మటర్ పనీర్ గ్రేవీని సింపుల్​గా చేసుకోండిలా - టేస్ట్ అద్దిరిపోతుంది! - How to Make Matar Paneer Gravy

Matar Paneer Gravy Recipe in Telugu: పనీర్​తో చేసిన కూరలంటే చాలా మంది లొట్టలేసుకుని తింటుంటారు. అందుకే పచ్చి బఠానీతో చేసే మటర్ పనీర్ గ్రేవీని మీ ముందుకు తీసుకువచ్చాం. ఒక్కసారి ఈ రెసిపీని ట్రై చేయండి. టేస్ట్ అద్దిరిపోతుంది. దీన్ని ఎలా ప్రిపేర్ చేసుకోవాలో ఈ స్టోరీలో తెలుసుకుందాం.

Matar Paneer Gravy Recipe in Telugu: పనీర్ అనగానే చాలా మందికి నోరూరిపోతుంది. పనీర్​ను సరిగ్గా వండితే.. ఇలా నోట్లో వేసుకుంటే అలా కరిగిపోయే విధంగా ఉంటుంది​. కేవలం కూర మాత్రమే కాకుండా దీంతో పాలక్ పనీర్, కడాయి పనీర్, ​టిక్కా, పనీర్​ బటర్​ మసాలా​​ లాంటి ఎన్నో రకాల వంటలను చేస్తుంటారు. ఇవే కాకుండా వీటితో చేసే స్వీట్లు, స్నాక్స్​ను చాలా మంది ఎంతో ఇష్టంగా తింటుంటారు. అయితే.. ఈ సారి "మటర్ పనీర్​ గ్రేవీ" ప్రిపేర్ చేద్దాం. మరి, ఇంకెందుకు ఆలస్యం? ఇందులోకి కావాల్సిన పదార్థాలేంటి? ఎలా ప్రిపేర్ చేసుకోవాలి? అన్నది ఇప్పుడు తెలుసుకుందాం.

గ్రేవీ కోసం కావాల్సిన పదార్థాలు

• 2 టేబుల్ స్పూన్ల నెయ్యి
• ఒక టీ స్పూన్ నూనె
• 2 లవంగాలు
• ఒక ఇంచు దాల్చిన చెక్క
• 2 బిర్యానీ ఆకులు
• అర ఇంచు అల్లం
• 7 వెల్లుల్లి పాయలు
• 2 ఉల్లిపాయలు
• 3 టమాటాలు
• 5 బాదం
• 8 పిస్తాలు
• రుచికి సరిపడా ఉప్పు
• పావు టీ స్పూన్ పసుపు

తయారీ విధానం

• ముందుగా స్టౌ ఆన్ చేసుకుని ఓ గిన్నెలో నెయ్యి, నూనె పోసి వేడి చేసుకోవాలి.
• ఆ తర్వాత లవంగాలు, దాల్చిన చెక్క, బిర్యానీ ఆకులు, అల్లం, వెల్లుల్లి పాయలు, ఉల్లిపాయ ముక్కలు వేసి కాసేపు వేయించుకోవాలి.
• ఇవన్నీ వేగాక టమాటా ముక్కలు, నానబెట్టిన బాదం, పిస్తాలు వేసుకుని కలపాలి.
• ఆ తర్వాత రుచికి సరిపడా ఉప్పు, పసుపు వేసి బాగా కలిపి సుమారు 8 నిమిషాలు పాటు మూత పెట్టి ఉడికించుకోవాలలి.
• ఇప్పుడు స్టౌ ఆఫ్ చేసి కాసేపు చల్లారబెట్టుకోవాలి. ఆ తర్వాత మూత తీసి అందులో నుంచి బిర్యానీ ఆకులు, దాల్చిన చెక్క తీసేయాలి.
• అనంతరం ఆ మిశ్రమాన్ని మిక్సీలో వేసి బాగా గ్రైండ్ చేసి పక్కకు పెట్టుకోవాలి.

పనీర్ కోసం కావాల్సిన పదార్థాలు

• 2 టేబుల్ స్పూన్ల నూనె
• 200 గ్రాముల పనీర్
• 2 పచ్చిమిరపకాయలు
• అర టీ స్పూన్ ధనియాల పొడి
• అర టీ స్పూన్ జీలకర్ర పొడి
• పావు టీ స్పూన్ గరం మసాలా
• ఒక టీ స్పూన్ కారం
• అర కప్పు బఠానీలు (నానబెట్టినవి)
• ఒక టీ స్పూన్ కసూరి మెతి
• పావు టీ స్పూన్ చక్కెర (ఆప్షనల్)
• కొద్దిగా కొత్తిమీర
• అర టీ స్పూన్ నిమ్మ రసం
• రుచికి సరిపడా ఉప్పు

తయారీ విధానం

• ఇప్పుడు స్టౌ ఆన్ చేసి ఓ గిన్నె పెట్టుకుని నూనె పోసి వేడి చేసుకోవాలి.
• ఆ తర్వాత అందులో పనీర్ వేసి సుమారు 2 నిమిషాలు పాటు అన్ని వైపులా వేయించుకుని పక్కకు పెట్టుకోవాలి.
• అందులోనే పచ్చిమిరపకాయలు వేసి వేయించుకోవాలి.
• ఆ తర్వాత ధనియాల పొడి, జీలకర్ర పొడి, గరం మసాలా, కారం వేసి కలిపి కాసేపు వేయించుకోవాలి.
• అనంతరం అందులోనే పచ్చి బఠానీలు వేసి బాగా కలిపి.. గ్రైండ్ చేసుకున్న మసాలా మిశ్రమాన్ని వేసి బాగా కలపాలి.
• ఇప్పుడు అవసరమైన మేర కొద్దిగా నీళ్లు కలిపి 5 నిమిషాల పాటు మూత పెట్టి మగ్గనివ్వాలి.
• ఆ తర్వాత మూత తీసి ఫ్రై చేసుకున్న పనీర్ ముక్కలు, కసూరి మెతిని వేసి బాగా కలపాలి. (మీకు నచ్చితే ఇప్పుడు చక్కెర వేసుకోవచ్చు)
• కాసేపయ్యాక కొత్తిమీర, నిమ్మ రసం పోసి కలిపాక స్టౌ ఆఫ్ చేస్తే సూపర్ టేస్టీ మటర్ పనీర్ గ్రేవీ రెడీ!