నవరాత్రి వేళ నాన్​వెజ్​కు నో చెప్పారా? - వేడివేడిగా "చింతకాయల పప్పుచారు" చేయండి - వారెవ్వా అనాల్సిందే! - Chintakaya Pappu Charu in Telugu

Chintakaya Pappu Charu in Telugu: గణేష్ నవరాత్రుల వేళ చాలా మంది నాన్​ వెజ్​కు దూరంగా ఉంటారు. మీరు కూడా ఈ లిస్టులో ఉంటే.. ఈ సండే వేడి వేడిగా చింతకాయల పప్పుచారు ప్రిపేర్ చేయండి. ఈ టేస్ట్​తో మీరు మైమరచిపోతారంటే నమ్మాల్సిందే. మరి.. దీనిని ఎలా ప్రిపేర్ చేయాలో ఈ స్టోరీలో తెలుసుకుందాం.

Chintakaya Pappu Charu in Telugu: ఈ సీజన్​లో వచ్చే పచ్చి చింతకాయను అనేక రకాలుగా వాడుకుంటారు. కొందరు పచ్చడి చేసుకోగా.. మరికొందరు పచ్చి పులుసు చేసుకుంటారు. కానీ.. చింతకాయలతో పప్పు చారు చేస్తే ఎలా ఉంటుందో తెలుసా? చెప్పడానికి మాటలుండవ్! అయితే.. పర్ఫెక్ట్​గా చేయడం అందరికీ రాదు. మరి, నోరూరించే వేడివేడి చింతకాయల పప్పుచారు ఎలా చేయాలో.. దీనికి కావాల్సిన పదార్థాలేంటో.. ఈ స్టోరీలో తెలుసుకుందాం.

కావాల్సిన పదార్థాలు..

• 200 గ్రాముల కందిపప్పు
• అర చెంచా పసుపు
• 5 పచ్చిమిరపకాయ ముక్కలు
• కొద్దిగా కరివేపాకు
• 150 గ్రాముల చింతకాయలు
• ఒక చెంచా కారం
• రుచికి సరిపడా ఉప్పు
• నూనె
• అర చెంచా జీలకర్ర
• అర చెంచా ఆవాలు
• 5 వెల్లుల్లి పాయలు (కచ్చా పచ్చాగా దంచినవి)
• 3 ఎండు మిరపకాయలు
• 2 పచ్చి మిరపకాయలు
• ఒకటి సన్నగా తరిగిన ఉల్లిపాయ
• పావు చెంచా ఇంగువ
• ఒక టమాటా
• కొత్తిమీర

తయారీ విధానం..

• ముందుగా కుక్కర్​లోకి కందిపప్పు తీసుకుని రెండు సార్లు నీటితో బాగా కడగాలి
• ఆ తర్వాత ఇందులోకి కందిపప్పు తీసుకున్న మోతాదులోనే నీటిని పోయాలి. (అరగంట నానబెట్టి ఉడికిస్తే బెటర్)
• అనంతరం ఇందులోకి పసుపు, కరివేపాకు, పచ్చి మిరపకాయ ముక్కలు, ఆయిల్ పోసి బాగా కలపాలి.
• ఆ తర్వాత స్టౌ ఆన్ చేసి కుక్కర్​లో 3-4 విజిల్స్ వచ్చేవరకు పప్పును మెత్తగా ఉడికించాలి.
• మరోవైపు చింతకాయలను తీసుకుని నీటితో శుభ్రంగా కడగాలి.
• ఆ తర్వాత స్టౌ ఆన్ చేసి చింతకాయలు మునిగేలా నీటిని తీసుకుని బాగా ఉడికించాలి. (చింతకాయ పొట్టు ఉడిపోయేంత వరకు ఉడికిస్తే సరిపోతుంది)
• స్టౌ ఆఫ్ చేసి చింతకాయలు పూర్తిగా చల్లారబెట్టుకోవాలి.
• ఆ తర్వాత ఉడకబెట్టిన చింతకాయ గిన్నెలోని నీటిని పక్కకు మరో గిన్నెలో పెట్టుకోవాలి.
• మళ్లీ చింతకాయలో మరిన్ని మంచి నీటిని పోసుకుని బాగా పిండుతూ రసాన్ని తీయాలి.
• అనంతరం కందిపప్పును పప్పుగుత్తితో లైట్​గా మెదపాలి. ఆ తర్వాత ఇందులోనే మనం ముందుగానే పిండుకున్న చింతకాయ రసాన్ని పోయాలి.
• ఆ తర్వాత మనకు అవసరమైన పప్పుచారు పరిమాణాన్ని బట్టి నీటిని తీసుకోవాలి.
• అనంతరం కారం, ఉప్పు వేసుకుని బాగా కలపాలి. (పులుపును బట్టి నీటిని కలుపుకోవచ్చు)
• ఆ తర్వాత స్టౌ ఆన్ చేసి పప్పు చారు పట్టేంత గిన్నె తీసుకుని నూనె పోయాలి.
• నూనె వేడయ్యాక ఇందులో జీలకర్ర, ఆవాలు వేసి దోరగా వేగనివ్వాలి.
• ఇందులోనే వెల్లుల్లి పాయలు, ఎండు మిరపకాయలు, పచ్చిమిరప ముక్కులు, ఉల్లిపాయ ముక్కులు, ఇంగువ, కరివేపాకు వేసి ఫ్రై చేయాలి.
• ఇవ్వన్నీ ఫ్రై చేశాక టమాటాను వేసుకుని సుమారు 2 నిమిషాల పాటు హై ప్లేమ్​లో ఉడకనివ్వాలి (టమాటా ఆప్షనల్)
• ఆ తర్వాత ఇందులోకి ఉడకబెట్టిన పప్పు చారును వేసుకొని 5-6 నిమిషాలు హై ఫ్లేమ్​లో మరగబెట్టాలి. (మధ్యమధ్యలో కలపాలి)
• చివరగా కొత్తిమీర ఆకులు వేసి స్టౌ ఆఫ్ చేస్తే టేస్టీ టేస్టీ చింతకాయ పప్పు చారు రెడీ అయిపోతుంది!