How to Make Pachi Kobbari Pachi Mirchi Pachadi : చాలా మంది మార్నింగ్ బ్రేక్ఫాస్ట్ ఐటమ్స్లోకి పల్లీ చట్నీ, కొబ్బరి చట్నీ, అల్లం పచ్చడి వంటి వాటికి ఎక్కువ ప్రిఫరెన్స్ ఇస్తుంటారు. అయితే.. ఎప్పుడూ అవేకాకుండా ఈసారి కాస్త డిఫరెంట్గా ట్రై చేయాలనుకుంటున్నారా? అయితే.. మీకోసం ఒక సూపర్ రెసిపీ తీసుకొచ్చాం. అదే.. 'పచ్చికొబ్బరి పచ్చిమిర్చి పచ్చడి'. చాలా తక్కువ పదార్థాలతో పదే పది నిమిషాల్లో దీన్ని ప్రిపేర్ చేసుకోవచ్చు. ఈ చట్నీని టిఫెన్స్లోనే కాదు అన్నంలో తిన్నా కూడా చాలా రుచికరంగా ఉంటుంది. మరి, ఈ చట్నీ తయారీకి కావాల్సిన పదార్థాలేంటి? ఎలా ప్రిపేర్ చేసుకోవాలి? అనే వివరాలు ఈ స్టోరీలో చూద్దాం.
కావాల్సిన పదార్థాలు :
- నూనె - 2 టీస్పూన్లు
- ధనియాలు - అర టీస్పూన్
- మెంతులు - పావు టీస్పూన్
- జీలకర్ర - పావు టీస్పూన్
- కరివేపాకు - 2 రెమ్మలు
- వెల్లుల్లి రెబ్బలు - 6
- ఉల్లిపాయ - 1
- పచ్చిమిర్చి - 8(పెద్దవి)
- పచ్చికొబ్బరి - అరచిప్ప
- చింతపండు - కొద్దిగా
- ఉప్పు - రుచికి తగినంత
తాలింపుకోసం :
- నూనె - 1 టీస్పూన్
- ఆవాలు - అర టీస్పూన్
- మినప పప్పు - అర టీస్పూన్
- కరివేపాకు - 1 రెమ్మ
- ఎండుమిర్చి - 2
తయారీ విధానం :
- ఇందుకోసం ముందుగా పచ్చికొబ్బరిని శుభ్రంగా కడిగి చిన్న చిన్న ముక్కలుగా కట్ చేసుకొని పక్కన ఉంచుకోవాలి. అలాగే.. ఉల్లిపాయను తరుక్కొని పక్కన పెట్టుకోవాలి.
- ఇప్పుడు స్టౌపై.. పాన్ పెట్టుకొని ఆయిల్ వేసుకోవాలి. నూనె వేడెక్కాక.. అందులో ధనియాలు, మెంతులు, జీలకర్ర, కరివేపాకు, వెల్లుల్లి రెబ్బలు, ఉల్లిపాయ ముక్కలు.. ఇలా ఒక్కొక్కటిగా వేసుకొని ఆనియన్స్ కాస్త మెత్తబడే వరకు ఆ మిశ్రమాన్ని వేయించుకోవాలి.
- ఆ విధంగా వేయించుకున్నాక.. ఆ మిశ్రమంలో పచ్చిమిర్చిని మధ్యలోకి తుంపి వేసుకొని కలుపుతూ మరికాసేపు ఫ్రై చేసుకోవాలి.
- అనంతరం.. ముందుగా కట్ చేసి పెట్టుకున్న కొబ్బరి ముక్కలనూ అందులో వేసుకోవాలి. ఆపై మంటను మీడియం ఫ్లేమ్లో ఉంచి కొబ్బరి ముక్కలు ఎర్రగా మారే వరకు వేయించుకోవాలి.
- ఆ తర్వాత కాస్త చింతపండును కూడా ఆ మిశ్రమంలో వేసుకొని అరనిమిషం పాటు వేయించుకోవాలి. ఇలా చేయడం ద్వారా పచ్చడి చాలా రుచికరంగా ఉంటుంది.
- అలా వేయించుకున్న మిశ్రమాన్ని పూర్తిగా చల్లార్చుకొని మిక్సీ జార్లోకి తీసుకోవాలి.
- ముందుగా ఒకసారి వాటర్ వేసుకోకుండా గ్రైండ్ చేసుకోవాలి. అలా మిక్సీ పట్టుకున్నాక.. ఉప్పు, తగినన్ని వాటర్ వేసుకొని మరీ మెత్తగా, కచ్చాపచ్చాగా కాకుండా గ్రైండ్ చేసుకొని తాళింపు పెట్టుకోవాలి.
- తాళింపు కోసం.. స్టౌపై పాన్ పెట్టుకొని నూనె వేసుకోవాలి. ఆయిల్ కాస్త హీట్ అయ్యాక ఆవాలు, మినప పప్పు, కరివేపాకు, ఎండుమిర్చిని తుంపి వేసుకొని కాసేపు వేయించుకోవాలి.
- తర్వాత ఆ తాలింపుని ముందుగా గ్రైండ్ చేసుకొని పక్కన పెట్టుకున్న పచ్చడిలో వేసి కలుపుకుంటే చాలు. అంతే.. సూపర్ టేస్టీగా ఉండే పసందైన "పచ్చికొబ్బరి పచ్చిమిర్చి పచ్చడి" రెడీ!
- ఈ పచ్చడిని తాళింపు పెట్టుకోకుండా తిన్నా కూడా చాలా రుచికరంగా ఉంటుంది.
ఇవీ చదవండి :
టిఫెన్ సెంటర్ రుచిలో "అల్లం చట్నీ" - పదే పది నిమిషాల్లో ఇలా ప్రిపేర్ చేసుకోండి!
పల్లీ చట్నీ అందరూ చేస్తారు - కానీ హోటల్ టేస్ట్ మాత్రం రాదు! - ఈ టిప్స్ పాటిస్తే అద్భుతం!
