Tomato Rice Recipe : పొద్దున్నే లేచి టైమ్కి పిల్లలకు లంచ్ బాక్స్ రెడీ చేయడం చాలా కష్టమైన పని. చాలాసార్లు టిఫెన్లు రెడీ చేసిన తర్వాత వంట చేయడానికి ఆలస్యం అవుతూ ఉంటుంది. ఇలాంటి పరిస్థితిని చాలా మంది తల్లులు నిత్యం ఫేస్ చేస్తూనే ఉంటారు. దీంతో.. ఏదోక కర్రీ వండి వైట్రైస్ బాక్స్లో పెట్టి పంపిస్తుంటారు. లేదంటే.. వైట్ రైస్లో పచ్చడి వేసి పంపిస్తుంటారు. దీంతో.. పిల్లలు బాక్స్ పూర్తిగా తినకుండానే ఇంటికి పట్టుకొస్తుంటారు. అది చూసి పిల్లలు సరిగా తినట్లేదని అమ్మలు దిగులు చెందుతుంటారు.
అందుకే మీకోసం ఈ రెసిపీ తీసుకొచ్చాం. మీ దగ్గర ఎక్కువ టైమ్ లేనప్పుడు ఈ విధంగా టమాటా రైస్ ట్రై చేయండి. త్వరగా కంప్లీట్ కావడమే కాదు.. టేస్ట్ కూడా సూపర్గా ఉంటుంది. పిల్లలకు కూడా కొత్తగా, కలర్ ఫుల్గా ఉంటుంది. ఈ రెసిపీని లంచ్ తోపాటు డిన్నర్లోకి కూడా చేయొచ్చు. మిగిలిపోయిన అన్నంతో కూడా వండొచ్చు. మరి.. ఈ టమాటా రైస్ తయారు చేయడానికి కావాల్సిన పదార్థాలు.. తయారీ విధానం ఏంటో ఒక్కసారి లుక్కేయండి.
కావాల్సిన పదార్థాలు..
- అన్నం -3 కప్పులు
- టమాటాలు -3
- పచ్చిమిర్చి-2
- ఉల్లి పాయ-1
- నూనె-2 టేబుల్స్పూన్లు
- ఉప్పు- రుచికి సరిపడా
- కారం-టీస్పూన్
- గరం మసాలా - అరటీస్పూన్
- ధనియాలపొడి-అరటీస్పూన్
- పసుపు-చిటికెడు
- కరివేపాకు-1
- కొత్తిమీర
- పుదీనా
తయారీ విధానం..
- ముందుగా టమాటాలను శుభ్రంగా కడిగి.. ముక్కలుగా కట్ చేసుకోవాలి. వీటిని మిక్సీ జార్లో వేసుకుని మెత్తగా గ్రైండ్ చేసి.. ప్యూరీ సిద్ధం చేసుకోవాలి. టమాటా రైస్కి ఇలా టమాటా ప్యూరీ చేసుకోవడం వల్ల టేస్ట్ సూపర్గా ఉంటుంది.
- ఇప్పుడు స్టౌపై పాన్ పెట్టండి. ఇందులో ఆయిల్ వేసి ఉల్లిపాయలు, పచ్చిమిర్చి వేసి వేపండి.
- తర్వాత పాన్లో టమాటా ప్యూరీ వేయండి. అలాగే ఇందులో ఉప్పు, కారం, ధనియాల పొడి, గరం మసాలా, పసుపు, కరివేపాకు రెమ్మ వేసి కలుపుకోండి.
- టమాటాలలోని నీరు మొత్తం ఆవిరైపోయిన తర్వాత కొత్తిమీర, పుదీనా వేసుకుని కలుపుకోవాలి.
- తర్వాత అన్నం వేసుకుని బాగా మిక్స్ చేయాలి. రైస్కి మసాలా బాగా పట్టిందంటే చాలు.. సూపర్ టేస్టీ టమాటా రైస్ మీ ముందుంటుంది.
- ఇంతే.. కేవలం 10 నిమిషాల్లోనే ఈ టమాటా రైస్ తయారవుతుంది.
- పిల్లల లంచ్ బాక్స్ తయారు చేయడం కోసం మీ దగ్గర ఎక్కువ సమయం లేనప్పుడు ఈ రెసిపీ తప్పకుండా వర్కౌట్ అవుతుంది. కావాలంటే ట్రై చేసి చేయండి.
ఇవి కూడా చదవండి:
సేమియా ఉప్మా ముద్ద ముద్దగా అవుతోందా? - ఇలా చేస్తే పొడిపొడిగా చాలా రుచికరంగా ఉంటుంది!
