Israel Air Strike On Gaza : గాజాపై ఇజ్రాయెల్ భీకర దాడులు కొనసాగిస్తూనే ఉంది. పునరావాస కేంద్రంగా మారిన పాఠశాల భవనంపై వైమానిక దాడికి పాల్పడింది. ఈ ఘటనలో 80 మందికిపైగా మరణించారు. మరో 50 మంది తీవ్రంగా గాయపడ్డారు. ఈ విషయాన్ని పాలస్తీనా ఆరోగ్యశాఖ అధికారులు తెలిపారు. సెంట్రల్ గాజా సిటీలోని తబీన్ పాఠశాలపై శనివారం ఇజ్రాయెల్ ఈ దాడికి పాల్పడినట్లు చెప్పారు.
కాగా గత వారంలో గాజాలోని మూడు పాఠశాలలపై ఇజ్రాయెల్ దాడులకు పాల్పడింది. ఇటీవల ఓ పాఠశాలపై ఇజ్రాయెల్ జరిపిన దాడుల్లో 30 మంది మరణించగా పలువురు గాయాలపాలయ్యారు. ఆగస్టు 1న దలాల్ అల్-ముఘ్రాబీ స్కూల్పై చేసిన దాడుల్లో 15 మంది మరణించారు. అక్టోబరు 7న హమాస్‌ ఉగ్రవాదుల మెరుపు దాడుల నేపథ్యంలో అందుకు ప్రతీకారంగా గాజాపై ఇజ్రాయెల్ విరుచుకుపడుతోంది. కాగా ఈ యుద్ధంలో ఇప్పటివరకు గాజాలో 40,000 మందికి పైగా పాలస్తీనియన్లు మరణించారు.
సాకులు చెప్పకుండా చర్చలకు రండి!
ఇజ్రాయెల్-హమాస్‌ మధ్య కాల్పుల విరమణ కుదిర్చేందుకు జరుగుతున్న చర్చల్లో పురోగతి కనిపించడం లేదు. మధ్యవర్తులుగా అమెరికా, ఈజిప్టు, ఖతార్‌ చేస్తున్న ప్రయత్నాలు పెద్దగా ఫలించడం లేదు. విదివిధానాలను ఖరారు చేశామని, అమలు ఎలా చేయాలన్న అంశంపైనే ఇజ్రాయెల్-హమాస్‌ కూర్చుని మాట్లాడుకోవాల్సి ఉందని మూడు మధ్యవర్తిత్వ దేశాలు ఓ సంయుక్త ప్రకటన విడుదల చేశాయి. ఇందులో సాకులు చెప్పకుండా, సమయం వృథా చేయకుండా వచ్చి చర్చల్లో పాల్గొనాలని పేర్కొన్నాయి. ఈ ప్రకటనకు ఇజ్రాయెల్ స్పందించింది.
వచ్చే వారం జరిగే చర్చలకు ఓ బృందాన్ని దోహా లేదా కైరో పంపుతున్నట్లు ప్రకటించింది. హమాస్‌ నుంచి ఇంకా ఎలాంటి స్పందన రాలేదు. ఈ నెల 15న ఇజ్రాయెల్-హమాస్‌ చర్చలు జరిగే అవకాశం ఉందని మూడు దేశాలు తెలిపాయి. గాజాలో శాశ్వత కాల్పుల విరమణను హమాస్‌ కోరుతోంది. ఇజ్రాయెల్ ప్రధాని నెతన్యాహు మాత్రం హమాస్‌ను ఓడిస్తేనే యుద్ధం ఆగుతుందని చెబుతున్నారు. ఇజ్రాయెల్ దళాలు శుక్రవారం గాజాలోని ఖాన్‌ యూనిస్‌ నగరంపై దాడులు చేశాయి. ఆ నగరాన్ని ఖాళీ చేయాలని ఇప్పటికే పాలస్తీనియన్లను ఇజ్రాయెల్ హెచ్చరించింది.
హమాస్‌కు మద్దతుగా ఎర్ర సముద్రంలోని వాణిజ్య నౌకలపై దాడులు చేస్తున్న యెమెన్‌లోని హూతీ తిరుగుబాటుదారులు బాబ్‌ ఎల్‌ మండెప్‌ జలసంధి దగ్గర మూడు దాడులు నిర్వహించారు. తొలి దాడిలో వీరు ప్రయోగించిన రాకెట్‌ ఓ నౌక సమీపంలో పేలిపోయింది. రెండో దాడిలో మరో నౌక సమీపంలో క్షిపణి పేలింది. నౌక సహా, అందులో సిబ్బంది సురక్షితమని బ్రిటన్‌ మారిటైమ్‌ సంస్థ యూకేఎంటీవో తెలిపింది. మూడో దాడిలో డ్రోన్‌ బోట్‌ పాల్గొంది. దీన్ని భద్రతా సిబ్బంది విజయవంతంగా ధ్వంసం చేశారు.
బ్రెజిల్లో ఘోర విమాన ప్రమాదం - స్పాట్లోనే 61 మంది మృతి - Plane Crash In Brazil
'బంగ్లాదేశ్లో హిందువులపై దాడులు ఆందోళనకరం' - ఐరాస - Attacks On Hindus In Bangladesh
