Amla Rice Recipe in Telugu : ఆరోగ్యానికి మేలు చేసే ఉసిరికాయలతో మనలో చాలా మంది నిల్వ పచ్చళ్లు తయారు చేస్తుంటారు. అలాగే పప్పు వండుకుని తృప్తిగా భోజనం ఆరగిస్తుంటారు. అయితే, ఉసిరికాయలతో అప్పటికప్పుడు నిమిషాల్లోనే కమ్మగా రైస్ కూడా చేసుకోవచ్చు. పుల్లపుల్లగా ఉండే ఉసిరికాయ అన్నం పిల్లల కోసం లంచ్ బాక్స్లో పెడితే మెతుకు మిగల్చకుండా ఎంతో ఇష్టంగా తింటారు. ఇది చేయడానికి ఎక్కువ టైమ్ పట్టదు.. నిమిషాల్లోనే ప్రిపేర్ చేసుకోవచ్చు. మరి సింపుల్గా కమ్మగా ఉసిరికాయ అన్నం ఎలా చేయాలో ఓ లుక్కేయండి..
కావాల్సిన పదార్థాలు:
- బియ్యం - కప్పు
- నువ్వులు- 2 టీ స్పూన్లు
- మిరియాలు- అర టీస్పూన్
- పసుపు - పావు టీస్పూన్
- ఉసిరికాయలు - 5
- ఉప్పు- రుచికి సరిపడా
- నువ్వుల నూనె - రెండున్నర టేబుల్ స్పూన్లు
- పల్లీలు- 3 టేబుల్ స్పూన్లు
- ఆవాలు - 1 టీస్పూన్
- మినప్పప్పు- 1 టీస్పూన్
- పచ్చి శనగపప్పు - 1 టీస్పూన్
- జీలకర్ర- 1 టీ స్పూన్
- పచ్చిమిర్చి - 2
- ఎండుమిర్చి - 2
- కరివేపాకు- రెండు రెబ్బలు
- ఇంగువ- చిటికెడు
- సాంబార్ పొడి - అర టేబుల్ స్పూన్
తయారీ విధానం:
- ముందుగా బియ్యాన్ని రెండుమూడు సార్లు శుభ్రంగా నీటిలో కడగాలి. ఆ తర్వాత ఉసిరికాయలను శుభ్రం చేసి.. తురిమి పక్కకు పెట్టుకోవాలి.
- ఇప్పుడు కుక్కర్ తీసుకుని అందులోకి కడిగిన బియ్యం, రుచికి సరిపడా ఉప్పు, కొద్దిగా పసుపు వేసి రెండు కప్పుల నీరు పోసి స్టౌ మీద పెట్టాలి. స్టౌ హై ఫ్లేమ్లో పెట్టి మూడు విజిల్స్ వచ్చే వరకు ఉడికించుకోవాలి.
- ఆపై స్టౌ ఆఫ్ చేసి స్టీమ్ పోయిన తర్వాత మూత తీసి అన్నాన్ని పూర్తిగా చల్లార్చుకోవాలి.
- ఇప్పుడు స్టౌ ఆన్ చేసి పాన్ పెట్టుకోవాలి. ఇందులో మిరియాలు, నువ్వులు వేసి దోరగా వేయించుకోవాలి. చల్లారిన తర్వాత కొద్దిగా బరకగా గ్రైండ్ చేసుకుని ప్లేట్లోకి తీసుకోవాలి.
- ఆ తర్వాత స్టౌపై పాన్ పెట్టి 2 టేబుల్స్పూన్ల ఆయిల్ పోసి వేడి చేయండి.
- నూనె వేడెక్కిన తర్వాత ఆవాలు, పల్లీలు, మినప్పప్పు, పచ్చి శనగపప్పు వేసి మీడియం ఫ్లేమ్ మీద ఎర్రగా ఫ్రై చేసుకోవాలి.
- తాలింపు వేగాక ఎండుమిర్చి, పచ్చిమిర్చి ముక్కలు, జీలకర్ర వేసి వేయించుకోవాలి.
- అలాగే ఇంగువ, కరివేపాకు వేసి ఫ్రై చేసుకోవాలి. ఇప్పుడు సాంబార్ పొడి వేసి కేవలం 30 సెకన్ల పాటు వేపి స్టౌ ఆఫ్ చేసుకోవాలి.
- ఇప్పుడు ఇందులోకి గ్రైండ్ చేసుకున్న నువ్వులు, మిరియాల పొడిని వేసి కలుపుకోవాలి.
- అలాగే తురుముకున్న ఉసిరికాయ మిశ్రమాన్ని వేసి బాగా కలుపుకోవాలి. (ఈ ప్రాసెస్ అంత స్టౌ ఆఫ్ చేసే చేయాలి.)
- ఇప్పుడు తాలింపును అన్నంలో వేసుకుని బాగా కలుపుకోవాలి.
- (ఒకవేళ అన్నంలో పులుపు ఏమైనా తగ్గినట్లు అనిపిస్తే మరికొంచెం ఉసిరి తురుము కలుపుకోవచ్చు.)
- అంతే ఇలా చేసుకుంటే ఎంతో రుచికరమైన ఉసిరికాయ రైస్ రెడీ.
ఇవి కూడా చదవండి:
అదరహో అనిపించే "అన్నవరం ప్రసాదం" - ఇంట్లోనే ఈజీగా చేసుకోండిలా! - టేస్ట్ అద్భుతం!
ఆహా అనిపించే "క్యాబేజీ బూందీ ఫ్రై" - ఇలా చేస్తే వద్దన్నవారే లొట్టలేసుకుంటూ తింటారు!
