Best Places for Couples in Hyderabad: ప్రేమ ఒక అనిర్వచనీయమైన అనుభూతి, వెలకట్టలేని సంపద. ఒక్కమాటలో చెప్పాలంటే ఏ బంధమూలేని తొలి సంబంధమే ప్రేమ. నిజంగా మనసుపెట్టి చూడగలిగితే, మనస్పూర్తిగా ఆస్వాదించగలిగితే ప్రేమ ఆది, అంతం లేని అమరానందమే. యుగాలు మారినా, కొత్త తరతరాలు పుట్టుకొచ్చినా ఎప్పటికీ నిలిచి ఉండేది, మనిషిని నిలిపేది ప్రేమ. ఇంతటి ఘనమైన ప్రేమను సెలబ్రేట్ చేసుకునే రోజు ఫిబ్రవరి 14. మరి, ఈసారి ప్రేమికుల రోజున మీ ప్రియమైన వారితో కలిసి బయటికి వెళ్లాలనుకుంటున్నారా? అయితే ఈ స్టోరీపై ఓ లుక్కేండి. హైదరాబాద్లో ప్రేమ జంటలు విహరించడానికి ఎన్నో చక్కటి ప్లేస్లు ఉన్నాయి. నచ్చితే మీరూ మీ మనసుకు నచ్చిన వారితో వెళ్లి, ఆ జ్ఞాపకాలను మనసులో ముద్రించుకోండి.
ఫలక్నుమా ప్యాలెస్: హైదరబాద్ నగరానికి చారిత్రక చిహ్నంగా నిలిచే చార్మినార్‌కు 5 కిలోమీటర్ల దూరంలో ఫలక్నుమా ప్యాలెస్ ఉంది. ఫలక్నుమా అనేది ఉర్దూ పదం. తెలుగులో ‘ఆకాశ దర్పణం’ అని అర్థం. ఇది ప్రేమ జంటలు వెళ్లడానికి పర్ఫెక్ట్ ప్లేస్. ఇక్కడికి వెళ్లిన వారు రాయల్ డైనింగ్ను అనుభూతి చెందవచ్చు. కపుల్స్ కోసం క్యాండిల్ లైట్ డిన్నర్కు కూడా ఉంటుంది.
దుర్గం చెరువు: ప్రకృతిలో గడపాలనుకునే జంటలకు ఇదో చక్కటి ప్రదేశం. ఇక్కడి ప్రకృతి అందాలు ఆకట్టుకుంటాయని చెప్పటంలో అతిశయోక్తిలేదు. ప్రశాంతమైన వాతావరణంలో బోటింగ్ చేస్తూ ఎంజాయ్ చేయవచ్చు. రాక్‌ క్లైంబింగ్‌, ట్రెక్కింగ్‌ వంటి వాటికి అవకాశం ఉంటుంది.
చౌమహల్లా ప్యాలెస్: 18వ శతాబ్ధం నాటి అద్భుతమైన చారిత్రక కట్టడం 'చౌమహల్లా ప్యాలెస్'. 14 ఎకరాల ప్రదేశంలో విస్తరించి ఉన్న ఈ ప్యాలెస్లో చూపు తిప్పుకోనివ్వని అద్భుతమైన నిర్మాణాలు ఎన్నో ఉన్నాయి. 2010లో యునెస్కో ఈ ప్యాలెస్కు సాంస్కృతిక వారసత్వ ప్రదేశంగా అవార్డు కూడా అందించింది.
అనంతగిరి కొండలు: సహజ సిద్ధ ప్రకృతి వాతావరణం మధ్య హైదరాబాద్కు కొద్ది దూరంలో అనంతగిరి కొండలు ఉన్నాయి. మూసీ నది జన్మస్థానంగా చెప్పే ఈ ప్రాంతం పక్షుల కిలకిలలు, పచ్చని అడవుల మధ్య ఎంతో సుందరంగా కనిపిస్తుంది. ప్రశాంతమైన వాతావరణంలో తమ ప్రేమ ఊసులు చెప్పుకోవడానికి ఇది ఎంతగానో బాగుంటుంది.
