్వాత గాలి చొరబడని డబ్బాలో స్టోర్ చేసుకుంటే చాలు. అంతే.. ఎంతో టేస్టీగా ఉండే "బియ్యం చెక్కలు" రెడీ!
"కజ్జికాయలు" - కొందరు చేసినవే ఎందుకు సూపర్ టేస్టీగా ఉంటాయో తెలుసా? - ఈ టిప్స్ ఫాలో అవుతారు!
కొబ్బరి మసాలా మురుకులు :
కావాల్సిన పదార్థాలు :
- బియ్యప్పిండి - 2 కప్పులు
- నల్ల నువ్వులు - చెంచా
- ఉప్పు - రుచికి సరిపడా
- తాజా కొబ్బరి తురుము - అర కప్పు
- ఆయిల్ - వేయించేందుకు సరిపడా
- జీలకర్ర - అరచెంచా
- వెల్లుల్లి రెబ్బలు - 5
- చిన్న ఉల్లిపాయలు - 4
తయారీ విధానం :
- ఇందుకోసం ముందుగా మిక్సీ జార్ తీసుకొని అందులో కొబ్బరితురుము, జీలకర్ర, వెల్లుల్లి రెబ్బలు, చిన్న ఉల్లిపాయలు, తగినంత ఉప్పు వేసుకుని మెత్తని పేస్టులా మిక్సీ పట్టుకొని పక్కన ఉంచుకోవాలి.
- ఇప్పుడు స్టౌపై కడాయిని పెట్టి బియ్యప్పిండి వేసి దోరగా వేయించుకోవాలి. ఆ విధంగా వేయించుకున్నాక అందులో మిక్సీ పట్టుకున్న మసాలా మిశ్రమాన్ని వేసి కలుపుకోవాలి.
- ఆ తర్వాత అందులో కొద్దికొద్దిగా వేడినీళ్లు యాడ్ చేసుకుంటూ మురుకల పిండిలా చేసుకొని స్టౌ ఆఫ్ చేసుకోవాలి.
- అనంతరం అందులో నల్ల నువ్వుల్ని కూడా కలిపి పిండిపై తడి వస్త్రాన్ని కప్పి పక్కనుంచాలి.
- ఇప్పుడు స్టౌపై కడాయి పెట్టి ఆయిల్ వేసుకొని వేడి చేసుకోవాలి. నూనె వేడయ్యేలోపు జంతికల గొట్టానికి నూనె రాసి అందులో మీరు కలిపిపెట్టుకున్న మిశ్రమాన్ని కొద్దిగా తీసుకుని సిద్ధం ఉంచుకోవాలి.
- నూనె కాగిందనుకున్నాక దానిలో మురుకుల గొట్టం తీసుకొని పిండిని మురుకుల్లా వత్తుకోవాలి. ఆ తర్వాత ఎర్రగా వేయించుకుని తీసుకుంటే చాలు. అంతే.. సూపర్ టేస్టీగా ఉండే "కొబ్బరి మసాలా మురుకులు" మీ ముందు ఉంటాయి!
బియ్యప్పిండితో జంతికలు చేస్తే గట్టిగా వస్తున్నాయా? - ఇలా ట్రై చేస్తే కరకరలాడుతూ గుల్లగా వస్తాయి!
