How to Make Paneer Mughlai Dum Biryani: దసరా పండగ అంటేనే ఘుమఘుమలాడే నాన్వెజ్ రెసిపీలు ఉండాలి. అయితే నాన్వెజ్ తినేవారికి ఇవి ఓకే. మరి తినని వారి కోసం కూడా స్పెషల్ ఉండాలిగా! అందుకే దసరా పండగ నాడు వెజ్ లవర్స్ కోసం అద్దిరిపోయే రెసిపీ తీసుకొచ్చాం. అదే "పనీర్ మొఘలాయ్ దమ్ బిర్యానీ". ఈ పేరు విని ఎప్పుడూ తినే పనీర్ బిర్యానీ అనుకుంటే పొరబడినట్లే. ఎందుకంటే పేరు ఒకటే కావొచ్చు కానీ.. రుచి మాత్రం వేరే లెవల్. ఎప్పుడూ ఈ రుచితో తిని ఉండరు కూడా. మరి ఇంకెందుకు ఆలస్యం దసరా వేళ అద్దిరిపోయే రుచితో ఈ బిర్యానీ చేసుకోండి. మరి దీనికి కావాల్సిన పదార్థాలు, తయారీ విధానం ఈ స్టోరీలో చూద్దాం..
కావాల్సిన పదార్థాలు:
మసాలా పొడి కోసం:
- యాలకులు - 2
- లవంగాలు -2
- దాల్చిన చెక్క - కొద్దిగా
- షాజీరా - 1 టీ స్పూన్
- సోంపు - అర టేబుల్ స్పూన్
- నల్ల యాలక - 1
పనీర్ గ్రేవీ కోసం:
- నెయ్యి - 4 టేబుల్ స్పూన్లు
- దాల్చిన చెక్క - అర అంగుళం
- జాపత్రి -1
- నల్ల యాలక - 1
- యాలకులు - 2
- బిర్యానీ ఆకు - 1
- షాజీరా - 1 టీ స్పూన్
- ఉల్లిపాయలు - 2
- అల్లం వెల్లుల్లి పేస్ట్ - 1 టేబుల్ స్పూన్
- నీరు - సరిపడా
- ఉప్పు - రుచికి సరిపడా
- పెరుగు - అర కప్పు
- పచ్చిమిర్చి పేస్ట్ - తగినంత
- పనీర్ ముక్కలు - పావు కిలో
బిర్యానీ కోసం:
- నీరు - 2 లీటర్లు
- దాల్చిన చెక్క - కొద్దిగా
- నల్ల యాలకులు - 2
- షాజీరా - అర టేబుల్ స్పూన్
- లవంగాలు - 5
- యాలకులు - 4
- బిర్యానీ ఆకు - 1
- పచ్చిమిర్చి చీలికలు - 3
- ఉప్పు - రెండున్నర టేబుల్ స్పూన్లు
- కొత్తిమీర, పుదీనా తరుగు - కొద్దిగా
- బాస్మతీ బియ్యం - రెండు కప్పులు
- నెయ్యి - 4 టేబుల్ స్పూన్లు
- పచ్చిపాలు - అర కప్పు
తయారీ విధానం:
- ముందుగా ఉల్లిపాయలను సన్నగా కట్ చేసుకుని పక్కకు పెట్టుకోవాలి. అలాగే కొత్తిమీర, పుదీనా కూడా సన్నగా కట్ చేసుకోవాలి. 8 పచ్చిమిర్చి తీసుకుని మెత్తని పేస్ట్లాగా గ్రైండ్ చేసుకోవాలి. అలాగే బాస్మతీ బియ్యం కడిగి ఓ గంట సేపు నానబెట్టుకోవాలి.
- ఇప్పుడు స్టవ్ ఆన్ చేసి పాన్ పెట్టి మంటను సిమ్లో పెట్టి యాలకలు, లవంగాలు, దాల్చినచెక్క, షాజీరా, సోంపు, నల్ల యాలకులు వేసి దోరగా వేయించుకుని స్టవ్ ఆఫ్ చేయాలి. ఈ మసాలాలు చల్లారిన తర్వాత మిక్సీ జార్లో వేసుకుని మెత్తని పొడిలా చేసుకోవాలి.
- ఇప్పుడు స్టవ్ ఆన్ చేసి మందంగా ఉన్న బిర్యానీ గిన్నె పెట్టి నెయ్యి పోసుకోవాలి. నెయ్యి వేడెక్కిన తర్వాత దాల్చిన చెక్క, జాపత్రి, నల్ల యాలక, యాలకులు, బిర్యానీ ఆకు, షాజీరా వేసి వేయించుకోవాలి.
