How to Make Andhra Style Pappu Charu : ఎక్కువ మంది ఫేవరెట్ డిష్లలో ఒకటి.. పప్పుచారు. అయితే, కొంతమందికి పప్పుచారును ఎన్నిసార్లు ప్రిపేర్ చేసుకున్నా.. ఏదో మిస్ అయిన ఫీలింగ్ వస్తుంటుంది. టేస్ట్ అంత రుచికరంగా అనిపించదు. దీంతో పప్పుచారు బాలేదని ఫీల్ అవుతుంటారు. అయితే అలా బాధపడేవారు ఈ పక్కా కొలతలతో ఓసారి ఆంధ్ర స్టైల్ పప్పుచారును ప్రిపేర్ చేసుకోండి. రుచి అద్దిరిపోతుంది! అంతేకాదు.. నచ్చితే ఎంచక్కా నేరుగానూ తాగేయొచ్చు. మరి, సూపర్ టేస్టీ పప్పుచారు తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలో ఈ స్టోరీలో తెలుసుకుందాం.
కావాల్సిన పదార్థాలు :
- కందిపప్పు - 1 కప్పు(100 గ్రాములు)
- చింతపండు - నిమ్మకాయ సైజంత
- పసుపు - పావు టీస్పూన్
- టమాటా - 1
- ఉల్లిపాయ - 1(చిన్నది)
- పచ్చిమిర్చి - 6
- నూనె - 2 టీస్పూన్లు
- కరివేపాకు - 2 రెమ్మలు
- ఉప్పు - రుచికి సరిపడా
- కారం - తగినంత
- కొత్తిమీర తరుగు - కొద్దిగా
తాలింపు కోసం :
- నూనె - 1 టేబుల్స్పూన్
- ఆవాలు - అర టీస్పూన్
- జీలకర్ర - అర టీస్పూన్
- వెల్లుల్లి రెబ్బలు - 5
- సన్నని ఉల్లిపాయ ముక్కలు - కొన్ని
- ఇంగువ - అర టీస్పూన్
- ఎండుమిర్చి - 3
- కరివేపాకు - 2 రెమ్మలు
"మైసూర్ స్టైల్ టమాటా రసం" - రుచి అమోఘంగా ఉంటుంది! - ఇలా ప్రిపేర్ చేయండి!
తయారీ విధానం :
- ఇందుకోసం ముందుగా కుక్కర్లో కందిపప్పును తీసుకొని శుభ్రంగా కడగాలి. ఆపై అందులో మీరు పప్పు తీసుకున్న కప్పుతో రెండు కప్పుల వాటర్ పోసుకొని అరగంటపాటు నానబెట్టుకోవాలి. ఇలా చేయడం వల్ల పప్పు త్వరగా ఉడుకుతుంది.
- ఆలోపు మీరు మరో బౌల్లో చింతపండు తీసుకొని కడిగి నానబెట్టుకోవాలి. అలాగే.. ఉల్లిపాయ, టమాటాను సన్నగా పొడుగ్గా కట్ చేసుకొని పక్కన పెట్టుకోవాలి. పచ్చిమిర్చిని నిలువు చీలికలుగా కట్ చేసుకొని పక్కన ఉంచుకోవాలి.
- అరగంట అయ్యాక.. కుక్కర్ మూత తీసి అందులో పసుపు, ముందుగా కట్ చేసి పెట్టుకున్న టమాటా, ఉల్లిపాయ ముక్కలు, పచ్చిమిర్చి చీలికలు, ఆయిల్ వేసుకొని ఒకసారి అన్నింటినీ బాగా కలపాలి.
- ఆ తర్వాత కుక్కర్ మూతపెట్టి 3 నుంచి 4 విజిల్స్ వచ్చే వరకు ఆ మిశ్రమాన్ని ఉడికించుకోవాలి.
- ఆవిధంగా ఉడికించుకున్నాక.. కుక్కర్లోని ప్రెజర్ మొత్తం పోయాక మూత తీసి పప్పుగుత్తితో పప్పును మరీ మెత్తగా కాకుండా కాస్త పలుకులు ఉండేవిధంగా మాష్ చేసుకోవాలి.
- అనంతరం అందులోకి ఉప్పు, కారం, నానబెట్టుకున్న చింతపండు నుంచి తీసిన రసం వేసి బాగా మిక్స్ చేసుకోవాలి. ఆపై తగినన్ని వాటర్ కూడా యాడ్ చేసుకొని కలుపుకోవాలి.
- కొద్దిగా కరివేపాకు కూడా వేసుకొని 6 నుంచి 7 నిమిషాల పాటు మిశ్రమాన్ని బాగా మరగనివ్వాలి.
- ఆలోపు మీరు పప్పుచారు కోసం తాలింపుని ప్రిపేర్ చేసుకోవాలి. ఇందుకోసం మరో బర్నర్ మీద పాన్ పెట్టుకొని ఆయిల్ వేసుకోవాలి. నూనె వేడెక్కాక.. ముందుగా ఆవాలు, జీలకర్ర వేసి దోరగా ఫ్రై చేసుకోవాలి.
- ఆ తర్వాత దంచిన వెల్లుల్లి రెబ్బలు, సన్నగా తరిగిన 1 చిన్నసైజ్ ఉల్లిపాయ ముక్కలు, ఇంగువ, ఎండుమిర్చి వేసి వేయించుకోవాలి. పోపు కాస్త ఫ్రై అయ్యాక కరివేపాకూ వేసుకొని బాగా ఫ్రై చేసుకోవాలి.
- అనంతరం ఈ తాలింపును మరో బర్నర్ మీద మరిగించుకుంటున్న పప్పుచారులో పోసుకొని ఒకసారి బాగా కలుపుకోవాలి.
- తర్వాత అందులో కొత్తిమీర తరుగు వేసుకొని రెండు నిమిషాల పాటు మరిగించుకొని దింపేసుకుంటే చాలు. అంతే.. ఎంతో రుచికరంగా ఉండే "ఆంధ్ర స్టైల్ పప్పుచారు" రెడీ!
నిమిషాల్లో ప్రిపేర్ అయ్యే 'పెసరపప్పు చారు'- ఇలా చేస్తే టేస్ట్ నెక్ట్స్ లెవల్ అంతే!
