సేమియా ఉప్మా ముద్ద ముద్దగా అవుతోందా? - ఇలా చేస్తే పొడిపొడిగా చాలా రుచికరంగా ఉంటుంది! - How to Make Semiya Upma

Semiya Upma Recipe In Telugu : చాలా మంది బ్రేక్​ఫాస్ట్​లో ఎంతో ఇష్టంగా సేమియా ఉప్మా తింటారు. అయితే, ఎక్కువ మంది ఈ ఉప్మా చేస్తే మెత్తగా, ముద్ద ముద్దగా మారిపోతుంటుంది. అలా కాకుండా ఉండాలంటే సేమియా ఉప్మా ఒక్కసారి ఇలా చేయండి. చక్కగా పొడిపొడిగా వస్తుంది. ఇంకా సూపర్​ టేస్టీగా ఉంటుంది.

How To Make Semiya Upma in Telugu : ఇంట్లో బ్రేక్​ఫాస్ట్ రెడీ​ చేయడానికి ఇడ్లీ, దోశ పిండి లేకపోతే.. చాలా మంది ఉప్మా చేసేస్తారు. ఈ ఉప్మా రెసిపీల్లో రవ్వ ఉప్మా, అటుకుల ఉప్మా కంటే.. ఎక్కువ మంది సేమియా ఉప్మాని ఎంతో ఇష్టంగా తింటారు. అయితే, అందరికీ సేమియా ఉప్మా పర్ఫెక్ట్​గా పొడిపొడిగా చేయడం రాదు. ఇంట్లో ఎప్పుడూ చేసినా నీళ్లు ఎక్కువైపోయి ముద్దగా మారిపోతుంటుంది. ఇలా కాకుండా సేమియా ఉప్మా పొడిపొడిగా రావాలంటే కొన్ని టిప్స్​ పాటిస్తూ చేయాలి. ఒక్కసారి ఈ స్టోరీలో చెప్పిన విధంగా సేమియా ఉప్మా చేస్తే పిల్లలు, పెద్దలందరూ ఎంతో ఇష్టంగా లాగించేస్తారు. మరి, ఇంకెందుకు ఆలస్యం? నోరూరించే సూపర్​ టేస్టీ సేమియా ఉప్మా తయారీ విధానంపై ఓ లుక్కేయండి..!

కావాల్సిన పదార్థాలు :

• సేమియా - గ్లాసు
• పచ్చిబఠానీలు- అరకప్పు
• ఉల్లిపాయ-1 (సన్నగా కట్​చేసుకోవాలి)
• ఉప్పు - రుచికి సరిపడా
• ఆవాలు- అర టీస్పూన్​
• జీలకర్ర-అర టీస్పూన్​
• కరివేపాకు-ఒకటి
• వేరుశనగలు- 3 టేబుల్​స్పూన్లు
• నూనె-3 టేబుల్​స్పూన్లు
• పచ్చిమిర్చి-4
• క్యాప్సికమ్​ ముక్కలు-3 టేబుల్​స్పూన్లు
• ఫ్రోజొన్​ బఠానీ- 2 టేబుల్​స్పూన్లు
• పసుపు-చిటికెడు

సేమియా ఉప్మా తయారీ విధానం :

• మొదట స్టౌపై పాన్​ పెట్టుకుని ఆయిల్​ వేసుకోవాలి. తర్వాత సేమియా వేసుకుని సన్నని మంటమీద కాస్త ఎర్ర రంగు వచ్చేవరకు వేయించండి.
• ఇలా సేమియాను ఫ్రై చేసేటప్పుడే మరోపక్కన రెండు గ్లాసుల వేడి నీళ్లను రెడీ చేసుకోండి. ఈ వేడి నీళ్లను సేమియాలో పోసి కొద్దిగా ఉడికించుకోండి.
• ఉడికిన సేమియాను స్ట్రెయినర్​ సహాయంతో వడకట్టండి.
• ఇప్పుడు పాన్​ స్టౌమీద పెట్టండి. వేడెక్కిన తర్వాత ఆయిల్​ వేసి వేరుశనగలను వేయించుకొని పక్కన పెట్టుకోండి. ఇందులో ఆవాలు, జీలకర్ర, ఉల్లిపాయ ముక్కలు, పచ్చిమిర్చి వేసి వేయించండి.
• ఉల్లిపాయలు కొద్దిగా ఫ్రై అయిన తర్వాత ఫ్రోజొన్​ బఠానీ, క్యాప్సికమ్​, కరివేపాకు వేసి కలపండి. మూత పెట్టి కొద్దిసేపు మగ్గించండి.
• బఠానీలు ఉడికిన తర్వాత అందులో పసుపు, రుచికి సరిపడా ఉప్పు యాడ్ చేయండి.
• అలాగే ఉడికించుకున్న సేమియా, పల్లీలు వేసి బాగా కలపండి.
• తర్వాత స్టౌ ఆఫ్​ చేసే ముందు కొద్దిగా నిమ్మరసం, కొత్తిమీర చల్లుకుంటే సరిపోతుంది.
• ఎంతో రుచికరంగా ఉండే సేమియా ఉప్మా అద్భుతంగా పొడి పొడిగా రెడీ అవుతుంది.
• నచ్చితే మీరు కూడా ఈ స్టైల్లో సేమియా ఉప్మా ప్రిపేర్​ చేయండి. ఇంట్లో పిల్లల నుంచి పెద్ద వాళ్ల వరకు అందరూ ఎంతో ఇష్టంగా తింటారు. మళ్లీ మళ్లీ కావాలని అడుగుతారు.

ఇవి కూడా చదవండి :