న్యూయార్క్​లో భూకంపం- గాజాపై చర్చిస్తుండగా 'ఐరాస'లో ప్రకంపనలు - New York Earthquake Today

New York Earthquake Today : అగ్రరాజ్యం అమెరికాలో స్వల్ప భూకంపం సంభవించింది. ఫిలడెల్ఫియా నుంచి న్యూయార్క్, తూర్పున లాంగ్ ఐలాండ్ వరకు 4.8 తీవ్రతతో భూ ప్రకంపనలు సంభవించినట్లు తెలుస్తోంది.

New York Earthquake Today : అమెరికాలోని న్యూయార్క్‌లో 4.8 తీవ్రతతో స్వల్ప భూకంపం సంభవించింది. ఫిలడెల్ఫియా నుంచి న్యూయార్క్, తూర్పున లాంగ్ ఐలాండ్ వరకు శుక్రవారం ఉదయం భూ ప్రకంపనలు సంభవించినట్లు తెలుస్తోంది. బ్రూక్లిన్‌లోని భవనాలు కంపించాయని వాటిలోని అద్దాలు ఇతర సామగ్రి ధ్వంసమైనట్లు అంతర్జాతీయ వార్తా కథనాలు వెలుగుచూశాయి.

న్యూజెర్సీలోని వైట్‌హౌస్‌ స్టేషన్‌కు సమీపంలో భూకంప కేంద్రాన్ని గుర్తించామనీ యునైటెడ్ స్టేట్స్ జియోలాజికల్ సర్వే (USGS) వెల్లడించింది. మన్‌హట్టన్, బ్రూక్లిన్లతో పాటు బాల్టిమోర్, ఫిలడెల్ఫియా, కనెక్టికట్, తూర్పు కోస్తాలోని ఇతర ప్రాంతాల వారు సైతం ప్రకంపనలను గుర్తించినట్టు వెల్లడించింది. ఆస్తి, ప్రాణ నష్టానికి సంబంధించి ఎలాంటి సమాచారం లేదని న్యూయార్క్ నగర అత్యవసర సేవల విభాగం పేర్కొంది. ఐరాస భద్రతా మండలి సమావేశానికి భూకంపం కారణంగా స్పల్ప ఆటంకం ఏర్పడింది.

న్యూయార్క్‌లోని ఐక్యరాజ్యసమితి ప్రధాన కార్యాలయంలో భూ ప్రకంపనలకు సంబంధించిన దృశ్యాలు వెలుగులోకి వచ్చాయి. గాజా పరిస్థితిపై భద్రతా మండలి సమావేశం నిర్వహిస్తున్న సమయంలో భూమి కంపించింది. ఈ నేపథ్యంలో సభ్యులు గందరగోళానికి గురయ్యారు. అది భూకంపమా అని మండలిలో ప్రశ్నిస్తున్న సేవ్ ది చిల్డ్రన్ ప్రతినిధి జాంటీ సోరిప్టో వ్యాఖ్యానించడం కనిపించింది. భూకంపాన్ని 42 మిలియన్ల మంది అమెరికన్లు అనుభూతి చెందినట్లు USGS వెల్లడించింది

'భారతీయులకు ఏం కాలేదు'
ఈ భూకంపంపై న్యూయార్క్​లో ఉన్న భారత ఎంబసీ స్పందించింది. భారత సంతతి వారందరితో టచ్​లో ఉన్నామని, ఇప్పటివరకు ఏ భారతీయుడు ఈ ప్రకృతి విపత్తు వల్ల గాయపడలేదని ఎక్స్​లో పోస్ట్​ చేసింది. ఈ భూకంపం వల్ల ప్రభావితమైన ఇండియన్ అమెరికన్ ఎవరైనా తమను సంక్షిప్త సందేశం ద్వారా సంప్రదించవచ్చని తెలిపింది.

పాలస్తీనాపై ఐరాస కీలక తీర్మానం
మరోవైపు, పాలస్తీనా ప్రజలకు వారి స్వతంత్ర రాష్ట్రమైన పాలస్తీనాపై హక్కుతో సహా స్వయం నిర్ణయాధికారం కోసం ఐక్యరాజ్యసమితి మానవ హక్కుల మండలిలో ప్రవేశ పెట్టిన ముసాయిదా తీర్మానం ఆమోదం పొందింది. జెనీవాలోని ఐక్యరాజ్య సమితి మండలిలో ప్రవేశపెట్టిన ఈ తీర్మానానికి భారత్‌తో సహా 42 సభ్య దేశాలు అనుకూలంగా ఓటు వేశాయి. అమెరికా, పరాగ్వేలు వ్యతిరేకంగా ఓటు వేశాయి. 47 మంది సభ్యులున్న కౌన్సిల్‌లో అల్బేనియా, అర్జెంటీనా, కామెరూన్‌లు ఓటింగ్‌కు గైర్హాజరయ్యాయి. ఈ ముసాయిదా తీర్మానం పాలస్తీనా ప్రజలకు స్వాతంత్ర్యం, న్యాయం, గౌరవంతో జీవించే హక్కును కల్పించనుంది. తూర్పు జెరూసలేంతో సహా ఆక్రమిత పాలస్తీనా భూభాగంపై తన ఆక్రమణను తక్షణమే ముగించాలని ఇజ్రాయెల్‌కు పిలుపునిచ్చింది.