Manipuri Mangal Ooty Recipe : రోటీ, నాన్, పులావ్‌లకు జతగా మంచి కర్రీ ఉంటే ఓ పట్టు పట్టేయొచ్చు కదూ. అందుకే.. మీకోసం పనీర్‌, గుడ్డు, చికెన్‌లతో చేసుకునేవే కాకుండా అద్దిరిపోయే ఒక వెజిటేరియన్ రెసిపీ పట్టుకొచ్చాం. అదే.. "మంగళ్ ఊటీ కర్రీ". ఇది మణిపురి వాసుల ప్రత్యేక వంటకం. టేస్ట్ సూపర్గా ఉంటుంది! చపాతీ, జొన్న రొట్టెలు, నాన్ వంటి వాటిల్లోకి ఈ కర్రీ కాంబినేషన్ వేరే లెవల్. పైగా దీన్ని ప్రిపేర్ చేసుకోవడం కూడా చాలా సులువు! మరి, ఇంకెందుకు ఆలస్యం ఈ సూపర్ టేస్టీ కర్రీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఈ స్టోరీలో తెలుసుకుందాం.
కావాల్సిన పదార్థాలు :
- బఠాణీలు - కప్పు
- టమాటా - 1
- ఉల్లిపాయలు - 2
- పచ్చిమిర్చి - 3
- తురిమిన అల్లం - 1 టేబుల్స్పూన్
- ఉప్పు - రుచికి సరిపడా
- ఆవాలు - 1 టేబుల్స్పూన్
- పసుపు - అరటీస్పూన్
- వంటసోడా - పావు చెంచా
- జీలకర్ర - చెంచా
- బిర్యానీ ఆకులు చిన్నవి - 2
- నూనె - తగినంత
- మసాలా మిక్స్చర్ - 2 టేబుల్స్పూన్లు
- కొత్తిమీర తరుగు - చారెడు
- ఆనియన్ రింగ్స్, టమాటా స్లైసులు - కొన్ని(గార్నిష్ కోసం)
తయారీ విధానం :
- ఇందుకోసం ముందు రోజు రాత్రి బఠాణీలను నానబెట్టుకోవాలి. మరుసటి రోజు ఉదయం శుభ్రంగా కడిగి కుక్కర్లో వేసుకొని తగినన్ని వాటర్, ఉప్పు, సోడా వేసి రెండు విజిల్స్ వచ్చే వరకూ ఉడికించుకోవాలి.
- బఠాణీలు ఉడికేలోపు రెసిపీలోకి కావాల్సిన ఉల్లిపాయ, టమాటాలు, పచ్చిమిర్చిని సన్నగా తరుక్కొని పక్కన పెట్టుకోవాలి. అలాగే అల్లం తరుగు సిద్ధం చేసి పెట్టుకోవాలి.
- ఇప్పుడు స్టౌపై పాన్ పెట్టుకొని ఆయిల్ వేసుకోవాలి. నూనె వేడయ్యాక ఆవాలు, జీలకర్ర, బిర్యానీ ఆకులు, ముందుగా తరిగి పెట్టుకున్న సన్నని ఉల్లిపాయ, పచ్చిమిర్చి, అల్లం తరుగు, పసుపు ఇలా ఒక్కొక్కటిగా వేసుకోవాలి.
- ఆపై స్టౌను మీడియం ఫ్లేమ్లో ఉంచి ఉల్లిపాయలు గోధుమ రంగులోకి వచ్చేంత వరకు వేయించుకోవాలి.
- ఆవిధంగా వేయించుకున్నాక అందులో ముందుగా కట్ చేసి పెట్టుకున్న టమాటా ముక్కలను యాడ్ చేసుకొని సాఫ్ట్గా అయ్యేంత వరకు మగ్గించుకోవాలి.
- టమాటా ముక్కలు మెత్తగా అయ్యాక.. ఉడికించుకున్న బఠాణీలు, అరకప్పు వాటర్ యాడ్ చేసుకొని కలిపి ఏడెనిమిది నిమిషాల పాటు ఉడికించుకోవాలి.
- ఆ తర్వాత మసాలా మిక్స్చర్ వేసుకొని మిశ్రమం మొత్తం కలిసేలా ఒకసారి బాగా కలుపుకోవాలి. తర్వాత లో ఫ్లేమ్ మీద కాసేపు మగ్గనివ్వాలి.
- ఇక చివరగా కొత్తిమీర తరుగు వేసి కలిపి దింపేసుకోవాలి. ఆపై మిశ్రమాన్ని ఆనియన్ రింగ్స్, టమాటా స్లైసులతో గార్నిష్ చేసుకుంటే చాలు. అంతే.. నోరూరించే మణిపురి "మంగళ్ ఊటీ" రెడీ!
ఇవీ చదవండి :
మళ్లీ మళ్లీ తినాలనిపించే నార్త్ ఇండియా రెసిపీ - "దహీ ఆలూ కర్రీ"ని ఇలా ప్రిపేర్ చేయండి!
ఈ పద్దతిలో "గుత్తొంకాయ కూర"ని నిమిషాల్లో తయారు చేసుకోవచ్చు! - పైగా టేస్ట్ అద్భుతం!