రామోజీ ఫిల్మ్ సిటీ: హైదరాబాద్లో కచ్చితంగా సందర్శించాల్సిన మరొక ప్రాంతం రామోజీ ఫిల్మ్ సిటీ. సుమారు 2 వేల ఎకరాల్లో విస్తరించి ఉన్న RFC, ప్రపంచంలోనే అతిపెద్ద ఫిల్మ్ సిటీగా గిన్నిస్ బుక్ ఆఫ్ వరల్డ్ రికార్డ్స్‌లో స్థానం సంపాదించింది. సినీ రంగానికి మాత్రమే కాకుండా, టూరిస్టులకు సైతం ప్రముఖ డెస్టినేషన్గా ఉంది. సినిమా షూటింగ్‌ ప్రదేశాలను చూసి సరికొత్త అనుభూతికి లోనవుతారు. ప్రకృతి అందాన్ని ఆస్వాదించడానికి ఇది ఒక అద్భుతమైన ప్రదేశం. అనేక రకాల థీమ్ పార్కులు, రైడ్స్, గేమ్స్ వంటివి ఎన్నో ఉన్నాయి.
నెక్లెస్ రోడ్: రాత్రి వేళ నెక్లెస్ రోడ్ అందాలు చూడటంలో మజానే వేరు. ఇక్కడి రోడ్డు ట్యాంక్‌బండ్‌ చుట్టూ నెక్లస్‌ ఆకారంలో ఒంపు తిరిగి ఉన్న కారణంగా ఈ ప్రదేశానికి నెక్లెస్ రోడ్ అని పేరు. ఇక్కడికి దగ్గరలో ఉన్న పురాతన రెస్టారెంట్లు, హోటళ్లు ప్రత్యేక ఆకర్షణగా నిలుస్తాయి. సాయంత్రం సమయంలో ఒకరి చేయి ఒకరు పట్టుకుని అలా నడుస్తుంటే ఈ జీవితానికి ఇంకేం అవసరం లేదనిపిస్తుంది.
ట్యాంక్ బండ్: ప్రేమ పక్షులు నిత్యం సేదతీరే ప్రదేశాలలో ట్యాంక్‌బండ్‌ ఒకటి. ట్యాంక్‌బండ్‌ అందచందాలు ప్రత్యేకంగా ఆకర్షిస్తాయి. సాయంత్రాన ట్యాంక్‌బండ్‌ ప్రత్యేక శోభను సంతరించుకుంటుంది. సాగర్‌లో బోటింగ్ చేస్తూ నీటి మధ్యలో ఉన్న ఎత్తైన బుద్ధున్ని చూస్తూ ప్రేమికుల రోజును ఎంజాయ్ చేయవచ్చు.
గోల్కొండ: వందల ఏళ్లనాటి ఈ కట్టడం ప్రసిద్ధ పర్యాటక ప్రదేశంగా ఉంది. దేశం నలువైపుల నుంచే కాకుండా విదేశాల నుంచి కూడా పర్యాటకులు దీన్ని చూడటానికి వస్తుంటారు. 400 అడుగుల ఎత్తైన గ్రానైట్ కొండపై నిర్మించిన ఈ కోటను భారతదేశంలోని పురావస్తు అద్భుతాల్లో ఒకటిగా చెబుతారు. మీ పార్ట్నర్తో కలిసి వెళ్లడానికి ఈ ప్లేస్ బెస్ట్.
NTR గార్డెన్స్: హుస్సేన్సాగర్‌కు సమీపంలో ఉన్న మరో అద్భుతం ఎన్టీఆర్ గార్డెన్స్. 36 ఎకరాల్లో ఉన్న ఈ పార్కు నగరం మధ్యలో బిర్లామందిర్‌, నెక్లస్‌ రోడ్డులకు దగ్గరగా ఉంది. ఇక్కడ స్వర్గీయ నందమూరి తారకరామారావు మ్యూజియం ఓ ప్రత్యేక ఆకర్షణ.
తెలుగు రాష్ట్రాల "ప్రయాగ్ రాజ్లు" ఇవే! - త్రివేణి సంగమాలు ఎన్ని ఉన్నాయో తెలుసా?
విదేశీ అందాలు మన దేశంలోనే - ఫారిన్ ట్రిప్ ఫీలింగ్ కలిగించే ప్రాంతాలివే!
