వీకెండ్ స్పెషల్ : రెస్టారెంట్ స్టైల్ "చికెన్ కబాబ్స్" - ఇంట్లోనే ఈజీగా చేసేయండిలా! - టేస్ట్ అదుర్స్!

మీకు చికెన్ కబాబ్స్ అంటే ఇష్టమా? - ఈ టిప్స్ పాటిస్తూ చేశారంటే టేస్ట్​కి ఎవరైనా ఫిదా!

Chicken Kebab Recipe in Telugu : పిల్లలు, పెద్దలు ఇష్టంగా తినే స్ట్రీట్ ఫుడ్స్​లో ఒకటి కబాబ్. ఈ క్రమంలోనే చాలా మంది వీకెండ్స్​, ఆదివారం.. అలా రెస్టారెంట్స్​కి వెళ్లినప్పుడు ఎక్కువగా చికెన్ కబాబ్స్ ఆర్డర్ చేస్తుంటారు. అయితే, అదే కబాబ్స్​ని ఇంట్లోనే పిల్లలకు చేసి పెడుదామని ప్రయత్నిస్తుంటారు కొందరు. కానీ, పర్ఫెక్ట్​గా కుదరవు. అలాగే అంత రుచికరంగానూ రావట్లేదని బాధపడుతుంటారు. అయితే, ఈసారి "చికెన్ కబాబ్స్" ఇలా చేసి చూడండి. రుచిలో​ రెస్టారెంట్​ టేస్ట్​కి ఏమాత్రం తీసిపోవు! పైగా వీటిని ప్రిపేర్ చేసుకోవడం కూడా సులువు! ఇంతకీ, అందుకు కావాల్సిన పదార్థాలేంటి? ఎలా తయారు చేసుకోవాలి? అనే వివరాలు ఇప్పుడు చూద్దాం.

కావాల్సిన పదార్థాలు :

• చికెన్ కీమా - అరకేజీ
• తరిగిన ఉల్లిపాయలు - రెండు
• అల్లంవెల్లుల్లి పేస్టు - 2 టీస్పూన్లు
• చాట్ మసాలా - 1 టీస్పూన్
• కారం - 1 టేబుల్​స్పూన్
• సన్నగా తరిగిన పచ్చిమిర్చి - 4
• గరంమసాలా - అరటేబుల్​స్పూన్
• ఉప్పు - రుచికి తగినంత
• గుడ్డు - 1
• మిరియాలపొడి - 1 టేబుల్​స్పూన్
• కొత్తిమీర తరుగు - 2 టేబుల్​స్పూన్లు
• పుదీనా తరుగు - 2 టేబుల్​స్పూన్లు
• బటర్ - 2 టేబుల్​స్పూన్లు

తయారీ విధానం :

• ఇందుకోసం ముందుగా కబాబ్​స్టిక్స్​ని ఓ అరగంట పాటు నీటిలో నానబెట్టాలి. ఇలా చేయడం ద్వారా పెనం మీద కాల్చుకునేటప్పుడు మాడకుండా ఉంటాయి.
• ఇప్పుడు ఒక వెడల్పాటి మిక్సింగ్ బౌల్ తీసుకొని అందులో చికెన్​కీమా, సన్నగా తరిగి పెట్టుకున్న ఉల్లిపాయ, పచ్చిమిర్చి తరుగు, అల్లంవెల్లుల్లి పేస్టు, కారం, చాట్ మసాలా, గరంమసాలా, ఉప్పు, మిరియాలపొడి, కొద్దిగా కొత్తిమీర, పుదీనా తరుగు వేసుకొని బాగా మిక్స్ చేసుకోవాలి. ఆపై బౌల్​ మీద మూతపెట్టి అరగంటసేపు అలా వదిలేయాలి.
• ఆ తర్వాత దాంట్లో గుడ్డు సొనను వేసి కలుపుకోవాలి. అయితే, గుడ్డు ఇష్టంలేనివాళ్లు 1 టీస్పూన్ శనగపిండిని యాడ్ చేసుకోవచ్చు.
• అనంతరం చేతులను తడి చేసుకుని మీరు కలిపి పెట్టుకున్న మిశ్రమాన్ని నిమ్మకాయ సైజులో చిన్న చిన్న ఉండల్లా చేసుకోవాలి.
• తర్వాత వాటిని అరగంట పాటు నీటిలో నానబెట్టుకున్న కబాబ్​స్టిక్స్​కు అంటించుకుని పొడవుగా స్ప్రెడ్ చేసుకోవాలి.
• అనంతరం స్టౌపై మందపాటి పెనం పెట్టుకొని వేడి చేసుకోవాలి. అది వేడయ్యాక బటర్ వేసి కరిగించుకోవాలి. ఇప్పుడు ముందుగా ప్రిపేర్ చేసుకున్న ఐదారు కబాబ్​స్టిక్స్ పెట్టి లో ఫ్లేమ్ మీద 8 నుంచి 10 నిమిషాల పాటు రెండువైపులా కాల్చుకోవాలి.
• అవి క్రిస్పీగా మారాయనుకున్నాక తీసి వాటిపైన కొద్దిగా కొత్తిమీర, పుదీనా తరుగు, చాట్​మసాలా చల్లుకుని సర్వ్ చేసుకుంటే చాలు. అంతే.. ఎంతో టేస్టీగా ఉండే రెస్టారెంట్ స్టైల్ చికెన్ కబాబ్స్ రెడీ!
• ఇక వీటిని గ్రీన్​చట్నీ లేదా టమాటాసాస్​తో వేడివేడిగా తింటుంటే కలిగే ఆ ఫీలింగ్ సూపర్​గా ఉంటుంది.
• మరి, నచ్చిందా.. అయితే, మీరు ఈ వీకెండ్ మీ పిల్లలకు ఇలా చేసి ఇవ్వండి. ఎంతో ఇష్టంగా తింటారు!