టేస్టీ "పెప్పర్​ రైస్" - ఇలా చేస్తే పిల్లలు లంచ్​ బాక్స్​ ఖాళీ చేసేస్తారు!

- రోజూ లంచ్​ బాక్స్​లో నార్మల్​ రైస్ పెడుతున్నారా? - ఈ పెప్పర్ రైస్​ ఓసారి ట్రై చేయాల్సిందే!

Pepper Rice Recipe : ఉదయాన్నే ఇతర పనులన్నీ చేసుకుంటూ.. మరోవైపు పిల్లల కోసం లంచ్​ బాక్స్ రెడీ చేయడం తల్లులకు రోజూ సవాలే. ఇంటి పనులు మొదలు బ్రేక్​ఫాస్ట్​ తయారు చేసి.. మళ్లీ లంచ్​ బాక్స్​ ప్రిపేర్​ చేయడం, ఇతరత్రా పనులు చూసుకోవడంతో అంతా హడావిడిగా ఉంటుంది. దీంతో.. ఉన్న కాస్త టైమ్​లోనే వైట్​ రైస్​ వండి.. ఏదోక కర్రీ బాక్స్​లో పెట్టి పిల్లలని స్కూల్​కి పంపిస్తుంటారు. నిత్యం ఇదే పరిస్థితి కావడంతో.. కొన్నిసార్లు పిల్లలు ఆ లంచ్​ బాక్స్​ పూర్తిగా తినకుండానే ఇంటికి తీసుకొస్తుంటారు. మీ పిల్లలు కూడా ఇలానే చేస్తున్నారా ? అయితే, మీ కోసమే స్పెషల్ లంచ్ బాక్స్​ తీసుకొచ్చాం. అదే టేస్టీ అండ్​ హెల్దీ "పెప్పర్​ రైస్".

ఈ స్టోరీలో చెప్పిన విధంగా పెప్పర్​ రైస్​ ప్రిపేర్​ చేసి పెడితే మెతుకు కూడా మిగల్చకుండా ఎంతో ఇష్టంగా లాగిస్తారు. ఈ రైస్​ చేయడానికి ఎక్కువ టైమ్​ కూడా పట్టదు. మరి, ఇంకెందుకు ఆలస్యం? నిమిషాల్లోనే ఈ రైస్​ని ఎలా తయారు చేయాలో ఇప్పుడు చూద్దాం.

పెప్పర్​ రైస్​ కోసం కావాల్సిన పదార్థాలు :

• ఉల్లిపాయలు-2
• ఎండుమిర్చిలు-4
• నూనె - సరిపడా
• అన్నం-2 కప్పులు
• మిరియాలు- టేబుల్​స్పూన్​
• జీలకర్ర- టీస్పూన్​
• వెల్లుల్లి రెబ్బలు-15
• కరివేపాకు-2
• టమాటా- 2
• పసుపు-అర టీస్పూన్
• ఇంగువ- చిటికెడు
• జీడిపప్పులు-కొద్దిగా
• కొత్తిమీర-కొద్దిగా

పెప్పర్​ రైస్​ తయారీ విధానం..

• ముందుగా పాన్​లో కొద్దిగా నూనె వేసుకోండి. (మీకు నచ్చితే ఈ రైస్​ చేయడానికి నెయ్యిని కూడా ఉపయోగించుకోవచ్చు.)
• నూనె వేడయ్యాక గిన్నెలో ఎండుమిర్చి, మిరియాలు, జీలకర్ర వేసి వేపండి. ఎండుమిర్చి, మిరియాలు దోరగా వేగిన తర్వాత వాటిని తీసి కచ్చాపచ్చాగా దంచుకోండి.
• ఇప్పుడు అదే పాన్​లో కొద్దిగా నూనె​ వేసి దంచిన వెల్లుల్లి రెబ్బలు, కరివేపాకు వేయండి. వెల్లుల్లి గోల్డెన్ బ్రౌన్​ కలర్​లోకి మారిన తర్వాత ఇంగువ, జీడిపప్పులు, ఉల్లిపాయ ముక్కలు వేసి ఫ్రై చేయండి.
• అలాగే టమాటా ముక్కలు వేసి కొద్దిసేపు మగ్గించండి. ఇప్పుడు పసుపు, రుచికి సరిపడా ఉప్పు వేసి వేపండి.
• తర్వాత పొడిపొడిగా వండుకున్న అన్నం వేసి మిక్స్​ చేయండి. అలాగే కచ్చాపచ్చాగా దంచుకున్న ఎండుమిర్చి-మిరియాల పొడి వేసి బాగా కలపండి.
• స్టౌ ఆఫ్​ చేసే ముందు కాస్త కొత్తిమీర చల్లి దింపుకుంటే సరిపోతుంది.
• అంతే.. ఇలా సింపుల్​గా చేస్తే కేవలం ఐదు నిమిషాల్లోనే మీ ముందు వేడివేడి పెప్పర్​ రైస్ తయారైపోతుంది.
• ఈ రైస్​ ఒక్కసారి తిన్నారంటే.. తప్పకుండా మళ్లీ ప్రిపేర్​ చేసుకుంటారు.
• నచ్చితే మీరు కూడా ఇంట్లో ఈ పెప్పర్​ రైస్​ తయారు చేసేయండి.

ఇవి కూడా చదవండి :