How To Make Semiya Upma in Telugu : ఇంట్లో బ్రేక్ఫాస్ట్ ప్రిపేర్ చేయడానికి ఇడ్లీ, దోశ పిండి లేకపోతే.. చాలా మంది ఉప్మా చేసేస్తారు. ఈ ఉప్మా రెసిపీలో కొంతమందికి సేమియా ఉప్మా అంటే చాలా ఇష్టం. పిల్లలు లంచ్బాక్స్లో కూడా ఎంతో ఇష్టంగా దీన్ని తినేస్తారు. కానీ.. ఈ రెసిపీ పొడి పొడిగా ఉంటేనే పిల్లలు ఇష్టంగా తింటారు. ముద్ద ముద్దగా ఉంటే.. పక్కన పడేస్తారు. అందుకే.. సేమియా ఉప్మా పొడిపొడిగా ఉండడం చాలా ముఖ్యం. మరి, ఇలా టేస్టీగా ఎలా వండాలో ఇప్పుడు చూద్దాం.
కావాల్సిన పదార్థాలు :
- సేమియా - గ్లాసు
- క్యారెట్- ఒకటి (సన్నగా కట్చేసుకోవాలి)
- పచ్చిబఠానీలు- అరకప్పు
- ఉల్లిపాయ-1 (సన్నగా కట్చేసుకోవాలి)
- ఉప్పు - రుచికి సరిపడా
- కరివేపాకు-ఒకటి
- వేరుశనగలు- 2 టేబుల్స్పూన్లు
- నూనె-టేబుల్స్పూన్
- అల్లం తురుము-టీస్పూన్
- జీడిపప్పు-పావు కప్పు
- పచ్చిమిర్చి-4
- తాళింపు గింజలు- టేబుల్స్పూన్
సేమియా ఉప్మా తయారీ విధానం :
- మొదట స్టౌపై పాన్ పెట్టుకుని సన్నని మంట మీద సేమియాని వేయించండి. సేమియా గోల్డెన్ కలర్ వచ్చే వరకు రోస్ట్ చేసుకోండి. ఇలా వేయించుకోవడం వల్ల సేమియా ఉప్మా మెత్తగా కాకుండా పొడిపొడిగా వస్తుంది.
- ఇప్పుడు అదే పాన్లో నూనె వేసి తాళింపు గింజలను వేయండి. తర్వాత వేరుశనగలు, కరివేపాకు, పచ్చిమిర్చి, జీడిపప్పు వేసి దోరగా వేయించండి. అలాగే అల్లం తురుము, ఉల్లిపాయ ముక్కలు, పచ్చి బఠానీ, క్యారెట్, ముక్కలు, కొద్దిగా ఉప్పు వేయండి. తర్వాత బాగా కలిపి మూత పెట్టి వీటిని కొద్దిసేపు మగ్గించండి.
- తర్వాత ఇందులో ఏ గ్లాసుతో అయితే, సేమియా తీసుకుంటామో.. ఆ గ్లాసుతో ఒకటింపావు కప్పు నీళ్లు పోసుకుంటే సరిపోతుంది. సేమియా మెత్తగా ఉడకకుండా పొడిపొడిగా వస్తుంది.
- తర్వాత రుచికి సరిపడా ఉప్పు వేసుకుని పాన్పై మూత పెట్టాలి. నీరు బాగా మరిగిన తర్వాత సేమియా వేసి కలిపి మూతపెట్టాలి
- ఒక నిమిషం తర్వాత మరొసారి కలిపి, కొద్దిగా కొత్తిమీర చల్లాలి.
- ఒక రెండు నిమిషాల తర్వాత స్టౌ ఆఫ్ చేసుకుని సర్వ్ చేసుకుంటే.. వేడివేడి సేమియా ఉప్మా రెడీ.
- ఇలా సేమియా ఉప్మా చేశారంటే.. మీ ఇంట్లో సేమియా ఉప్మా తినని వారు కూడా కచ్చితంగా ఈ రెసిపీకి ఫ్యాన్ అయిపోతారు.
- నచ్చితే మీరు కూడా ఈ సింపుల్ సేమియా ఉప్మాని ట్రై చేయండి.
ఇవి కూడా చదవండి :
ఉప్మా అనగానే పిల్లలు విసుక్కుంటున్నారా? - చేసే పద్ధతి మార్చండి - లొట్టలేసుకుంటూ తింటారు!
