వంట రుచిని ఎక్కడికో తీసుకెళ్లే "చాట్​ మసాలా" - మీరే క్షణాల్లో ప్రిపేర్​ చేసుకోండిలా!

-ఎన్నో వంటకాల్లో ఉపయోగించే రుచికరమైన "చాట్​ మసాలా" -కేవలం నిమిషాల్లోనే ఇంట్లో ప్రిపేర్​ చేసుకోండి

How to Make Chaat Masala at Home: చాట్ మసాలా ఈ పేరుకు పరిచయం అక్కర్లేదు. పకోడీ, పానీపూరీ, బఠానీ చాట్, సలాడ్​, రైతా, బటర్​ మిల్క్​, మసాలా చాయ్​, ఇలా ఒక్కటేమిటి ఎన్నో రకాల వంటకాల్లో దీనిని ఉపయోగిస్తాం. ఎందుకంటే ఈ మసాలా వేసి ప్రిపేర్​ చేసిన వంటలు చాలా టేస్టీగా ఉంటాయి. అందుకే చాలా మంది ఒకేసారి ఎక్కువ మొత్తంలో మార్కెట్​ నుంచి కొని తెచ్చి ఫ్రిడ్జ్​లో​ పెట్టి ఉపయోగిస్తుంటారు. అయితే మార్కెట్లో కొనుగోలు చేసే చాట్​ మసాలా పొడిలో రసాయనాలు కలిసే అవకాశం ఉంటుంది. కాబట్టి ఎన్నో రకాలుగా ఉపయోగించే ఈ పొడిని ఇంట్లోనే ప్రిపేర్​ చేసుకుంటే పోలా. మాకు రాదు అంటారా? డోంట్​ వర్రీ, ఈ సింపిల్​ టిప్స్​తో చాట్​ మసాలా ప్రిపేర్​ చేసుకోండి. మార్కెట్లో తెచ్చిన మసాలా కంటే కూడా ఎంతో రుచిగా ఉంటుంది. మరి లేట్​ చేయకుండా ఈ స్టోరీపై ఓ లుక్కేయండి.

కావాల్సిన పదార్థాలు:

• ధనియాలు - 2 టేబుల్​ స్పూన్లు
• దాల్చిన చెక్క - 1 ఇంచ్​
• లవంగాలు - 4
• మిరియాలు - 1 టీ స్పూన్​
• జీలకర్ర - 1 టేబుల్​ స్పూన్​
• పుదీనా ఆకులు - పావు కప్పు
• శొంఠి - చిన్న ముక్క
• రాళ్ల ఉప్పు - 1 టీ స్పూన్​
• ఇంగువు - పావు టీ స్పూన్​
• బ్లాక్​ సాల్ట్​ - 3 టీ స్పూన్లు
• ఆమ్​చూర్​ పౌడర్​ - 3 టేబుల్​ స్పూన్లు
• పంచదార - 1 టీ స్పూన్​
• వంటసోడా - పావు టీ స్పూన్​
• కారం - 1 టీ స్పూన్​

తయారీ విధానం:

• కాడలు లేకుండా కేవలం పుదీనా ఆకులను మాత్రమే తీసుకోవాలి. ఇప్పుడు ఆ ఆకులను శుభ్రంగా కడిగి జల్లెడలో వేసి పక్కన ఉంచాలి.
• స్టవ్​ పైన​ పాన్​ పెట్టి ధనియాలు, దాల్చిన చెక్క, లవంగాలు, మిరియాలు వేసి లో ఫ్లేమ్​లో 2 నిమిషాలు వేయించుకోవాలి.
• ఆ తర్వాత జీలకర్ర వేసి మరో నిమిషం పాటు ఫ్రై చేసి ఓ ప్లేట్​లోకి తీసుకోవాలి.
• ఇప్పుడు అదే పాన్​లో శుభ్రంగా కడిగిన పుదీనా ఆకులు వేసి లో ఫ్లేమ్​లో దోరగా, క్రిస్పీగా అయ్యేవరకు కలుపుతూ వేయించాలి.
• పుదీనా ఆకులు వేగిన తర్వాత స్టవ్​ ఆఫ్​ చేసి పక్కన పెట్టాలి.
• మిక్సీజార్​లోకి వేయించుకున్న ధనియాల మిశ్రమం, పుదీనా ఆకులు వేయాలి.
• ఆ తర్వాత శొంఠి ముక్కలు, రాళ్ల ఉప్పు, ఇంగువ, బ్లాక్​ సాల్ట్​, ఆమ్​చూర్​ పౌడర్​, పంచదార, వంట సోడా, కారం వేసి మూత పెట్టి వీలైనంత మెత్తగా గ్రైండ్​ చేసుకోవాలి.
• ఇలా మెత్తగా గ్రైండ్​ చేసుకున్న పొడిని గాజు జార్​లో స్టోర్​ చేస్తే సరి. అంతే ఎంతో టేస్టీగా ఉండే​ చాట్​ మసాలా రెడీ.
• నచ్చితే మీరూ ఇంట్లో ప్రిపేర్​ చేసుకుని కావాల్సిన వంటకాల్లో వాడుకోండి.