How to Make Dal Biryani Recipe : చాలా మంది అమ్మలు పిల్లల లంచ్ బాక్స్ కోసం ఎప్పుడూ రకరకాల రెసిపీలు ట్రై చేస్తుంటారు. ఎందుకంటే మామూలుగా వైట్ రైస్, కర్రీ బాక్స్లో పెడితే పిల్లలు ఇష్టంగా తినరు. అందుకే ఈసారి ఘుమఘుమలాడే 'దాల్ బిర్యానీ' ఎలా తయారు చేయాలో చూద్దాం. ఈ స్టోరీలో చెప్పిన విధంగా చేస్తే.. రుచికరమైన దాల్ బిర్యానీ ఇట్టే తయారైపోతుంది. కాస్త స్పైసీగా ఉండే ఈ బిర్యానీ పిల్లలకు నచ్చుతుంది. ఇక ఆలస్యం చేయకుండా టేస్టీ దాల్ బిర్యానీ ఎలా చేయాలో ఓ లుక్కేయండి..
కావాల్సిన పదార్థాలు :
- శనగపప్పు-1 కప్పు
- బాస్మతి బియ్యం-3 గ్లాసులు
- బంగాళదుంపలు-2
- ఉల్లిపాయలు-3
- పచ్చిమిర్చి-4
- ఉప్పు రుచికి సరిపడా
- పసుపు-పావు టీస్పూన్
- అల్లం, వెల్లుల్లి పేస్ట్-టేబుల్స్పూన్
- పెరుగు-అరకప్పు
- కొత్తిమీర, పుదీనా తరుగు-కొద్దిగా
- కారం-టీస్పూన్
- బిర్యానీ ఆకులు-3
- దాల్చిన చెక్క-2
- లవంగాలు-5
- మిరియాలు-6
- యాలకులు-2
- షా జీరా- పావు టీస్పూన్
- గసగసాలు-కొద్దిగా
- నూనె
తయారీ విధానం :
- ముందుగా శనగపప్పు నీటిలో నానబెట్టుకోండి. అలాగే బియ్యం కూడా కడిగి నీటిలో అరగంటపాటు నానబెట్టుకోండి.
- తర్వాత పచ్చిమిర్చి, ఉల్లిపాయలను నిలువుగా కట్ చేసుకోండి. ఆపై ఆలుగడ్డల పైన పొట్టు తీసేసుకుని పెద్ద ముక్కలుగా కట్ చేసుకోవాలి.
- ఇప్పుడు బిర్యానీ చేయడం కోసం.. స్టౌపై గిన్నె పెట్టి 4 టేబుల్స్పూన్ల ఆయిల్ వేయండి. నూనె వేడయ్యాక కట్ చేసిన ఆనియన్స్ వేసి బ్రౌన్ కలర్ వచ్చేంత వరకు ఫ్రై చేసుకోండి.
- తర్వాత వేగిన ఉల్లిపాయలను ఒక ప్లేట్లోకి తీసుకోండి.
- ఇప్పుడు మరో గిన్నెలో 2 స్పూన్ల ఆయిల్ వేసి వేడి చేయండి. ఆపై బిర్యానీ ఆకు, దాల్చిన చెక్క, లవంగాలు, మిరియాలు, గసగసాలు వేసి కాసేపు ఫ్రై చేయండి.
- ఇప్పుడు.. కట్ చేసిన పచ్చిమిర్చి, పొటాటో ముక్కలు యాడ్ చేయండి. కొద్దిసేపు కలుపుకుని మూతపెట్టండి.
- 5 నిమిషాల తర్వాత.. నానబెట్టుకున్న శనగపప్పు వేసి కలపండి.
- శనగపప్పు పచ్చివాసన పోయే వరకు 3 నిమిషాలు మగ్గించుకోండి. ఆపై కొత్తిమీర, పుదీనా తరుగు, అల్లం వెల్లుల్లి పేస్ట్, ఉప్పు, కారం, పసుపు వేయండి.
- మసాలా మిశ్రమం బాగా కలిపి మూతపెట్టండి. 3 నిమిషాల తర్వాత.. ఇందులో పెరుగు వేసి బాగా కలపండి.
- ఆపై ఫ్రై చేసుకున్న బ్రౌన్ ఆనియన్స్ కొన్ని వేసి కలపండి. ఇప్పుడు ఆరు గ్లాసుల నీటిని పోసుకోండి. (ఈ బిర్యానీ కోసం గ్లాసు రైస్కి.. గ్లాసున్నర నీటిని యాడ్ చేయాలి)
- ఇప్పుడు బాగా మిక్స్ చేసి మూత పెట్టి 5 నిమిషాలు ఉడికించుకోండి.
- శనగపప్పు, పొటాటో ముక్కలు 80 శాతం ఉడికిన తర్వాత.. బాస్మతి రైస్ వేసి మెల్లిగా కలుపుకోండి. (మీరు బాస్మతి బియ్యానికి బదులుగా మామూలు రైస్ కూడా ఉపయోగించవచ్చు)
- ఇప్పుడు మిగిలిన ఫ్రై చేసిన ఆనియన్స్ వేసి.. మూత పెట్టి 5 నిమిషాలు ఉడికించుకోండి.
- ఆ తర్వాత మెల్లిగా అడుగు భాగం నుంచి ఒకసారి కలుపుకోండి. ఆపై మూతపెట్టి మరో 5 నిమిషాలు ఉడికించుకుని స్టౌ ఆఫ్ చేయండి.
- అంతే.. ఇలా సింపుల్గా చేసుకుంటే ఘుమఘుమలాడే దాల్ బిర్యానీ ముందుంటుంది.
- నచ్చితే ఈ విధంగా దాల్ బిర్యానీ ఇంట్లో ట్రై చేయండి.
దసరా స్పెషల్ - వెజ్ లవర్స్ కోసం అద్దిరిపోయే "పనీర్ మొఘలాయ్ దమ్ బిర్యానీ" - ఇలా ట్రై చేయండి!
శాఖాహారులకు అద్దిరిపోయే హైదరాబాదీ 'క్యాప్సికం దమ్ బిర్యానీ' - మస్తు మజాగా ఉంటుంది!
