How to Make Ayyappa Prasadam Recipe : తిరుపతి లడ్డూ, అన్నవరం సత్యనారాయణ స్వామి ప్రసాదం మాదిరి.. చాలా మంది శబరిమల అయ్యప్ప స్వామి ప్రసాదాన్నీ ఎంతో ఇష్టపడతారు. తెలిసిన వారు ఎవరైనా శబరిమలకు వెళ్తే.. కచ్చితంగా అయ్యప్ప స్వామి ప్రసాదాన్ని తీసుకురమ్మని చెబుతుంటారు. టిన్లో ప్యాక్ చేసి పాకంలా ఉండే ఆ పాయసం చాలా రుచికరంగా ఉంటుంది. దీన్ని వల్ల ఎన్నో ఆరోగ్య ప్రయోజనాలు ఉన్నాయని కూడా నిపుణులు చెబుతుంటారు. మరి అంతటి రుచికరమైన అరవణ ప్రసాదాన్ని ఇంట్లో కూడా చేసుకోవచ్చు. కాకపోతే కొన్ని టిప్స్ పాటిస్తూ చేస్తే అచ్చం శబరిమలలో లభించే ప్రసాదం రుచి వస్తుంది. మరి దీనికి కావాల్సిన పదార్థాలు, తయారి విధానం ఈ స్టోరీలో తెలుసుకుందాం..
కావాల్సిన పదార్థాలు :
- రెడ్ రైస్ - కప్పు
- ఎండుకొబ్బరి ముక్కలు - 2 టేబుల్స్పూన్లు
- నెయ్యి - 4 టేబుల్స్పూన్లు
- నల్ల ఎండు ద్రాక్ష - 2 టేబుల్స్పూన్లు
- నీళ్లు - సరిపడా
- తాటి బెల్లం - మూడు కప్పులు
- శొంఠిపొడి - టీస్పూన్
- యాలకులపొడి - టీస్పూన్
- కొద్దిగా పచ్చకర్పూరం
తయారీ విధానం :
- ముందుగా ఒక గిన్నెలోకి రెడ్ రైస్ తీసుకుని రెండు మూడుసార్లు శుభ్రంగా కడగి నీళ్లు లేకుండా పక్కన పెట్టండి.
- ఇప్పుడు స్టౌపై ఒక పాన్ పెట్టండి. ఇందులో 2 టేబుల్స్పూన్ల నెయ్యి వేసి కరిగించండి. ఆపై స్టౌ మీడియం ఫ్లేమ్లో ఉంచి రెడ్ రైస్ వేయండి. రైస్ని 5 నిమిషాల పాటు దోరగా కమ్మటి వాసన వచ్చేవరకు వేయించండి.
- ఇప్పుడు బియ్యం తీసుకున్న కొలతతో మూడు కప్పుల వాటర్ రైస్లో పోయండి.
- గిన్నెపై మూతపెట్టి మధ్యమధ్యలో కలుపుతూ అన్నం పొడిపొడిగా వండుకోండి. తర్వాత స్టౌ ఆఫ్ చేయండి.
- ఇప్పుడు స్టౌపై బెల్లం కరిగించుకోవడం కోసం ఒక గిన్నె పెట్టండి. ఇందులో కప్పు వాటర్ వేసుకుని సన్నగా తరిగిన మూడు కప్పుల తాటి బెల్లం వేసుకోండి.
- బెల్లం పూర్తిగా కరిగే వరకు స్టౌ మీడియం ఫ్లేమ్లో ఉంచి.. గరిటెతో తిప్పుతూ ఉండండి.
- ఇప్పుడు కరిగిన బెల్లం పాకం జాలి గరిటె సహాయంతో ఉడికించుకున్న రైస్లో పోసుకోవాలి.
- ఇప్పుడు స్టౌ మీడియం ఫ్లేమ్లో ఉంచుకుని రైస్ ఉడికించుకోవాలి. రైస్ అడుగు అంటకుండా మధ్యమధ్యలో కలుపుతూ ఉడికించుకోవాలి.
- ప్రసాదం కాస్త చిక్కబడేటప్పుడు ఎండుకొబ్బరి ముక్కలు, నల్ల ఎండు ద్రాక్ష వేసుకుని కలుపుకోవాలి.
- తర్వాత మధ్యమధ్యలో కాస్త నెయ్యి వేసుకుంటూ స్టౌ మీడియం ఫ్లేమ్లో ఉంచి 20 నిమిషాలు ఉడికించుకోవాలి.
- తర్వాత శొంఠిపొడి, యాలకులపొడి, కొద్దిగా పచ్చకర్పూరం వేసుకుని బాగా కలుపుకోవాలి. ఆపై కొద్దిగా నెయ్యి వేసి కలపండి. ఇప్పుడు 15 నిమిషాలు ఉడికించుకోండి. ఆపై స్టౌ ఆఫ్ చేసి చల్లారనివ్వండి.
- అంతే ఇలా సింపుల్గా చేసుకుంటే ఎంతో రుచికరమైన అయ్యప్ప స్వామి ప్రసాదం తయారైపోతుంది.
- దీనిని ఫ్రిడ్జ్లో నిల్వ ఉంచుకుంటే నెల రోజులపాటు తినచ్చు.
- ఈ ప్రసాదం తయారీ విధానం నచ్చితే మీరు ఓసారి ఇంట్లో ఇలా ట్రై చేయండి.
ఇవి కూడా చదవండి :
శబరిమల ప్రసాదం గురించి మీకు ఈ విషయాలు తెలుసా? - అయితే ఈ స్టోరీపై ఓ లుక్కేయండి!
అయ్యప్ప స్వాములు మెచ్చే "సాత్విక భోజనం" - ఉల్లి, వెల్లుల్లి లేకుండా చక్కగా సిద్ధం చేసుకోండిలా!
