Internet Connection In Telangana : రాష్ట్రంలోని పల్లెల్లో ఇంటర్నెట్ విప్లవం కోసం ప్రభుత్వం కసరత్తు చేస్తోంది. రూ.300కే ఇంటింటికీ ఇంటర్నెట్ కనెక్షన్‌ ఇవ్వాలని నిర్ణయించింది. రాష్ట్రంలోని లక్షల ఇళ్లకు దశలవారీగా ప్రభుత్వం ఇంటర్నెట్ సౌకర్యం కల్పించనుంది. ఇది వైఫై కనెక్షన్‌ లాంటిది. ఈ కనెక్షన్‌ తీసుకుంటే వర్చువల్‌ నెట్‌వర్క్‌తో పాటు టెలిఫోన్, పలు తెలుగు ఓటీటీలను గ్రామీణ ప్రజలు తిలకించవచ్చు. మొదటి విడతలో భాగంగా పెద్దపల్లి, నారాయణపేట, సంగారెడ్డి జిల్లాల్లోని 2,096 పంచాయతీల్లో అమలు చేస్తున్నారు. సీఎం రేవంత్‌రెడ్డి ఆదివారం దీనిని ప్రారంభిస్తారు. తర్వాత మిగిలిన గ్రామాల్లో ఏర్పాట్లు పూర్తి చేయనున్నారు.
దేశంలోని అన్ని గ్రామాలకు ఇంటర్నెట్ సౌకర్యం కల్పించే లక్ష్యంతో కేంద్ర ప్రభుత్వం భారత్‌ నెట్ పేరుతో పథకాన్ని ప్రారంభించింది. దీనిలో భాగంగా తెలంగాణకు రూ.2,500 కోట్లను కేటాయించింది. ఈ పథకం కింద గ్రామాల్లో ప్రతి ఇంటికి ఇంటర్నెట్ సౌకర్యం కల్పించేందుకు ఫైబర్‌ నెట్ కనెక్షన్‌ను అందించాలని రాష్ట్ర ప్రభుత్వం నిర్ణయించుకుంది. ఈ వ్యవస్థ ఏర్పాటు బాధ్యతను టీ ఫైబర్‌ సంస్థకు అప్పగించింది.
టీవీనే కంప్యూటర్‌గా : రూ.300కే ప్రతి ఇంటికీ ఇంటర్నెట్ కనెక్షన్‌ ఇవ్వాలని నిర్ణయించారు. దీన్ని ఇంకా అధికారికంగా ప్రకటించలేదు. ఈ కనెక్షన్‌ తీసుకుంటే టీవీని కంప్యూటర్‌గా వాడుకోవచ్చు. 20 ఎంబీపీఎస్‌ స్పీడ్‌తో కనెక్షన్‌ ఇవ్వనున్నారు. ఈ కనెక్షన్‌ ద్వారా చెల్లింపులు కూడా చేసుకోవచ్చు. గ్రామంలోని అన్ని కార్యాలయాలకు, స్కూళ్లకు కూడా ఈ కనెక్షన్‌ ఇవ్వనున్నట్లు తెలిపారు.
టీవీనే కంప్యూటర్‌గా మారనుండటంతో విద్యార్థులకు ఎంతో ఉపయోగపడే అవకాశముంది. ఈ కనెక్షన్‌ తీసుకునే వారితో హైదరాబాద్‌ నుంచి సీఎం నేరుగా మాట్లాడచ్చని అధికారులు తెలిపారు. ప్రతి గ్రామంలోనూ జంక్షన్లు, ఇతర చోట్ల కూడా అత్యాధునిక సీసీ కెమెరాలను ఏర్పాటు చేసి ఫైబర్‌ నెట్‌తో అనుసంధానం చేయబోతున్నారు. ఇవి ప్రతి పోలీస్ స్టేషన్‌లోని కమాండ్‌ కంట్రోల్‌ సెంటర్‌కు అనుసంధానం చేస్తారు.
ప్రతి ఇంటికి డిజిటల్‌ సేవలు అందించడమే లక్ష్యం : రాష్ట్రంలోని ప్రతి ఇంటికి, ప్రభుత్వ, ప్రైవేటు సంస్థలకు హైస్పీడ్‌ బ్రాడ్‌బ్యాండ్‌ అనుసంధానంతో పాటు డిజిటల్‌ సేవలు అందించడమే టీ-ఫైబర్‌ లక్ష్యమని టీఫైబర్‌ సంస్థ ఎండీ వేణు ప్రసాద్ అన్నారు. టీ ఫైబర్‌ నెట్‌వర్క్‌ ఆపరేషన్స్‌ సెంటర్‌(టీ-ఎన్‌వోసీ) నుంచి ఈ వ్యవస్థను పర్యవేక్షిస్తున్నామని తెలిపారు. 94 మండలాలు, 2,096 గ్రామ పంచాయతీలకు కమర్షియల్‌ సేవలు అందించేందుకు వీలుగా పనులు చేశామన్నారు. ఈ ప్రాజెక్టు తొలిదశలో 30 వేల ప్రభుత్వ సంస్థలను అనుసంధానించేందుకు ప్రణాళికలు చేశామన్నారు. ప్రూఫ్‌ ఆఫ్‌ కాన్సెప్ట్‌(పీవోసీ)లో భాగంగా తొలిదశలో మద్దూరు, సంగుపేట్, అడవి శ్రీరామ్‌పూర్‌ గ్రామాల్లో టీ ఫైబర్‌ ట్రయల్‌ సేవలను ఈనెల 8న సీఎం రేవంత్‌రెడ్డి ప్రారంభిస్తారని వేణు ప్రసాద్ తెలియజేశారు.
కొత్త రేషన్ కార్డుకు అప్లై చేసుకోవాలి అనుకుంటున్నారా? - ఐతే మీకో గుడ్ న్యూస్
