అద్దిరిపోయే 'టమాటా నిల్వ పచ్చడి' - ఇలా చేస్తే సువాసనకే నోట్లో నీళ్లు ఊరుతాయి! - How to Make Tomato Nilava Pachadi

How to Make Tomato Nilava Pachadi: ఇంట్లో ఎంత మంచి కూర వండినా సరే.. ఒక ముద్ద పచ్చడితో తినడానికి చాలా మంది ఇష్టపడుతుంటారు. అయితే.. రోజూ చట్నీ అంటే కొద్దిగా కష్టమైన పనే! అందుకే ఒక్కసారి చేసి పెట్టుకుంటే సుమారు 3నెలల పాటు నిల్వ ఉండే టమాటా పచ్చడిని మీ ఆహారంలో భాగం చేసుకోండి. మరి ఆ పచ్చడిని ఎలా ప్రిపేర్ చేసుకోవాలో ఈ స్టోరీలో తెలుసుకుందాం.

How to Make Tomato Nilava Pachadi: మనం ఏ కర్రీ వండినా సరే.. అందులో దాదాపు టమాటాలను తప్పనిసరిగా వాడుతుంటాం. పుల్లపుల్లగా ఉండే ఈ టమాటాలు వంటల టేస్ట్​ను మరింతగా పెంచుతాయి. అలాంటిది కేవలం టమాటాలతోనే తయారు చేసే రోటి పచ్చళ్లు అంటే మరి ఇంకెంత టేస్టీగా ఉంటాయి! ఈ టమాటా పచ్చడిని ఒక్కసారి చేసుకుంటే 3 నెలల పాటు నిల్వ పెట్టుకోవచ్చట. ఈ పచ్చడిని వేడి వేడి అన్నంలో తింటే టేస్ట్ అద్దిరిపోతుంది. ఈ నేపథ్యంలోనే టామాటా నిల్వ పచ్చడిని ఈజీగా ఎలా ప్రిపేర్ చేయాలి? ఇందులోకి కావాల్సిన పదార్థాలు ఏంటి ఇప్పుడు చూద్దాం.

కావాల్సిన పదార్థాలు..

• కిలో టమాటా
• 100 గ్రాముల చింతపండు
• ఒక టీ స్పూన్ పసుపు
• ఒక టేబుల్ స్పూన్ మెంతులు
• 2 టేబుల్ స్పూన్ల ఆవాలు
• ఒక కప్పు కారం
• అర కప్పు ఉప్పు
• 2 వెల్లుల్లి గడ్డలు

తయారీ విధానం..

• ముందుగా ఎర్రగా పండిన టమాటాలను తీసుకుని శుభ్రంగా కడిగి పొడి బట్టతో తుడవాలి. ఆ తర్వాత కాసేపు గాలికి ఆరబెట్టి చిన్న ముక్కలుగా కట్ చేయాలి.
• చింతపండులో గింజలు, ఈకలు లేకుండా శుభ్రం చేసుకుని పక్కన పెట్టుకోవాలి.
• ఆ తర్వాత స్టౌ ఆన్ చేసి ఓ గిన్నెలో టమాటా ముక్కలు, చింతపండును వేసి మూత పెట్టి మీడియం ఫ్లేమ్​లో ఉడికించుకోవాలి. (మాడిపోయి అడుగు అంటకుండా ఉండేందుకు మధ్యమధ్యలో కలపాలి)
• టమాటా కొద్దిగా మగ్గిన తర్వాత మూత తీసి ఉడికించుకోవాలి. (మూత పెట్టడం వల్ల ఆవిరి నీళ్లు పడి పచ్చడి త్వరగా పాడైపోయే ప్రమాదం ఉంటుంది)
• ఇందులో పసుపు వేసి కలిపి టమాటా దగ్గర పడేంత వరకు ఉడికించుకుని ఆ తర్వాత పక్కను పెట్టి చల్లారబెట్టుకోవాలి.
• మరో గిన్నెను తీసుకుని మెంతులు వేసి కాసేపు వేయించుకోవాలి.
• ఆ తర్వాత ఆవాలు వేసుకుని నిమిషం పాటు వేయించి పక్కకు పెట్టుకోవాలి. అనంతరం వీటిని మిక్సీ పట్టుకుని పొడిగా చేసుకోవాలి.
• చల్లారబెట్టుకున్న టమాటా మిశ్రమంలో కారం, ఉప్పు, మెంతులు- ఆవాలు పొడి, వెల్లుల్లి వేసి బాగా కలపాలి.
• ఈ మిశ్రమాన్ని జార్​లోకి తీసుకుని మిక్సీలో మెత్తగా గ్రైండ్ చేసుకోవాలి. (ఒక వేళ మీకు టమాటా ముక్కలు నోటికి తగలాలంటే కొద్దిగా మిశ్రమాన్ని మిక్సీ పట్టుకోకుండా కలపాలి)

తాళింపు కోసం..

• ఒకటిన్నర కప్పు నూనె
• ఒక టీ స్పూన్ ఆవాలు
• ఒక టీ స్పూన్ జీలకర్ర
• రెండు టీ స్పూన్ల పచ్చి శెనగపప్పు
• రెండు టీ స్పూన్ల మినపప్పు
• 10 వెల్లుల్లి పాయలు
• 8 ఎండు మిరపకాయలు
• కొద్దిగా కరివేపాకు
• అర టీ స్పూన్ ఇంగువా

తాళింపు విధానం..

• ముందుగా పాన్ వేడి చేసుకుని నూనె పోసుకోవాలి.
• నూనె వేడయ్యాక ఆవాలు, జీలకర్ర, పచ్చి శెనగపప్పు, మినపప్పు వేసుకుని బాగా వేయించుకోవాలి.
• ఆ తర్వాత వెల్లులి పాయలు, ఎండు మిరపకాయలు, కరివేపాకు వేసి దోరగా వేయించుకుని ఆఫ్ చేసుకోవాలి.
• ఇప్పుడు ఇంగువా వేసుకుని కాసేపు అలానే ఉంచుకోవాలి.
• ఆ తర్వాత మిక్సీ పట్టుుకున్న టమాటా మిశ్రమాన్ని పోపులో వేసుకుని బాగా కలిపితే పచ్చడి రెడీ!