- ఆ తర్వాత ఉల్లిపాయ ముక్కలు వేసి రంగు మారే వరకు వేయించుకోవాలి. ఆ తర్వాత అల్లం వెల్లుల్లి పేస్ట్ వేసి పచ్చి వాసన పోయేంతవరకు ఫ్రై చేసుకోవాలి.
- ఆ తర్వాత గ్రైండ్ చేసుకున్న మసాలా పొడి వేసి పావు కప్పు నీరు పోసి మసాలాలు మాడకుండా నెయ్యి పైకి తేలేంతవరకు వేయించుకోవాలి.
- ఆ తర్వాత రుచికి సరిపడా ఉప్పు, పెరుగు వేసి బాగా కలిపి మసాలాలు ఫ్రై చేసుకోవాలి. ఆ తర్వాత పచ్చిమిర్చి పేస్ట్ వేసుకుని వేయించుకోవాలి.
- అనంతరం పనీర్ ముక్కలు వేసి బాగా కలిపి అరకప్పు నీళ్లు పోసి మంటను హై ఫ్లేమ్ మీద పెట్టి ఓ 3 నిమిషాలు ఫ్లై చేసుకోవాలి.
- ఆ తర్వాత మంటను సిమ్లో పెట్టి పనీర్ ముక్కల మధ్యలో ఓ చిన్న గిన్నె పెట్టి ఓ బాగా కాలిన బొగ్గు, రెండు యాలకులు, చెంచా నెయ్యి వేసి స్మోక్ బయటికి పోకుండా మూత పెట్టి మూడు నిమిషాలు ఉడికించుకోవాలి. ఆ తర్వాత మూత తీసి ఆ గిన్నెను పక్కన పెట్టి పనీర్ గ్రేవీని కూడా దింపి పక్కకు పెట్టుకోండి.
- ఇప్పుడు స్టవ్ మీద గిన్నె పెట్టి నీళ్లు పోసి బాగా మరిగించుకోవాలి. మరుగుతున్న నీటిలో దాల్చిన చెక్క, నల్ల యాలకులు, షాజీరా, లవంగాలు, యాలకులు, బిర్యానీ ఆకు, పచ్చిమిర్చి చీలికలు, ఉప్పు వేసి మరో 5 నిమిషాలు హై ఫ్లేమ్ మీద మరిగించుకోవాలి.
- అనంతరం ఉప్పు చూసి కొత్తిమీర, పుదీనా తరుగు వేసుకోవాలి. ఓ 5 నిమిషాల తర్వాత నానబెట్టిన బాస్మతీ బియ్యం వేసి హై ఫ్లేమ్ మీద 80 శాతం ఉడికించుకోవాలి.
- బాస్మతీ రైస్ అనుకున్న మేర ఉడికిన తర్వాత జల్లెడ సాయంతో నీరు లేకుండా కొద్దికొద్దిగా తీసుకుంటూ ముందే ప్రిపేర్ చేసుకున్న పనీర్ గ్రేవీ మిశ్రమంపై లేయర్లా పల్చగా చల్లుకోవాలి. అలా బియ్యం మొత్తాన్ని లేయర్లా వేసుకోవాలి.
- అలా బియ్యం మొత్తం వేసుకున్న తర్వాత నెయ్యి పోసుకోవాలి. ఆ తర్వాత పచ్చి పాలను అన్నం మొత్తం కవర్ అయ్యేలా పోసుకోవాలి.
- ఇప్పుడు ధమ్ బయటికి పోకుండా మూత పెట్టి ఆ బిర్యానీ గిన్నెను స్టవ్ మీద పెట్టి మంటను హై ఫ్లేమ్ మీద ఉంచి 5 నిమిషాలు, లో ఫ్లేమ్ మీద ఉంచి మరో 8 నిమిషాలు కుక్ చేసుకోవాలి.
- లో ఫ్లేమ్లో ఉడికించిన తర్వాత స్టవ్ ఆఫ్ చేసి ఓ 30 నిమిషాలు అలానే ఉంచాలి. ఆ తర్వాత సర్వ్ చేసుకుని తింటే సూపర్ అనాల్సిందే. దీన్ని విడిగా తిన్నా.. రైతాతో కలిపి తిన్నా సూపర్ టేస్ట్ గ్యారెంటీ!
మటర్ పనీర్ గ్రేవీని సింపుల్గా చేసుకోండిలా - టేస్ట్ అద్దిరిపోతుంది!
ఎప్పుడూ రొటీన్ బిర్యానీయేనా? - ఈసారి అద్దిరిపోయే మొఘలాయ్ స్టైల్లో చేసుకోండి!
