How to Make Chikkudukaya Fry : చాలా మందికి చిక్కుడుకాయ కర్రీ అంటే ఇష్టం ఉండదు. కర్రీ ఎంత బాగున్నా కూడా ఒక్క గరిటె కూడా ప్లేట్లో వేసుకుని టేస్ట్ చేయరు. మరికొంతమంది చపాతీల్లో మాత్రమే తింటుంటారు. అయితే.. చిక్కుడుకాయ కర్రీ మీ ఇంట్లో వాళ్లందరి ఫేవరెట్ రెసిపీల్లో చేరిపోవాలంటే ఈ స్టోరీలో చెప్పిన విధంగా 'చిక్కుడుకాయ వేపుడు' ట్రై చేయండి. అందరూ ఎంతో ఇష్టంగా తింటారు. మరి, ఇక ఆలస్యం చేయకుండా చిక్కుడుకాయ ఫ్రై కమ్మగా ఏ విధంగా చేయాలో ఇప్పుడు చూద్దాం.
చిక్కుడు కాయ వేపుడుకు కావాల్సిన పదార్థాలు..
- చిక్కుడుకాయ -పావు కేజీ
- ఉప్పు రుచికి సరిపడా
- నూనె -2 టేబుల్స్పూన్లు
- కరివేపాకు-2 రెమ్మలు
- పచ్చిమిర్చి-2
- ఉల్లిపాయ-1
- ఎండుమిర్చి-8
- పచ్చి కొబ్బరి ముక్కలు-పావుకప్పు
- వెల్లుల్లి రెబ్బలు-10
- జీలకర్ర-టీస్పూన్
- ఆవాలు-అరటీస్పూన్
- శనగపప్పు-టీస్పూన్
- మినప్పప్పు-టీస్పూన్
- కరివేపాకు-2
- కొత్తిమీర తరుగు-కొద్దిగా
- పసుపు -పావు టీస్పూన్
తయారీ విధానం :
- ముందుగా చిక్కుడుకాయల్ని బాగా కడిగి, కట్ చేసుకొని ఒక ప్లేట్లోకి తీసుకోండి.
- ఇప్పుడు స్టౌపై పాన్ పెట్టి అరకప్పు నీళ్లు పోయండి.
- ఇందులో కట్ చేసుకున్న చిక్కుడుకాయ ముక్కలు, కొద్దిగా ఉప్పు, పసుపు వేసి కలపండి.
- తర్వాత మూత పెట్టి చిక్కుడుకాయ ముక్కల్ని నీరు ఇగిరి పోయేంత వరకు ఉడికించుకుని స్టౌ ఆఫ్ చేసుకోండి.
- అనంతరం ఒక మిక్సీ గిన్నెలో.. అరటీస్పూన్ జీలకర్ర, ఎండుమిర్చి, వెల్లుల్లి రెబ్బలు, పచ్చి కొబ్బరి ముక్కలు వేసి కాస్త బరకగా గ్రైండ్ చేసుకోండి.
- ఇప్పుడు స్టౌపై కడాయి పెట్టండి. ఇందులో నూనె పోసి వేడి చేయండి. ఆపై ఆవాలు, జీలకర్ర, శనగపప్పు, మినప్పప్పు వేసి ఫ్రై చేయండి.
- తాలింపు దోరగా వేగిన తర్వాత పచ్చిమిర్చి ముక్కలు, కరివేపాకు వేసి వేపండి. ఇప్పుడు ఉల్లిపాయ ముక్కలు వేసి కాస్త మెత్తబడే వరకు ఫ్రై చేయండి.
- ఆపై పసుపు, రుచికి సరిపడా ఉప్పు వేసి కలపండి. ఇప్పుడు ఉడికించుకున్న చిక్కుడుకాయ ముక్కలు వేసి మిక్స్ చేయండి.
- గిన్నెపై మూత పెట్టి రెండు నిమిషాలు మగ్గించుకోండి.
- అనంతరం గ్రైండ్ చేసుకున్న ఎండు మిర్చి పొడి వేసి కలపండి. ఒక రెండు నిమిషాల తర్వాత కాస్త కొత్తిమీర తరుగు చల్లి స్టౌ ఆఫ్ చేస్తే సరిపోతుంది.
- ఎంతో రుచికరమైన చిక్కుడుకాయ వేపుడు మీ ముందుంటుంది.
- ఈ రెసిపీ నచ్చితే ఓ సారి ఇంట్లో ట్రై చేయండి.
ఇవి కూడా చదవండి:
టేస్టీ "కొత్తిమీర పులావ్" - ఇలా చేసి పెడితే పిల్లల లంచ్బాక్స్లు ఇట్టే ఖాళీ అయిపోతాయ్!
