Ginger Curd Pachadi in Telugu : చాలా మందికి భోజనం చివర్లో పెరుగు లేదా మజ్జిగ వేసుకొని తినే అలవాటు ఉంటుంది. అయితే, ఎప్పుడూ ఒకేలా పెరుగుని తీసుకుంటే బోరింగ్ ఫీల్ కలగొచ్చు. అందుకే.. ఈసారి కాస్త స్పెషల్గా "అల్లం పెరుగు పచ్చడి"ని ట్రై చేయండి. ఒక్కసారి దీన్ని టేస్ట్ చేశారంటే రోజూ చేసుకొని తినాలనిపించేంత టేస్టీగా ఉంటుంది! పైగా ఇది ఆరోగ్యానికీ ఎంతో మేలు చేస్తుంది! మరి, ఆలస్యమెందుకు ఈ సూపర్ టేస్టీ పచ్చడిని ఎలా ప్రిపేర్ చేసుకోవాలి? అందుకు కావాల్సిన పదార్థాలేంటో ఇప్పుడు చూద్దాం.
కావాల్సిన పదార్థాలు :
- మెంతులు - 1 టీస్పూన్
- కరివేపాకు - 1 రెమ్మ
- పసుపు - పావుటీస్పూన్
- ఉప్పు - రుచికి సరిపడా
- అల్లం - అంగుళం ముక్క
- పచ్చిమిర్చి - 2
- పచ్చికొబ్బరి తురుము - 1 కప్పు
- నూనె - 2 టేబుల్స్పూన్లు
- ఆవాలు - 1 టీస్పూన్
- శనగపప్పు - 1 టీస్పూన్
- మినప్పప్పు - 1 టీస్పూన్
- ఎండుమిర్చి - 1
- జీలకర్ర - అరటీస్పూన్
- ఇంగువ - కొద్దిగా
- పెరుగు - 1 కప్పు
- కొత్తిమీర తరుగు - కొద్దిగా
తయారీ విధానం :
- ఇందుకోసం ముందుగా అంగుళం పరిమాణంలో ఉండే అల్లం ముక్కను పొట్టి తీసి చిన్న చిన్న ముక్కలుగా కట్ చేసుకొని పక్కన ఉంచుకోవాలి. అలాగే పచ్చిమిర్చిని కట్ చేసుకొని పెట్టుకోవాలి.
- స్టౌ మీద కడాయి పెట్టుకొని లో ఫ్లేమ్ మీద మెంతులను గోల్డెన్ కలర్ వచ్చేంత వరకు వేయించుకోవాలి.
- ఆవిధంగా మెంతులను వేయించుకున్నాక అందులో కరివేపాకు వేసి చెమ్మారి పోయేంత వరకు ఫ్రై చేసుకోవాలి.
- ఇప్పుడు మిక్సీ జార్ తీసుకొని అందులో వేయించుకున్న మెంతుల మిశ్రమం, పసుపు, ఉప్పు, అల్లం తరుగు, పచ్చిమిర్చి ముక్కలు, పచ్చికొబ్బరి తురుముతో పాటు కాసిన్ని వాటర్ యాడ్ చేసుకొని మెత్తని పేస్ట్లా మిక్సీ పట్టుకోవాలి.
- అనంతరం స్టౌపై కడాయి పెట్టుకొని ఆయిల్ వేసుకోవాలి. నూనె వేడయ్యాక ఆవాలు వేసి చిటపటమనిపించాలి. ఆపై మినప్పప్పు, శనగపప్పు వేసుకొని ఎర్రగా వేయించుకోవాలి.
- పోపు సగం పైగా వేగాక ఒక ఎండుమిర్చిని తుంపి వేసుకోవడంతో పాటు జీలకర్ర, ఇంగువ వేసి కాసేపు ఫ్రై చేసుకోవాలి.
- తాలింపు చక్కగా వేగిందనుకున్నాక మీరు మిక్సీ పట్టుకున్న అల్లంకొబ్బరి పేస్ట్ని వేసుకొని ఒక నిమిషం పాటు వేయించుకోవాలి. జస్ట్ అల్లం, కొబ్బరి పచ్చివాసన పోయేంత వరకు వేయించుకుంటే సరిపోతుంది. అలా వేయించుకున్నాక కడాయిని దింపుకొని మిశ్రమాన్ని పూర్తిగా చల్లారనివ్వాలి.
- ఇప్పుడు ఒక మిక్సింగ్ బౌల్లో కమ్మని తాజా పెరుగుని తీసుకొని విస్కర్ సహాయంతో బాగా చిలుక్కోవాలి. ఆపై అందులో ముప్పావు కప్పు వాటర్ యాడ్ చేసుకొని బాగా కలుపుకోవాలి.
- ఆ తర్వాత పెరుగు మిశ్రమంలో పూర్తిగా చల్లార్చుకున్న అల్లంకొబ్బరి పేస్ట్ను వేసుకొని మొత్తం కలిసేలా బాగా మిక్స్ చేసుకోవాలి.
- ఇక చివరగా కొతిమీర తరుగు వేసుకొని మరోసారి బాగా కలుపుకొని సర్వ్ చేసుకుంటే చాలు. అంతే.. కమ్మగా, కొద్దిగా ఘాటుగా ఉండే "అల్లం పెరుగు పచ్చడి" రెడీ!
ఇవీ చదవండి :
నోరూరించే "పొట్లకాయ పెరుగు పచ్చడి" - ఇలా చేసి పెట్టారంటే నచ్చని వారూ ఇష్టంగా తినడం పక్కా!
కమ్మని "మసాలా పెరుగు కర్రీ" - నిమిషాల్లో ప్రిపేర్ చేసుకోండిలా! - టేస్ట్ అదుర్స్!
